सिद्धार्थ बैंकः नाफा सवा २ अर्ब, प्रतिफल बढीमा २० प्रतिशत (समग्र विश्लेषण)

A+ A A-

लाभांश क्षमता १९.९६ प्रतिशत
बैंकमा केडिया, अग्रवाल र तोदी समूहको पकड
मूल्य बढ्ने सम्भावना तर पर्ख र हेरको अवस्था
राष्ट्र बैंकका नयाँ प्रावधानहरुको प्रभाव सम्भावना

मंसिर २०५९ बाट सञ्चालनमा आएको सिद्धार्थ बैंकले गत आर्थिक वर्षको चौथो त्रैमासमा २ अर्ब ३० करोड रुपैयाँ कमाएको छ । अघिल्लो वर्षको तुलनामा बैंकको नाफा २१.४४ प्रतिशतले बढेको हो ।

५ वर्षमा औसत २२ प्रतिशतको लाभांश बाडेको सिद्धार्थले गत आवमा नाफा पछि १८.५८ प्रतिशत लाभांश बाँड्न सक्ने देखिन्छ । बैंकले नाफाको आधारमा लगानीकर्तालाई १ अर्ब ६५ करोड रुपैयाँ वितरण गर्न सक्ने उल्लेख छ । बैंकमा १२ करोड २० लाख रुपैयाँ सेयर प्रिमियमका रुपमा रहेकोले सोसमेत कुल १९.९६ प्रतिशत लाभांश यस वर्ष पनि दिन सक्छ ।

बैंकको खुद ब्याज आम्दानी, फि र कमिसन शुल्कबाट भएको आम्दानी, अन्य आम्दानीमा वृद्धि भएकोले नाफा वृद्धिमा सहयोग पुगेको हो । बैंकको व्यवस्थापन खर्च पनि करिब ५६ प्रतिशतले बढेर १ अर्ब ६९ करोड रुपैयाँ पुगेको छ ।

बैंकको पुँजी कोष पर्याप्तता अनुपात १२.५६ प्रतिशत रहेकोले नियामकीय प्रावधान (११ प्रतिशत) हाराहारी आइसकेको छ । नेपाल राष्ट्र बैंकले आगामी दिनमा बासेल थ्रीअन्तर्गत क्यापिटल कन्जरभेसन बफरमा केही वृद्धि र काउन्टर साइक्लिकल बफर लागू गराउन लागेको छ । यसो भएमा बैंकहरुले कुशनका रुपमा थप १.५० प्रतिशत रकम राख्नुपर्ने हुन्छ । पुँजी कोष पर्याप्तता बढाउनुपर्ने हुन्छ ।

यही कारण सिद्धार्थले पनि लाभांशका रुपमा बोनस सेयर वितरण गरेर पुँजी बैंकबाट बाहिरिनबाट रोक्न सक्छ । कुशनका लागि यी प्रावधान ल्याए पनि सीसीडी अनुपात पनि कायम राखिएको, यसै वर्षबाट अनिवार्य ऋणपत्र जारी गर्नुपर्ने व्यवस्था ल्याएको र सीसीडी गणनामा अन्तरबैंक कारोबार हटाउन लागिएकोले समग्र बैंकहरुको नाफामा २५ प्रतिशतसम्म प्रभाव पर्ने अनुमान गरिएको छ । यसैले राष्ट्र बैंकसँग बैंकहरु छलफल गरिरहेका छन् । यसले बैंकिङ क्षेत्रका कम्पनीहरुको मूल्यमा समेत केही समय प्रभाव पार्न सक्छ । राष्ट्र बैंकले कस्तो नीति लिन्छ, त्यसमा यी कुरा भर पर्नेछ ।

सिद्धार्थ बैंकको निक्षेप र प्राथमिक पुँजीको आधारमा जारी भएको कर्जाको अनुपात ७६.८५ प्रतिशत छ । बैंकले थप कर्जा लगानी गर्न सक्ने अवस्था कम हुँदै गएको छ ।

बैंकको सञ्चित कोषमा ४ अर्ब ४१ करोड रुपैयाँ रकम छ । पुँजी कोष लागत सामान्य घटेर ७.५४ मा सीमित भएको छ । यद्यपि, १२ अर्ब ९७ करोड ब्याज आम्दानी गरेको बैंकको ब्याज खर्च ८ अर्ब ३० करोड छ । बैंकले खराब कर्जाको आधारमा सो कर्जाको २ सय ७ प्रतिशत रकम राखेको छ । बैंकले प्रावधान रकम १८ करोड छ ।

बैंकको प्रतिसेयर आम्दानी २६.५९ रुपैयाँ, मूल्य आम्दानी अनुपात ११.९६ गुणा र प्रतिसेयर नेटवर्थ १ सय ६९ रुपैयाँ छ ।

बैंकमा केडिया समूह, अग्रवाल समूह र तोदी समूहको बाहुल्य छ । बैंकको अध्यक्षमा केडिया समूहबाट मनोजकुमार केडियाले प्रतिनिधित्व गरिरहेका छन् भने शम्भुनाथ गौतम प्रमुख कार्यकारी अधिकृत छन् । यी तीन समूहको बैंकमा करिब २३ प्रतिशत प्रत्यक्ष लगानी छ ।

इक्रा नेपालले हालै मात्र बैंकको ऋणपत्रको रेटिङ गरेको छ । बैंकले २ अर्ब ५० करोड रुपैयाँको ऋणपत्र जारी गर्न लागेको हो । बैंकको विश्लेषणको क्रममा इक्राले केही सकारात्मक र नकारात्मक पक्षहरु उल्लेख गरेको छ ।

– निक्षेपको आधार कमजोर (बैंकिङ क्षेत्रको चालू र बचत खाताको निक्षेपको हिस्सा ४१ प्रतिशत रहेकोमा सिद्धार्थको ३७ प्रतिशत )
– लागत उच्च (७.६९ प्रतिशत)
– हालसम्मको व्यवस्थाअनुसार पुँजी कोष पर्याप्तता अनुपात सुविधाजनक
– शाखा बिस्तारसँगै कर्जा लगानीमा वृद्धि
– ६३ प्रतिशत कर्पोरेट कर्जा, २८ प्रतिशत खुद्रा कर्जा र ९ प्रतिशत साना तथा मझौला क्षेत्रमा कर्जा लगानी
– संवेदनशील क्षेत्रमा कर्जा लगानी १९ प्रतिशत (समग्र क्षेत्रको १३ प्रतिशत)
– खराब कर्जामा सुधार
– तीन वर्षयता खुद ब्याज मार्जिन ३.३ देखि ३.५ प्रतिशत

पर्ख र हेरको अवस्था
बैंकको सेयर अधिक बिक्री क्षेत्रको नजिक पुगेर पुनः बढ्ने क्रममा छ । दुई वर्षयता पटक–पटक ३ सय ५० देखि ३ सय ७० मा प्रतिरोध सामना गरेको मूल्यले अहिले पनि त्यही प्रतिरोध सामना गरेर ओर्लिएको हो ।

बैंकको मूल्य सन्तुलित क्षेत्रभित्रै बढ्ने प्रयासमा रहेको १४ दिने आरएसआई स्केलको ४० मा आएको छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमार ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

सम्पिल मुभिङ एभरेज रेखामा हालै मात्र क्रसओभर भएको छ । ७ दिने रेखाले २१ दिनेलाई काटेर माथि रहेकोले मूल्य बुलिस प्रवृत्तिमा आएको संकेत गरिरहेको छ । मूल्य केही समय बढ्ने संकेत यसले गर्छ । यद्यपि, सिद्धार्थ बैंकको हकमा यसको मूल्यमा चाँडोचाँडो क्रस ओभर भइरहेकोले यी दुई रेखालाई निगरानी गर्नुपर्ने देखिएको छ ।

पिभट विश्लेषणले भने अब बजार बढ्ने क्रममा रहे एक महिनामा ३ सय २८ मा पहिलो प्रतिरोध र घट्ने क्रममा रहे ३ सय १४ मा पहिलो टेवा पाउने देखाउँछ ।

बैंकको सेयर मूल्यले अन्तिम दुई दिनमा इनगल्फिङ बुलिस आकृति बनाएको छ । यसमा पहिलो दिनको कालो मैनबत्ती बनेको छ भने दोस्रो दिन सेतो । दोस्रो दिन बनेको सेतो मैनबत्तीको शरीरले पहिलो दिनको मैनबत्तीको पुरै शरीर ढाकेको छ । यसले मूल्यमा प्रवृत्ति परिवर्तनको संकेत गर्छ । यो संकेत मध्यम मानिन्छ ।

नोट: बजार जोखिममा आधारित हुन्छ । लगानी गर्दा रणनीतिअनुसार बजारको परिवेशको स्वमूल्यांकन गर्नु उचित हुन्छ ।

अन्य कम्पनीको विश्लेषण