बिओकेः २ अर्बको नाफा, १६ प्रतिशत लाभांश क्षमता (समग्र विश्लेषण)

A+ A A-

लाभांश क्षमता १६.१२ प्रतिशत
खराब कर्जा अनुपातमा कमी

२०५१ सालबाट सञ्चालनमा आएको बैंक अफ काठमाण्डु (बिओके) ले गत आवको चौथो त्रैमाशसम्ममा १ अर्ब ९३ करोड रुपैयाँ नाफा गरेको छ । अघिल्लो वर्षको तुलनामा गत वर्ष बैंकको नाफा ४६ प्रतिशतले बढेको छ ।

नाफाको आधारमा बिओकेले लगानीकर्तालाई १ अर्ब ३० करोड रुपैयाँ वितरण गर्न सक्छ । यो भनेको चुक्ता पुँजीको १६.१२ प्रतिशत हो ।

८ अर्ब चुक्ता पुँजी पुर्याउने क्रममा लुम्बिनी बैंकसँग मर्जर गरेको बैंकले ५ वर्षयता बार्षिक औसत २० प्रतिशत बराबर लाभांश दिदै आएको छ ।

बैंकको पुँजी कोष पर्याप्तता अनुपात १४.५८ प्रतिशत रहेकोले नियामकीय प्रावधानभन्दा निकै सहज अवस्थामा बैंक छ । बैंकको निक्षेप र प्राथमिक पुँजीको आधारमा प्रवाह भएको कर्जाको अनुपात ७५.८० प्रतिशत छ ।

बैंकको सञ्चित कोषमा ४ अर्ब ६५ करोड रुपैयाँ छ । बैंकको पुँजी कोष लागत घटिरहेको छ । कोष लागत ८.०१ प्रतिशतबाट घटेर ७.२६ प्रतिशत कायम भएको छ ।

अझै पनि यो लागत उच्च नै हो । बैंकको व्याज आम्दानी १२ प्रतिशतले बढेर ९ अर्ब ८० करोड पुगेपनि ६ अर्ब व्याज खर्च नै छ । बैंकको खुद व्याज आम्दानीमा २३ प्रतिशतले बढेर ३ अर्ब ७७ करोड छ ।

बिओकेको खराब कर्जा १.५० मा सिमित भएको छ । केही अघिसम्म यो दर ३ प्रतिशतभन्दा माथिसम्म थियो । मेलम्ची खानेपानी आयोजनामा गएको कर्जा खराब हुँदा यो अनुपात बढेको थियो ।

बिओकेले खराब कर्जाको आधारमा १ सय ५३ प्रतिशत रकम राखेको छ । बैकले प्रावधान रकम २ करोड ३४ लाख राखेको छ । प्रतिसेयर आम्दानी २४.०४ रुपैयाँ, मूल्य आम्दानी अनुपात १०.६५ गुणा र प्रतिसेयर नेटवर्थ १ सय ७३ रुपैयाँ छ । बैंकको प्रमुख कार्यकारी अधिकृतमा शोभनदेव पन्त छन् ।

मूल्य वियरिश प्रवृत्तिमा

बैंकको सेयर कारोबार घट्दै गएको सेयर कारोबार अनुपातले देखाउँछ । गत आवको पहिलो त्रैमाशमा चुक्ता पुँजीको आधारमा कारोबार भएको सेयर संख्या अनुपात १.७८ प्रतिशत थियो । आव अन्त्यमा यो अनुपात ०.७१ प्रतिशतमा सिमित छ । घट्दो कारोबार अनुपातले कम्पनीहरुको सेयर कारोबार गर्न लगानीकर्ता इच्छुक नभएको वा सेयर कर्नरिङ भइरहेको समेत संकेत गर्छ । यस्तो अनुपात घटबढ हुनुमा ‘सिजनल साइकल’को समेत प्रभाव रहेको हुनसक्छ ।

विगत एक वर्षमा ३ सय ३९ को उच्च बिन्दु बनाएको बैंकको सेयर मूल्यले यो अवधिमा २ सय ३४ को न्यून विन्दु कायम गरेको छ । अहिले २१ प्रतिशतले मूल्यले रिट्रेस गरेर २ सय ५७ मा आएको छ । २३, ३८, ६१ र ७८ लाई रिट्रेसमेन्टको महत्वपूर्ण चरणको रुपमा लिइन्छ । यो चरणमा मूल्यले कडा प्रतिरोध पनि पाउन सक्छ ।

तर, यो तह पार गरेका मूल्य थप बढ्ने प्रक्षेपण गरिन्छ । दुई वर्षअघि ४ सय ७८ को उच्च मूल्य कायम गरेको बैंकको सेयर मूल्य त्यसयता भने त्यो तहमा पुग्नै सकेको छैन ।

बैंकको मूल्य सन्तुलिन क्षेत्रबाट अधिक बिक्रीको क्षेत्रमा पुग्ने क्रममा रहेपनि फर्किने प्रयासमा भने रहेको १४ दिने आरएसआई सुचकले देखाइरहेको छ । आरएसआईको स्केल ३२.३५ मा आएको छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

सम्पिल मुभिङ एभरेजमा रेखा क्रमओभर भएको छ । ७ दिने रेखालाई २१ दिने रेखाले काटेको छ । अहिले बिओकेको सेयर वियरिश प्रवृत्ति रहेको संकेत गरिरहेको छ । मूल्य केही समय नबढ्ने संकेत यसले गर्छ ।

पीभट विश्लेषणले भने अब बजार बढ्ने क्रममा रहे एक महिनामा २ सय ६९ मा पहिलो प्रतिरोध र घट्ने क्रममा रहे २ सय ५० मा पहिलो टेवा पाउने देखाउँछ ।

चार दिनयता बैंकको सेयर मूल्य लगातार शुरु मूल्यभन्दा घट्ने क्रममा रहेर कालो मैनवत्ति आकृति बनाएको छ । अन्तिम दुई दिनमा पछिल्लो दिनको मैनवत्तिको शुरु मूल्य अघिल्लो दिनकोभन्दा तल रहको छ । अन्तिम मूल्य पनि तल छ । स्पष्ट प्रवृत्ति नभने पनि यसले मूल्य घट्ने संकेत गरिरहेको छ ।