ग्लोबलमा नबढेको लगानीकर्ताको विश्वास, सेयर अन्डर भ्यालुड

A+ A A-

‘सबैका लागि बैंक’को नारासहित १२ वर्षअघि सञ्चालनमा आएको ग्लोबल आईएमई बैंक सन्तुलित वृद्धिसहित अगाडि बढेको बैंक हो । ८ अर्ब चुक्ता पुँजी पु–याउन मर्जरमा जोड दिएको बैंकको यही कारण प्रतिफलमा भने मध्यम देखिन्छ ।

बैंकले यसबीच पाँच वटा संस्था मर्जर र दुई वटा संस्था एक्वायर गरिसकेको छ । समस्याग्रस्त अरुण फाइनान्स नाम परिवर्तन भएर बनेको हाथवे फाइनान्सलाई पनि बैंकले हालै मात्र एक्वायर गरेको छ ।

ग्लोबलले १० अर्ब ३१ करोड रुपैयाँ चुक्ता पुँजी बनाइसकेको छ । पुँजी वृद्धिका लागि मर्जरको बाटो रोजेको बैंकले बजार मनोविज्ञान भने बुझ्दै आएकोले बोनस लाभांश दिन छुटाउने गरेको छैन । बैंक विगत ५ वर्षमा वार्षिक औसत २० प्रतिशतको लाभांश दिन भने सफल हुँदै आएको छ ।

तर, बैंकप्रति दोस्रो बजारका सेयर लगानीकर्ताको विश्वास खासै बढ्न सकेको देखिँदैन । बैंकको मूल्य आम्दानी अनुपात ११.४९ प्रतिशत हुनुले यस्तो देखाउँछ । यो दर २० भन्दा माथि ३० सम्म हुनु राम्रो मानिन्छ । यसको अर्थ बैंकले कमाएको १ रुपैयाँका लागि लगानीकर्ताहरुले ११.४९ तिरिरहेका छन् भन्ने हो । बजारमा रहेका समकालीन अन्य वाणिज्य बैंकहरुमा यो दर कम नै हो ।

हाल १० अर्ब ३१ करोड चुक्ता पुँजी रहेको बैंकले चालू आवको तेस्रो त्रैमासमा मात्रै ३२ प्रतिशतले नाफा बढाएर १ अर्ब ८७ करोड रुपैयाँ कमाएको छ । बैंकले हालसम्मको नाफाको आधारमा लगानीकर्तालाई १ अर्ब ४१ करोड रुपैयाँ वितरण गर्न सक्छ । यो भनेको चुक्ता पुँजीको १३.७४ प्रतिशत हो । आव अन्त्यमा यो दर बढ्न सक्छ ।

बैंकको जगेडा तथा सञ्चित कोषमा ५ अर्ब १२ करोड रुपैयाँ छ । कोष लागत ८.२२ प्रतिशतबाट घटेर ६.९७ मा सीमित भएको छ । समग्र बैंकिङ क्षेत्रमा यो बैंक निक्षेपको आधारमा छैटौं र कर्जा लगानीको आधारमा ८औं स्थानमा छ । ब्याज खर्च सबैभन्दा धेरै हुनेमध्ये तेस्रो तर खुद ब्याज आम्दानीको आधारमा ९औं स्थानमा छ । कोष सञ्चालनमा बैंकको अवस्था राम्रो देखिन्छ ।

बैंकको ब्याज आम्दानी १८ प्रतिशत र खुद ब्याज आम्दानी ४२ प्रतिशतले बढेको छ । ९ अर्ब ७७ करोड ब्याज आम्दानी गरेको बैंकको खुद ब्याज आम्दानीमा ३ अर्ब ६८ करोड पुगेको छ । खराब कर्जा अनुपात १ प्रतिशतभन्दा कम छ । सम्भावित कर्जा नोक्सानी व्यवस्थाका लागि बैंकले १३ करोड ७७ लाख रुपैयाँ राखेको छ ।

निक्षेप प्राथमिक पुँजीको आधारमा कर्जा लगानी अनुपात ७८.७६ प्रतिशत छ । बैंकले कर्जा लगानीका लागि आवश्यक स्पेस बनाउन केही समयअघि मात्रै ऋणपत्र जारी गरेको थियो । बैंकको प्रतिसेयर आम्दानी २४.२१ प्रतिशत र प्रतिसेयर नेटवर्थ १ सय ४९ प्रतिशत छ ।

कम्पनीको सेयर मूल्य पछिल्लो समय घट्ने क्रममा तीन सय रुपैयाँभन्दा कमसम्म पुगेको थियो । यसमा सुधारको प्रयार देखिन थालेको छ ।

वियरिस प्रवृत्तिमा मूल्य

बैंकको सेयर मूल्य केही समयदेखि नै वियरस प्रवृत्तिमा देखिएको छ । १४ दिने आरएसआई सूचक केही समयदेखि नै अधिक बिक्री क्षेत्र आसपास नै रहेको छ । विगत दुई करोबार दिअघि स्केल २५ मा देखिएको आरएसआई हाल ३४ मा आएको छ । बैंकको आरएसआई सूचकले पनि टेवा पाएको देखिन्छ । यसो भएमा बैंकको सेयर मूल्यमा सानै भए पनि सुधार देख्न पाइनेछ । आरएसआई रेखाको चाललाई याद गर्दै निर्णय लिनुपर्ने देखिन्छ ।

२१ दिने र ७ दिने सिम्पल मुभिङ एभरेज केही समयअघि मात्रै क्रस ओभर भएको छ । यसले मूल्य वियरिस प्रवृत्तिमा नै रहेको संकेत गर्छ । यी दुईबीच अझै दुरी कायमै छ । यसले बजार केही समय थप घट्न सक्ने संकेत गरिरहेको छ । एक महिना अवधिको पीभट विश्लेषणले भने अब बजार बढ्ने क्रममा रहेकाले आगामी एक महिनामा ३ सय ७ मा पहिलो प्रतिरोध र घट्ने क्रममा रहे २ सय ९४ मा टेवा पाउने देखाउँछ । एक महिनामा बैंकको मूल्य १३ रुपैयाँको फरकमा तल–माथि गरिरहेकोले रेन्ज नै कम छ ।

बैंकको सेयर मूल्यले अन्तिम लामो माथिल्लो र तल्लो दुवै धागोसहितको सेतो मैनबत्ती आकृति बनाएको छ । यसले लगानीकर्तामा तीव्र मोलमोलाइ भइरहेको संकेत गर्छ । बैंकको सेयर मूल्यका लागि तीन सयको बिन्दु मनोवैज्ञानिक बिन्दुका रुपमा रहेको समेत यो सेतो मैनबत्ती आकृतिबाट देख्न सकिन्छ । अन्तिम दिन बढ्दा ३ सय ५ रुपैयाँसम्म पुगेको बैंकको सेयर मूल्यले न्यूनत्तम मूल्य २ सय ९६ कायम गरेको थियो ।