२६८ को मूल्य लक्ष्य ताक्दै सिटिजन्स बैंक (समग्र विश्लेषण)

A+ A A-

लाभांश क्षमता १३.३७
१३ करोड राइट ब्याक
सहयोगी विकास प्राप्ति प्रक्रियामा
मूल्यमा ३८.२ प्रतिशत रिट्रेसमेन्ट, सतर्कता आवश्यक

करिब १२ वर्षपहिले २०औं वाणिज्य बैंकका रुपमा सिटिजन्स् बैंक इन्टरनेसनल सञ्चालनमा आएको हो । पाँच वर्षयता बैंकले लगानीकर्तालाई औसत १५.७७ प्रतिशत लाभांश दिएको छ ।
गत आर्थिक वर्षको चौथो त्रैमासमा बैंकको नाफा २० प्रतिशतले बढेर १ अर्ब ४८ करोड रुपैयाँ पुगेकाे छ । १ अर्ब ११ करोड वितरण योग्य पुँजी रहेको बैंक सेयर प्रिमियम रकमसहित करिब १३.३७ प्रतिशत लाभांश दिन सक्ने अवस्थामा छ । हाल ८ अर्ब ३७ करोड चुक्ता पुँजी रहेको बैंक सहयोगी विकास बैंकलाई प्राप्ति गर्ने तयारीमा छ । बैंकको १ बराबर सहयोगीको ०.९ अनुपातमा स्वाप रेसियो हुने प्रारम्भिक सहमति भएको छ । यसो भएमा बैंकको चुक्ता पुँजी ८ अर्ब ८२ करोड पुग्नेछ । स्वाप रेसियोको कारण ५ करोड रुपैयाँ लाभांशका रुपमा बाँड्न निस्कनेछ । स्वापका कारण उब्रिएको रकम बोनस सेयर दिन नै प्रयोग गर्नुपर्ने व्यवस्था छ ।

८ अर्ब ६६ करोड ब्याज आम्दानी गरेको बैंकको ब्याज खर्च नै ५ अर्ब ८४ करोड छ । शुल्क र कमिसनबाट ५० करोड कमाएको बैंकले विदेशी विनिमय र अन्य आम्दानी गरी थप ३० करोड र प्रावधानका रुपमा पहिले राखेको करिब १३ करोड राइट ब्याक गरेको छ ।बैंकको पुँजी कोष पर्याप्तता अनुपात नियमकीय मापदण्ड ११ प्रतिशतभन्दा सहज अवस्थामा छ । यो १३.१९ प्रतिशत छ । बैंकको सञ्चित कोषमा २ अर्ब ७७ करोड रुपैयाँ छ । बैंकलाई तुलनात्मक रुपमा पुँजी महँगो परिरहेको कोष लागतले देखाउँछ । कोष लागत ८.४५ प्रतिशत रहेकोमा बढेर ८.५६ भएको छ । अन्य वाणिज्य बैंकको यस्तो लागत ६ प्रतिशतकाे हाराहारीमा छ ।

खराब कर्जाको दर १.१९ प्रतिशतमा सीमित गरेको बैंकले खराब कर्जाको आधारमा सो कर्जाको १ सय ६८ प्रतिशत रकम राखेको छ । निक्षेप प्राथमिक पुँजीको आधारमा कर्जा लगानी अनुपात ७६.७९ छ । बैंकसँग थप लगानीका लागि सहजता नै छ ।

राष्ट्र बैंकले हालै जारी गरेको मौद्रिक नीतिअनुसार बैंकहरुले एक आर्थिक वर्षमा चुक्ता पुँजीको २५ प्रतिशत ऋणपत्र जारी गर्नैपर्ने व्यवस्था गरेको छ । बैंकले यसअनुसार कुल २ अर्ब ९ करोड रुपैयाँबराबरको ऋणपत्र जारी गर्नुपर्ने हुन्छ ।

बैंकको प्रतिसेयर आम्दानी पनि बढेको छ । १५.३७ प्रतिशतबाट बढेर १७.७९ प्रतिशत, मूल्य आम्दानी अनुपात १२.५९ प्रतिशत र प्रतिसेयर नेटवर्थ १ सय ४८ प्रतिशत छ ।

बैंकको अध्यक्षमा डा. शंकर शर्मा र प्रमुख कार्यकारी अधिकृतमा गणेशराज पोखरेल छन् । बैंकमा सबैभन्दा धेरै सेयर स्वामित्व सिटिजन्स इनभेस्टमेन्ट ट्रस्ट र उर्मिला पाण्डेको छ ।

९ महिनाअघि बैंकले इक्रा नेपालबाट ऋणपत्रका लागि रेटिङ गराएको छ । इक्रा नेपालका अनुसार बैंकका केही पक्षहरु यी हुन् :

सस्तो लागतको निक्षेप २७ प्रतिशत, समग्र क्षेत्रको यस्तो औसत निक्षेप ४१ प्रतिशत छ
उच्च केन्द्रीकरण (प्रमुख २० ग्राहकको निक्षेप हिस्सा ३६ प्रतिशत)
उच्च कोष लागत (८ प्रतिशतमाथि)
खुद ब्याज मार्जिनमा दबाब (दुई वर्षयता २.९१ प्रतिशत)
तुलनात्मक जोखिमका क्षेत्र घरजग्गा, सवारी कर्जा र सेयर कर्जामा २५ प्रतिशत लगानी
पछिल्लो समय मध्यम बर्ग कर्जामा केन्द्रित
खराब कर्जा दर क्षेत्रगत भन्दा तल
भाका नाघेको ऋण ७ प्रतिशत बराबर

मूल्य २ सय ३७ लक्ष्य पछ्याउँदै

बैंकले एक वर्षको अवधिकाे सुरूमै उच्च मूल्य (२६८ रुपैयाँ) कायम गरेको थियो । त्यसयता २ सयसम्म पुगेर फर्किएको सेयर मूल्यले त्यसअघि नै २ सय ३७ आसपासमा पुगेर प्रतिरोध पाइरहेको छ । हाल मूल्य २ सय २६ छ । बैंकको मूल्यले यो उचाइबाट घटेर बढ्ने क्रममा हाल ३८.२ प्रतिशत रिट्रेसमेन्ट गरेको छ । यो रिट्रेसमेन्ट बिन्दुमा उच्च प्रतिरोधसमेत रहने तर यो प्रतिरोध कटेमा केही समय मूल्य बढ्ने विश्लेषण गरिन्छ ।

कारोबारको सन्तुलित क्षेत्रमा रहेको सेयर मूल्य यही क्षेत्रमा रहेर घटबढ भइरहेको छ । १४ दिने आरएसआई सूचकको स्केल ५७.१४ मा आएको छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।केही समयअघि सम्पिल मुभिङ एभरेज रेखा क्रमओभर भएको छ । ७ दिने रेखाले २१ दिने रेखालाई काटेर माथि लागेको छ । मूल्य बुलिस प्रवृत्तिमै रहेको यसले संकेत गर्छ । पीभट विश्लेषणले भने अब बजार बढ्ने क्रममा नै रहे एक महिनामा २ सय ३८ मा पहिलो प्रतिरोध र घट्ने क्रममा रहे २ सय २० मा पहिलो टेवा पाउने देखाउँछ । बैंकको सेयर मूल्यले अन्तिम तीन दिनमा पहिलो दुई दिन इन्गल्फिङ बुलिस आकृति बनाएको छ । यसमा पछिल्लो सेतो मैनबत्तीले अघिल्लो कालो मैनबत्तीको शरीरलाई ढाकेको छ । यो मूल्य बढ्ने संकेत भए पनि दरिलो भने होइन । अन्तिम दिन बनेको सेतो मैनबत्तीको अन्तिम मूल्य त्यस अघिल्लो दिनको मैनबत्तीभन्दा माथि नगएकोले मूल्य बढ्ने सम्भावनामा अन्योल छ । अन्तिम दिनको मैनबत्तीको तल्लो धागो लामो भएकोले लगानीकर्ताले सो दिन २ सय २३ रुपैयाँसम्ममा सेयर पाए पनि कारोबारको अन्त्यमा मूल्य बढेकोले त्यो मूल्यमा बिक्रीकर्ताहरु तयार नभएको देखिन्छ । बनेको प्रवृत्तिले बढ्ने वा घट्ने स्पष्ट संकेत गरिरहेको छैन त्यसैले आगामी दिनको करोबार हेरेरै निर्णय लिनु सही हुन्छ ।