को बन्लान् त्रिविको उपकुलपति ?

A+ A A-

त्रिभुवन विश्वविद्यालयको उपकुलपतिका लागि शिक्षामन्त्री अशोक राईको संयोजकत्वमा रहेको सिफारिस समितिले आइतबार प्राडा चित्रबहादुर बुढाथोकी, प्राडा टंकनाथ धमला र प्राडा केशरजंग बराललाई सिफारिस गरेकाे छ । सर्ट लिस्टमा परेका १४ जनाबाट समितिले तीन जनाको नाम प्रधानमन्त्री एवं कुलपति पुष्पकमल दाहाल प्रचण्ड समक्ष सिफारिस गरेको हो । पहिलोपटक आवेदन माग गरेर उपकुलपति छनाेट गर्न लागिएको हो ।

त्रिविको भीसीका लागि बुढाथोकी, धमला र बरालको नाम सिफारिस

आवेदन दिएका ४३ जनामध्येबाट १४ जना सर्ट लिस्टमा परेका थिए । ती १४ जनको कार्ययोजनासहित प्रस्तुति र अन्तर्वार्तापछि समितिले नम्बरको आधारमा तीन जनाको नाम कुलपतिलाई सिफारिस गरेको हो । तर, कुन उम्मेदवारले कति नम्बर ल्याए भन्ने खुलाइएको छैन । अब यी तीन जनाबाट एक जनलाई कुलपति प्रचण्डले त्रिविको २०औँ उपकुलपतिमा नियुक्त गर्नेछन् । कुलपति प्रचण्डले कसलाई उपकुलपति बनाउने भन्नेमा छलफल थालेका छन् ।

त्रिविकै गोल्डमेडलिस्ट, जसले उपकुलपतिमा दाबी गरे

बालुवाटार स्रोतका अनुसार प्रधानमन्त्री प्रचण्डले आज वा भोलिसम्म उपकुलपति नियुक्त गर्ने तयारी छ । त्रिविका एक अधिकारीका अनुसार प्रचण्डले बराललाई उपकुलपति बनाउन चाहेका छन् । बराल पोखरा विश्वविद्यालयका पूर्वउपकुलपतिसमेत हुन् । पोखरा विश्वविद्यालयमा रहदा उनलाई भ्रष्टाचारको आरोप लागेको थियो । कलेजहरूलाई सम्बन्धन दिने क्रममा आर्थिक अनियमितता गरेको आरोप लागेको थियो । तर, उनले सफाइ पाइ सकेका छन् ।

‘प्रधानमन्त्रीको चाहना बराल सरलाई बनाउने देखिन्छ,’ त्रिविका एक अधिकारीले भने । स्रोतका अनुसार माओवादी निकटका नेताहरू पनि बराललाई बनाउन लबिङ गरिरहेका छन् ।

बरालबारे एमाले अध्यक्ष केपी शर्मा ओलीले पनि कडा टिप्पणी गरेका छन् । उनले भनेका छन्, 'एउटा समिति बनाउने छानबिन गर्ने यताउती गर्ने असफल सिद्ध भइसकेका मानिसहरुको छनोट गर्ने । अहिले ३ जना सिफारिस भएका छन् क्यारे, तीन जनामा पनि तेस्रोचाहिँ नियुक्त होलाजस्तो लाग्छ छाँटकाँट हेर्दा ।’

प्राडा बुढाथोकी र धमला पनि रेसमा छन् । त्रिवि स्रोतका अनुसार बुढाथोकीलाई पनि माओवादीको समर्थन छ । बुढाथोकी शिक्षाशास्त्र संकायको सहायक डिन भएर चार वर्ष तथा सोही संकायको डिन भएर साढे तीन वर्ष काम गरेको अनुभव छ । उनले भारतको जवाहरलाल नेहरू विश्वविद्यायबाट विद्यावारिधि गरेका हुन् ।

भीसीको रेसमा रहेका अर्का उम्मेदवार प्राडा धमला हाल कुनै पनि पार्टी निकटमा रहेका छैनन् । ‘पहिले एमाले निकट हुनुहुन्थ्यो तर पछिल्लो समय मौन हुनुनुहुन्छ । कुनै पार्टीमा खुलेको देखिँदैन,’ त्रिविका एक प्राध्यापकले भने । उनी त्रिविको केन्द्रीय गणित विभाग र कम्प्युटर विज्ञान तथा सूचना प्रविधि विभागको प्रमुखसमेत भइसकेका छन् । धमलाले त्रिविको सन् १९८९ मा चान्सलर गोल्ड मेडल पाएका हुन् । उनले जर्मनीबाट पीएचडी र क्यानडाबाट पोस्ट पीएचडी गरेका छन् ।

जवाहरलाल नेहरूमा पढेका प्रा.डा. बुढाथोकी, त्रिविको नियम परिवर्तन गर्न चाहन्छन्

सत्तासाझेदार दलको असन्तुष्टि

सिफारिसमा कांग्रेस निकटका प्राध्यापक परेका छैनन् । सत्तासाझेदार कांग्रेस महामन्त्री गगन थापाले छनाेट प्रक्रियामा प्रधानमन्त्रीले झुक्याएको प्रतिक्रिया दिएका छन् ।

महामन्त्री थापाले सरकारले केही दिनभित्रै राजनीतिक भागवण्डाका आधारमा नै उपकुलपति नियुक्ति गर्ने तयारी गरिरहेको तर खुला प्रतिस्पर्धा भनेर जनतालाई झुक्याउने काम गरेको बताएका हुन् । न्युज एजेन्सी नेपालसँगको कुराकानीमा महामन्त्री थापाले विश्वविद्यालयको नेतृत्व चयनदेखि पठनपाठनलगायत धेरै विषयमा सुधार गर्नुपर्ने भए पनि प्रधानमन्त्री प्रचण्डले पुनः गल्ती दोहाेर्‍याएको दाबी गरे ।

थापाले उपकुलपति नियुक्ति प्रक्रियामा प्रधानमन्त्रीको नियत नै ठीक नभएको जिकिर गरे । उनले प्रधानमन्त्री प्रचण्डलाई खुला प्रतिस्पर्धाबाट नै उपकुलपति चयन गरेको छु भन्ने सोचेर सबैलाई झुक्याएको जस्तो लागे पनि आफैँ झुक्किइरहेको बताए । महामन्त्री थापाले अहिले खुला प्रतिस्पर्धा भनिए पनि नियत भागवण्डाकै राखिएको बताए ।

महामन्त्री थापाले प्रधानमन्त्री प्रचण्डले चाहेको खण्डमा अझै पनि नयाँ प्रक्रिया थालनी गरेर योग्य व्यक्तिलाई उपकुलपति बनाउन सकिने बताए । उनले प्रधानमन्त्रीले अहिले पाएको मौकाको सदुपयोग नगर्नु भनेको आफैँ झुक्किनु रहेको बताए ।

महामन्त्री थापाले आफूले प्रधानमन्त्रीलाई खुला प्रतिस्पर्धाबाट योग्य व्यक्ति उपकुलपति बनाउन बारम्बार आग्रह गरे पनि प्रधानमन्त्रीले भागवण्डाकै आधारमा नै नियुक्ति गर्न लागेको भन्दै आपत्ति जनाए ।