उपकुलपति बराललाई प्रश्न : नियुक्तिकाे दबाब आएर बिदामा बस्नुभएको हो ?

A+ A A-

त्रिभुवन विश्वविद्यालयका उपकुलपति प्रा.डा. केशरजंग बराल स्वास्थ्यको कारण देखाउँदै गत आइतबारदेखि बिदामा बसेका छन् । एक साताअघि मात्रै रजिस्ट्रारमा वातावरण विज्ञान विभागका प्राध्यापक केदार रिजाल र रेक्टरमा अन्तर्राष्ट्रिय सम्बन्धन विभागका प्राध्यापक खड्ग केसीको नाम उपकुलपति बरालले सिफारिस गरेका थिए । तर, प्रधानमन्त्रीसमेत रहेका कुलपति पुष्पकमल दाहाल प्रचण्डले उक्त पदको नियुक्ति रोकिदिएका छन् ।

जबकि त्रिविको रेक्टर र रजिस्ट्रार पदमा उपकुलपतिको सिफारिसमा कुलपति अर्थात् प्रधानमन्त्रीले नियुक्त गर्ने कानुनी व्यवस्था छ । यसलाई लिएर उपकुलपति बरालमाथि राजनीतिक दबाब पनि आएको चर्चा छ । र, दबाब छल्न उनी बिदामा बसेको समाचार आइरहेका छन् ।

सोही विषयलाई लिएर त्रिवि उपकुलपति बरालसँग हामीले चासो राखेका छौँ ।

तपाईंलाई दबाब धेरै आउन थालेपछि बिदामा बस्नुभएको हो ?

मलाई कसैले पनि यसलाई–उसलाई नियुक्ति गर् भनेको छैन । तर, मैले सिफारिस गरेको मान्छे अहिलेसम्म नियुक्त भएको छैन । भएको यत्ति हो । नआएको दबाबकै कारण बिदामा बसेको भन्ने कुरा सत्य हाेइन ।

अनि अहिले बिदामा बस्नुको कारणचाहिँ के हो ?

बिदामा त्याे कारणले बसेको हाेइन । मेरो ढाडमा पहिलेदेखि समस्या थियो । कहिलेकाहीँ बल्झिबस्छ । अलि गाह्रो भयो भने एक/दुई महिना नै आराम गर्नुपर्छ । तर, यसपटक त्यति साह्रो भएको छैन । अब एक हप्ता ‘रेस्ट’मा बस्दा हुन्छ । एक हप्ता रेस्टमा बसेपछि म ‘फिजियोथेरापी’ गर्छु । त्यसपछि पुनः कार्यालय जान सुरु गर्छु ।

बाहिर समाचारहरूमा त रेक्टर–रजिस्ट्रारको नियुक्ति नभएपछि दबाबका कारण तपाईं बिदामा बस्नुभयो भनेर आइरहेको छ नि ?

मैले एक हप्ताअगाडि रेक्टर र रजिस्ट्रार सिफारिस गरेको सत्य हो । नियुक्ति नभइरहेको पनि सत्य हो । तर, मलाई प्रत्यक्ष रूपमा कुनै नेताले पनि मान्छे तोकेर यसलाई सिफारिस गर् भन्नुभएको छैन । प्रधानमन्त्रीले पनि बोलाएर तपाईंले पठाएको ‘क्यान्डिडेट’ भएन भन्नुभएको छैन ।

यद्यपि, मैले नाम पठाएको धेरै भए पनि आजसम्म किन नियुक्ति भएन भनेर कारण भने थाहा पाउन सकेको छैन ।

भनेपछि योबीचमा प्रधानमन्त्रीसँग पनि भेटघाट भएको छैन ?

योबीचमा हामीबीच कुनै भेटघाट भएको छैन । सिफारिसलाई लिएर प्रधानमन्त्रीले पनि केही भन्नुभएको छैन ।

विद्यार्थी संगठन/प्राध्यापक संगठनबाट त अप्रत्यक्ष दबाब आएको होला नि ?

अप्रत्यक्ष रूपमा विद्यार्थीहरूले माग पेस गर्ने, वैचारिक संगठनले चाहिँ यसलाई गर् भन्ने कुरा त आएका हुन् । तर, राजनीतिक नेतृत्वबाटै चाहिँ आएको छैन ।

विद्यार्थी संगठनले चाहिँ दबाब दिएर दुःख दिइरहेका छन् भन्न खोज्नुभएको हो ?

मागहरू पेस गरेर यसो गर्–उसो गर् भन्छन् । यसलाई मैले स्वाभाविक रूपमा लिएको छु ।

कार्यकालको सुरुबाटै नियुक्तिको लफडामा घेरिनुभएको छ । तपाईंबाट त्रिवि सुधारको अपेक्षा कसरी गर्ने ?

मलाई मेरो ‘टिम’ बनाउन दिइयो भनेचाहिँ त्रिविको सुधार गर्ने योजनाहरू छन् । सुधार गर्छु भन्ने आत्मविश्वास पनि छ । तर, माथिबाटै मिलाएर भागवण्डाका आधारमा नियुक्ति भयो र सोचेजस्तो टिम बनाउन पाइएन भनेचाहिँ गाह्रै छ । सुधार नहुन सक्छ ।

हाम्रोमा समस्या भनेकै पार्टीको भागवण्डा गर्दा आफ्नो पार्टीको मान्छे भयो भने जोगाउने, अर्कोको भयो भने कारबाही गर्ने हुन्छ । आफ्नालाई जसरी पनि संरक्षण गर्ने खेल हुन्छ । त्यसैले मैले सार्वजनिक रूपमै भनिसकेको छु– राजनीतिक भागवण्डाका आधारमा नियुक्ति हुनुहुन्न, प्रक्रिया पुर्‍याएर प्रणालीगत नियुक्ति हुनुपर्छ भन्ने मेरो मान्यता हो ।

तपाईंमाथि सुरक्षा खतरा छ भन्ने पनि सुनिन्छ नि ।

विद्यार्थी/प्राध्यापकहरू पाँच जना आउँछौँ भन्नुहुन्छ, तर हुलमुलमा धेरै आउनुहुन्छ । अब भिडमा के–कस्तो हुन सक्छ, कसलाई के थाहा ? यो विषयचाहिँ हो । अस्ति पनि केही केटाहरूले धम्की दिए भनेर कुरा आएको थियो । त्यसैले सुरक्षालाई लिएर चासो राख्नुपर्ने त स्वाभाविक हो ।