गुडविल फाइनान्सः बुलिश प्रबृत्तिमा जाने प्रयासमा (प्रविधिक विश्लेषणसहित)

A+ A A-

२४ वर्षदेखि सञ्चालनमा रहेको गुडविल फाइनान्स कम्पनीले चालु आवको तेस्रो त्रैमाशमा ३ करोड १४ लाख नाफा कमाएको छ । नाफामा १६ प्रतिशतले वृद्धि भएको हो ।

राष्ट्रियस्तरको यस फाइनान्सका ठूला सेयरधनमा जोशी र श्रेष्ठ समूह रहेको छ । कम्पनीको प्रमुख सेयर लगानीकर्तामा पुराना सेयर ब्रोकरदेखि कम्पनीका प्रमुख कार्यकारी अधिकृतसम्म छन् । सञ्चालक समितिमा सेयर विश्लेषक रुपमा चिनिन थालेका व्यक्ति समेत छन् ।

बार्षिक औसत १३ प्रतिशतको दरमा लाभांश दिइरहेको कम्पनीको चुक्ता पुँजी वृद्धिसँगै लाभांश क्षमता भने केही कम भएको छ । गत आवमा कम्पनीले ५.२६ प्रतिशत नगद लाभांश मात्र दिएको थियो । तेस्रो त्रैमाशको नाफा अनुसार कम्पनीले ३.१४ प्रतिशत लाभांश दिने सक्ने सम्भावना छ ।

कम्पनीले कमाएको नाफाको २० प्रतिशत सञ्चितीमा राखेपछि बच्ने रकमको आधारमा लाभांश दर निकालिएको हो । कम्पनीको सञ्चितीमा बाड्न योग्य थप रकम भए र आव अन्त्यमा बढ्न सक्ने नाफाले भने यो दरमा फरक पर्न सक्छ ।

चुक्ता पुँजी ८० करोड पु¥याउन बोनस र हकप्रदमा जोड दिएको कम्पनीको जगेडा कोषमा १५ करोड ६१ लाख रुपैयाँ छ । कम्पनीको प्रोभिजनिङ बढ्दा सञ्चालन नाफामा भने असर देखिएको छ । तर, पोभिजनिङ बृद्धिले कम्पनीलाई नोक्सानी गर्दैन । तत्काल नाफा मात्रै घट्ने हो । खराब अवस्थामा पुगेको कर्जा असुल भएपछि प्रोभिजनिङको रकम राइटब्याक गर्न पाइन्छ ।

खुद व्याज आम्दानी ७७ प्रतिशतले बढेको कम्पनीको साढेचार गुणाले प्रोभिजनिङ बढ्दा सञ्चालन नाफा घटेको हो । कम्पनीको नाफा बढ्न राइट व्याकले मदत पुगेको छ । अघिल्लो पटक प्राभिजनिङको लागि राखेको २ करोड फिर्ता ल्याएपछि नाफा बढ्न सहयोग पुगेको हो ।

प्राभिजनिङ बढेपनि कम्पनीको खराब कर्जा अनुपात भने घटेको छ । कम्पनीले सबै पुँजी लगानी गरेको छैन । कम्पनीको कर्जा निक्षेप अनुपात ७१ प्रतिशत मात्र छ । लगानी थप बढाउन सकेमा थप आम्दानी गर्न सकिने अवस्था छ । व्याज आम्दानीबाट उच्च कमाई देखिएपनि पुँजी लागत पनि उच्च नै छ । यद्यपि अघिल्लो पटकभन्दा लागत केही घटेको छ ।

कम्पनी आवधिक कर्जामा बढि केन्द्रीत छ । कुल कर्जाको ४७ प्रतिशत लगानी यस्तो कर्जामा गरेको छ । कम्पनीले आवास बाहेक घरजग्गा कर्जामा कुल कर्जाको ४.२२ प्रतिशत र मार्जिन कर्जा (सेयर धितोमा कर्जामा ) ३ प्रतिशत लगानी गरेको छ । कम्पनीको निक्षेप संकलन र कर्जा लगानीमा उच्च वृद्धि छ । यी दुवैमा ३० प्रतिशत माथिको वृद्धि छ ।

कम्पनीको प्रतिसेयर आम्दानी ५ रुपैयाँ २५ पैसा र प्रतिसेयर नेटवर्थ १ सय १९ रुपैयाँ छ । मूल्य आम्दानी अनुपात २३ प्रतिशत छ । लगानीकर्ताहरुले सेयरलाई राम्रै मूल्य दिइरहेको यसले देखाउँछ । यो दर २० भन्दा माथि ३० सम्म हुनु राम्रो मानिन्छ ।

अलमलमा लगानीकर्ता

कम्पनी सेयर मूल्य करीब एक वर्ष यताकै उच्च (१ सय ३८ रुपैयाँ) मा प्रतिरोध पाएर घट्न थालेको छ । कम्पनीको मूल्यमा उच्च उतारचढाव छ । तर, रेञ्ज कम भएकोले जोखिम धेरै छैन । एक वर्षमा कम्पनीको मूल्य मात्रै २७ रुपैयाँ अन्तरमा रहेर घटबढ भइरहेको छ । मूल्य अन्तर निकै कममा रहेर कारोबार भइरहेको कम्पनीको सेयरमा ठूलो लाभ या हानी भने देखिदैन ।

७ दिने सिम्पल मुभिङ एभरेजले २१ दिने रेखालाई भर्खरै मात्र काटेर माथि लागेको छ । यसले मूल्य केही सयम बुलिश प्रवृत्तिमा जाने दरिलो सम्भावना देखाएको छ । पीभट विश्लेषणले भने अब बजार बढ्ने क्रममा रहे आगामी एक महिनामा कम्पनीको सेयरले १ सय ३६ मा पहिलो प्रतिरोध र घट्ने क्रममा रहे १ सय २९ मा टेवा पाउने देखाउँछ ।

बैंकको सेयर कारोबार सन्तुलित रहेको १४ दिने आरएसआई सुचकले संकेत गर्छ । यो ७० र ३० स्केल बीचमा नै तलमाथि गरिरहेको छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमार ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

कम्पनीको मैनवत्ति चित्रले कम्पनीको मूल्यको दिशा स्पष्ट नभएको संकेत गर्छ । कुनै निश्चित आकृति बनेको छैन । शरीर नभएको तर धागो सहितमा डोजी आकृति बनेका छन । अन्तिम दिन तल्लो धागो लामो भएको डोजी बनेको छ । यसले मूल्य घट्न रोकिने सम्भावना देखाइरहेको छ । तर, यो निकै कमजोर संकेत हो । आगामी दिनको कारोबार हेरेर मात्र लगानी गर्नु सही हुने मैनवत्ति चित्र विश्लेषणले देखाउँछ ।