एनएमबी लघु वित्तः हकप्रदको बुक क्लोज पछि के हुन्छ ? (समग्र विश्लेषण)

A+ A A-

पहिलो त्रैमासमा नाफामा गुणात्मक वृद्धि
लाभांश घोषणा हुन बाँकी
हकप्रदको पाउने अवधि सकियो
कडा नियमनका बाबजुद सम्पत्तिको गुणस्तरमा दबाब

२०६९ सालबाट सञ्चालनमा आएको एनएमबी लघुवित्त वित्तीय संस्थाले चालु आवको पहिलो त्रैमासमा १५ गुणाले नाफा वृद्धि गरेर १ करोड ५२ लाख पुर्‍याएको छ ।

एनएमबी लघुवित्तले आव २०७५/७६ को लाभांश घोषणा गरिसकेको छैन । कम्पनीले विगत ४ वर्षको अवधिमा भने वार्षिक औसत २०.८५ प्रतिशत लाभांश दिएको छ ।

लघुवित्तको चालू आर्थिक वर्षको पहिलो त्रैमासमा १ हजार ४सय ३ प्रतिशतले नाफा बढेर १ करोड ५२ लाख रुपैयाँ पुगेको छ ।

यस लघु वित्तको १४ करोड ११ लाख व्याज आम्दानी भए पनि खुद व्याज आम्दानी ५ करोड ९९ लाख छ । अन्य बैंक तथा वित्तीय संस्थाबाट २ अर्ब १९ करोड रुपैयाँ स्रोतको रूपमा परिचालन गर्न पाएका छन् । यो करिब १९ प्रतिशतले बढी हो । विपन्न वर्ग कर्जाको रूपमा यी संस्थाले लगानी गर्नुपर्ने कुल कर्जाको ५ प्रतिशतमध्ये ३ प्रतिशत यस्ता लघुवित्तमार्फत लगानी गर्न सक्छन् । यस लघु वित्तको हाल कोष लागत १०.१२ प्रतिशत छ ।

यस लघुवित्तले आफ्ना सदस्यहरूमार्फत १ अर्ब १८ करोड रुपैयाँ निक्षेप संकलन गरेको छ । कम्पनीले ५४ जिल्लामा ९५ कार्यालय र शाखाबाट सेवा दिइरहेको छ ।

खराब कर्जाको दर सामान्य घटे पनि यो २.२७ प्रतिशत छ । लघुवित्तले खराब कर्जाको आधारमा ९४ प्रतिशत नोक्सानी व्यवस्था राखेको छ । प्रावधान रकम भने ३१ लाख २८ हजार रुपैयाँ राखेको छ । प्रतिसेयर आम्दानी ३७.७४ प्रतिशत, मूल्य आम्दानी अनुपात २८.५४ प्रतिशत र प्रतिसेयर नेटवर्थ २ सय रुपैयाँ छ ।

यस लघु वित्तमा भने एनएमबी बैंकको ५१ प्रतिशत लगानी छ । सोपछि भ्लोन समूहको लगानी उच्च छ । उत्तम भ्लोन लामा कम्पनीको अध्यक्ष छन् भने प्रमुख कार्यकारी अधिकृतमा मुरारीप्रसाद लम्साल छन् ।

कम्पनीले जारी गर्न लागेको १ सय ५० प्रतिशत हकप्रदलाई इक्रा नेपालले ग्रेड ४ रेटिङ दिएको छ । कात्तिक ६ गतेसम्म लगानी गर्नेले हकप्रदमा आवेदन दिन पाउने भएका हुन् । इक्राले दिएको रेटिङले कम्पनीको आधारभूत पक्ष औसतभन्दा कमजोर रहेको संकेत गर्छ ।

–उच्च वृद्धिदर (समग्र क्षेत्रमा ३६ प्रतिशत वृद्धि हुँदा कम्पनीमा २९ प्रतिशतको वृद्धि)

–समूहमा आधारित कर्जा लगानी ढाँचामा सञ्चालन हुने यस लघुवित्तले क्रमश: धितोमा आधारित कर्जा बढाउदै

–नियमनका लागि ९ जना नियमन अधिकृत राखेको कम्पनीले हरेक शाखाको कम्तिमा दुई महिनामा एक पटक सुपरिवेक्षण गर्ने भए पनि सम्पत्तीको गुणस्तरमा दबाब, खराब कर्जामा वृद्धि

–नेटवर्थ प्रतिफल र सम्पत्तिमा प्रतिफल घट्यो, क्रमशः २२ र १.९८ प्रतिशत (करीब ३ वर्षअघि क्रमशः ३० र ३.३८ प्रतिशत)

–वाणिज्य बैंकहरूबाट ६ प्रतिशत माथि विपन्न बर्गमा कर्जा लागनी हुनुले यस्ता लघुवित्तहरुलाई भविष्यमा स्रोतमा दबाब पर्न सक्ने

–कम स्प्रेड दर, उच्च सञ्चालन खर्च र कर्जा लागत

पर्ख र हेर

बुधबारसम्म कम्पनीले जारी गर्न लागेको हकप्रदको कारण मूल्यमा वृद्धि देखिएको छ । हकप्रद सेयरको समायोजनले निश्चय नै सेयरमूल्य केही घट्नेछ । यद्यपि कम्पनीले गत आवको नाफा पछि लाभांश घोषणा गरिनसकेकाले मूल्यमा समायोजनपछि पनि सामान्य वृद्धि देखिने सम्भावना भने छ ।

सेयर कारोबार सन्तुलित क्षेत्रमा वृद्धि भइरहेको छ । १४ दिने आरएसआई सुचकको स्केल ६२.३४ मा आएको छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

सिम्पल मुभिङ एभरेज रेखामा ७ दिने रेखाले २१ दिने रेखालाई काटेर माथि लागेको छ । मूल्य बुलिश प्रवृत्तिमा रहेको यसले संकेत गर्छ । पीभट विश्लेषणले भने अब बजार बढ्ने क्रममा नै रहे एक महिनामा ११ सय ५७ मा पहिलो प्रतिरोध र घट्ने क्रममा रहे १ हजार ३८ मा पहिलो टेवा पाउने देखाउँछ ।

एनएमबी लघु वित्तको सेयर मूल्यले अन्तिम दुई दिनमा सेतो मैनवत्ति आकृति बनाएको छ । यसले मूल्य बढ्ने संकेत गर्छ । यद्यपि हकप्रद समायोजनको कारण भने मूल्य घट्ने निश्चित नै छ । त्यसैले समायोजन पछिको कारोबारको आधारमा मात्रै निर्णय गर्नु सही हुन्छ ।

नोट: बजार जोखिममा आधारित हुन्छ । लगानी गर्दा रणनीतिअनुसार बजारको परिवेशको स्वमूल्यांकन गर्नु उचित हुन्छ ।

अन्य कम्पनीको विश्लेषण