ब्लु चिप एभरेस्ट प्रतिरोधको सामनामा (प्राविधिक विश्लेषणसहित)

A+ A A-

देशमा वैदेशिक संयुक्त लगानीका बैंक सञ्चालनमा आइरहेको समयमा एभरेस्ट बैंक पनि १ कात्तिक २०५१ सालदेखि सञ्चालनमा आयो । ‘निरन्तर, बलियो र भरपर्दो’ नारा लिएको बैंकले हालसम्म आफ्नो नारालाई प्रमाणित पनि गर्दै आएको छ ।

पन्जाब नेसनल बैंक भारत र नेपालीहरुको संयुक्त लगानीमा सञ्चालनमा रहेको बैंकको नेतृत्व हालसम्म पनि भारतबाटै हुने गरेको छ । बैंकको प्रमुख कार्यकारी अधिकृतमा अहिले पनि भारतको पन्जाब नेसनल बैंकबाट आएका सोमेश्वर सेथ छन् ।

बलियो बैंक भएकोले नै नेप्से १५ भदौं २०६५ मा ११७५ को तत्कालिन उच्च विन्दुमा बैंकको मूल्य ३ हजार १ सय १२ रुपैयाँ पुग्यो । यस्तै १२ साउन २०७३ मा १८८१ मा पुग्दा पनि बैंकको मूल्य ३ हजार ५ सय ८५ रुपैयाँसम्म पुग्यो । तर, ब्लु चिप कम्पनी एभरेस्ट बैंकको सेयर मूल्य हाल ६ सय ५४ रुपैयाँको हाराहारीमा छ ।

बजार वियरिश प्रवृत्तिमा रहेको र बैंकले पछिल्लो वर्ष नगद लाभांश मात्र दिएको कारण बैंकको मूल्य अहिलेको तहमा आएको हो ।

आर्थिक वर्ष	बोनस	नगद	कुल लाभांस
२०७०/०७१	१२	५०	६२
२०७१/०७२	३०	६.५७	२१.०५
२०७२/०७३	७०	३.६७	७०.६७
२०७३/०७४	३३	१.७४	३४.७४
२०७४/०७५	०	२०	२०
५ वर्षको वार्षिक औसत		४५.३९

कम आपूर्ति र उच्च प्रतिफलको कारण बजारमा बिमा र लघुवित्त कम्पनीहरुमा लगानीकर्ताहरुको आकर्षण बढ्न थालेपछि समग्र बैंकिङ क्षेत्रका कम्पनीको मूल्यमा भने उच्च सुधार देखिएन । यद्यपि, याेबीचमा पनि एभरेस्ट जस्ता बलिया बैंकमा लगानीकर्ताको आकर्षण भने कम भएन ।

चुक्ता पुँजी ८ अर्ब रुपैयाँ पुर्‍याउन बोनस र हकप्रदमा जोड दिएको एभरेस्टले विगत ५ वर्षमा वार्षिक औसत ४५.३९ प्रतिशतको लाभांश दिएको छ । बैंकले गत आवमा नाफा भएपछि २० प्रतिशत नगद लाभांश मात्रै वितरण गर्‍यो ।

हाल ८ अर्ब १० करोड चुक्ता पुँजी रहेको बैंकले चालू आवको तेस्रो त्रैमासमा १८.३७ प्रतिशतले नाफा वृद्धि गर्न सफल भएको छ । यो रकम २ अर्ब २१ करोड रुपैयाँ हो । नाफा रकमको आधारमा एभरेस्ट छैटौं स्थानमा छ । दुई वाणिज्य बैंकले नाफा ३ अर्ब कटाउँदा २ अर्बमाथि नाफा गर्ने ६ बैंकमध्ये चौथो स्थानमा छ ।

बैंकले हालसम्मको नाफाको आधारमा लगानीकर्तालाई १ अर्ब ३५ करोड रुपैयाँ वितरण गर्न सक्छ । यो रकमको आधारमा पनि बैंक वाणिज्य बैंकहरुमा पाँचौं स्थानमा छ । यो रकम बैंकको चुक्ता पुँजीको आधारमा १६.६५ प्रतिशत हो । सेयर प्रिमियम रकमसमेत जोड्दा यो दर १९.५९ पुग्छ । आव अन्त्यमा यो दर अझ बढ्न सक्छ ।

बैंकको जगेडा तथा सञ्चित कोषमा ६ अर्ब १२ करोड रुपैयाँ छ । कोष लागत केही बढेर ६.०७ प्रतिशत पुगेको छ । बैंकको ब्याज आम्दानी ३१ प्रतिशत र खुद ब्याज आम्दानी करिब १७ प्रतिशतले बढेको छ । ९ अर्ब ४७ करोड रुपैयाँ ब्याज आम्दानी गरेको बैंकको खुद ब्याज आम्दानीमा ४ अर्ब १० करोड पुगेको छ । खराब कर्जा अनुपात ०.५ प्रतिशतभन्दा कम राख्न बैंक सफल भइरहेको छ । कर्जा नोक्सानको सम्भावनाको आधारमा बैंकले १३ करोड ८७ लाख रुपैयाँ प्रावधान राखेको छ ।

निक्षेप प्राथमिक पुँजीको आधारमा कर्जा लगानी अनुपात ७६.६९ प्रतिशत छ । बैंकको प्रतिसेयर आम्दानी ३६ रुपैयाँ ८१ पैसा र प्रतिसेयर नेटवर्थ २ सय ५ रुपैयाँ छ । बैंकको मूल्य आम्दानी अनुपात १७.७६ प्रतिशत छ । यो दर २० भन्दा माथि ३० सम्म हुनु राम्रो मानिन्छ ।

प्रतिरोध परीक्षण

बैंकको सेयर मूल्य करिब एक वर्षयताकै उच्च (६ सय ८० रुपैयाँ) मा प्रतिरोध पाएर घट्न थालेको छ । तर, मूल्य धेरै तल पनि गएको छैन । निश्चित मूल्य अन्तरमा रहेको बैंकको मूल्य साइडवेज मुभमेन्टमा देखिएको छ । मूल्यले ब्रेक प्वाइन्ट भेटेको छैन ।

यो एक वर्षको अवधिमा करिब ६ महिनायता बैंकको मूल्यले कपविथ ह्यान्डल आकृति बनाएको छ । तर, ह्यान्डलको भाग पूरा बनेको देखिँदैन । ह्यान्डल आकृति २/३ सातामा पूरा भइसक्नुपर्छ । यो अवधिमा बैंकको मूल्यले ६ सय ८० को तह तोडेर उकालो लागे मूल्य थप बढ्नेछ । ८ सय ६० सम्म मूल्य पुग्न सक्छ किनभने कपको गहिराइ बराबर नै मूल्य बढ्ने अनुमान गरिन्छ । बैंकको मूल्यको रेखाचित्रले पनि यो ब्रेकइभन बिन्दुपछि त्यही तहमा बलियो प्रतिरोध रहेको देखाउँछ ।

७ दिने सिम्पल मुभिङ एभरेजलाई तल पारेर २१ दिने रेखा माथि लागेको छ । तर, यी दुईबीच खासै दूरी छैन । ७ दिने मुभिङ एभरेज रेखा २१ दिने रेखालाई काट्ने जमर्कोमा रहेको संकेत छ । यसले मूल्य केही समय बुलिस प्रवृत्तिमा जाने दरिलो सम्भावना देखाएको छ ।

एक महिनाको अवधिमा ६ सय ६७ देखि ६ सय ४५ बीचमा नै मूल्य घटबढ भएको छ । एक महिनामा बैंकको मूल्य २२ रुपैयाँको फरकमा तल–माथि गरिरहेकोले रेन्ज नै कम छ । पिभट विश्लेषणले भने अब बजार बढ्ने क्रममा रहे आगामी एक महिनामा ६ सय ६९ मा पहिलो प्रतिरोध र घट्ने क्रममा रहे ६ सय ४७ मा टेवा पाउने देखाउँछ ।

बैंकको सेयर कारोबार सन्तुलित रहेको १४ दिने आरएसआई सूचकले संकेत गर्छ । यो ७० र ३० स्केलबीचमा नै तल–माथि गरिरहेको छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

बैंकको सेयर मूल्यले अन्तिम चार दिनमध्ये तीन दिनमा मर्निङ स्टार बुलिस आकृति बनाएको छ । यो आकृतिमा पहिलो दिन कालो मैनबत्ती, दोस्रो दिन सानो कालो आकारको मैनबत्ती र तेस्रो दिन सेतो आकारको मैनबत्ती बनेको छ ।

तेस्रो दिन बनेको सेतो मैनबत्तीलाई प्रवृत्ति परिवर्तनको दरिलो संकेतका रुपमा लिइन्छ । त्यसैअनुसार चौथो दिन लामो ठूलो आकारको मैनबत्ती बनेको छ । यसले मूल्य बढ्न सक्ने संकेत त गरिरहेको छ । तर, फेरि पनि मूल्यले ब्रेक प्वाइन्ट खोजिरहेको विभिन्न विश्लेषणले देखाइरहेको छ । अन्य बाहिरी प्रभाव नरहेमा ब्रेकइभनपछि बैंकको मूल्य केही समय बढ्ने बलियो सम्भावना देखिएको छ । तर, ब्रेक इभन प्वाइन्टलाई भने ध्यान दिनु उचित हुनेछ ।

अन्य कम्पनीको विश्लेषण