सन्तुलित सेयर कारोबार क्षेत्रमा हिमालयन बैंक (समग्र विश्लेषणसहित)

A+ A A-

२६ वर्षपहिले सञ्चालनमा आएको हिमालन बैंकले चालू आवको तेस्रो त्रैमासमा मात्रै २ अर्ब १ करोड रुपैयाँ कमाएको छ । बैंकको चौथो त्रैमासिक वित्तीय विवरण सार्वजनिक हुन बाँकी छ । नाफा १०.२ प्रतिशतले बढी हो ।

बैंकले हालसम्मको नाफाको आधारमा लगानीकर्तालाई १ अर्ब ३३ करोड रुपैयाँ वितरण गर्न सक्छ । यो भनेको चुक्ता पुँजीको आधारमा १५.६६ प्रतिशत हो । आव अन्त्यमा यो दर बढ्न सक्छ ।

विगत पाँच वर्षमा बैंकले वार्षिक औसत २७.३६ प्रतिशत लाभांश बाँडेको छ । गत आवमा नाफापछि बाँडेको लाभांश नै पाँच वर्षयताको सबैभन्दा कम लाभांश दर हो । बैंकले करिब १६ प्रतिशत लाभांश बाँडेको छ ।

बैंकको सञ्चित कोषमा ५ अर्ब रुपैयाँ रकम छ । समग्र वाणिज्य बैंक क्षेत्रमा निक्षेप, कर्जा र ब्याज आम्दानीको आधारमा यो बैंक ८ देखि ९ को स्थानमा छ । सस्तो पुँजी (साधारण बचत र चालू खाता) रहेको बैंकमध्ये पनि यो बैंक ८औं स्थानमा छ । अहिले भने बैंकलाई पुँजी केही महँगो पर्न थालेको कोष लागतमा भएको सामान्य वृद्धिले देखाउँछ । कोष लागत ६.०८ प्रतिशतबाट बढेर ६.६८ पुगेको छ । यद्यपि, ८ अर्ब ५५ करोड ब्याज आम्दानी गरेको बैंकको खुद ब्याज आम्दानीमा पनि १७ प्रतिशतले वृद्धि भएर ३ अर्ब ७५ करोड पुगेको छ । खराब कर्जाको दरमा सीमान्त दरमा वृद्धि भए पनि कर्जा नोक्सानको सम्भावनाको आधारमा राखिएको प्रावधान रकम घटेको छ ।

निक्षेप प्राथमिक पुँजीको आधारमा कर्जा लगानी अनुपात ७९ पुगेको छ । बैंकसँग थप लगानीका लागि कम मार्जिन छ । तर, बैंकले ३ अर्ब रुपैयाँको बन्ड जारी गरिरहेकोले यसले कर्जा लगानीका लागि थप स्पेस बनाउनेछ ।

बैंकको प्रतिसेयर आम्दानी ३१.५ प्रतिशत, मूल्य आम्दानी अनुपात १५.५४ प्रतिशत र प्रतिसेयर नेटवर्थ १ सय ७९ प्रतिशत छ । बैंकको अध्यक्षमा मनोजबहादुर श्रेष्ठ छन् भने प्रमुख कार्यकारी अधिकृतमा अशोक राणा छन् ।

६ करोड रुपैयाँको सेयर पुँजीसहित सुरुवाती अवधिदेखिको वैदेशिक साझेदार हबिब बैंक पाकिस्तान बाहिरिने खबर आइरहेको छ । हालसम्म भने अहिलेको संस्थापक सेयरको बजार मूल्य (४२५ रुपैयाँ) मा बिक्री गरेर बाहिरिए २० प्रतिशत सेयर रहेको हबिबले ७ अर्ब २४ करोड रुपैयाँ लैजानेछ । बेलायती वित्तीय संस्था कमन वेल्थ डेभलपमेन्ट कर्पोरेसनले हबिबको स्वामित्वमा रहेको सेयर किन्ने भएको छ । आगामी दसैंअगावै कमनवेल्थ भित्रने तयारी भइरहेको छ । लामो समयदेखिको वैदेशिक साझेदार बाहिरिए पनि हाल बैंक मजबुत अवस्थामा छ । त्यसमाथि कमनवेल्थको आगमनले बैंक थप बलियो हुने अपेक्षा गरिएको छ ।

हालै ऋणपत्र जारी गर्नुअघि बैंकले केयर रेटिङबाट रेटिङसमेत गरेको छ । केयर रेटिङका अनुसार बैंकका केही सकारात्मक पक्ष यी हुन् ः

वैदेशिक लगानी (हबिब बैंक)
सर्वसाधारण
अन्य संस्था
पर्याप्त पुँजी अनुपात
मननयोग्य वृद्धि

ऋण विविधीकरण, उत्पादनमूलक क्षेत्रमा ३७ प्रतिशत, होलसेल क्षेत्रमा १७ प्रतिशतसहित गैरखाद्य उत्पादन क्षेत्रमा कुल २३ प्रतिशत लगानी
सुविधाजनक अवस्थामा कम लागत पुँजी ४४.७५ प्रतिशत

नकारात्मक पक्ष यी हुन् :

सम्रग बैंकिङ क्षेत्रको भन्दा सम्पत्तिको गुणस्तर दर उच्च भए पनि यो सूचक मध्यम
कर्पोरेट लगानी उच्च ७५.६८ प्रतिशत, एसएमईसहित रिटेलमा लगानी घटेर १९.९७ प्रतिशतमा सीमित
यो क्षेत्रमा उच्च प्रतिस्पर्धा र बढ्दो नियमकीय जोखिम

माग र आपूर्ति सन्तुलित

बैंकको सेयर मूल्य केही साताअघि मात्रै सन्तुलिन क्षेत्रमा आएको १४ दिने आरएसआई सूचकले देखाइरहेको छ ।

आरएसआईको स्केल ५६ मा आएको छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

केही महिनाअघि सम्पिल मुभिङ एभरेज रेखा क्रस ओभर भएको देखिएको थियो र सँगै बियरिस प्रवृत्ति लागेको थियो । अहिले पुनः क्रस ओभरको सम्भावना देखिएको छ । ७ दिने रेखाले २१ दिने रेखालाई काटेर माथि लाग्ने प्रयास गरेको छ । तर, यसलाई याद गर्नुपर्ने अवस्था भने छ । यसो भएमा मूल्य केही समय बढ्नेछ । पीभट विश्लेषणले भने अब बजार बढ्ने क्रममा नै रहे ५ सय ७३ मा पहिलो प्रतिरोध र घट्ने क्रममा रहे ५ सय ३९ मा टेवा पाउने देखाउँछ ।

बैंकको सेयर मूल्यले अन्तिम दुई दिनमा पहिलो दिनको सुरु र दोस्रो दिनको बन्द मूल्य समान छ । त्यसभन्दा अघि समेत लामो कालो मैनबत्ती बनेको छ । सेतो मैनबत्ती कालो मैनबत्तीको शरीरभित्र नै सीमित भएको छ भने अन्तिम दिनको कालो मैनबत्तीसमेत अघिल्लो दिनको सेतो मैनबत्तीको शरीरभित्रै त्यही सीमित छ । यसले बजार बढ्ने संकेत देखाए पनि ढुक्क हुन नसकिने देखाइरहेको छ । कारोबारका लागि आगामी दिनको मूल्य परिवर्तन हेर्नु सही हुन्छ ।