लक्ष्मी बैंकः ३३ प्रतिशत नाफा बढाएको बैंकको सेयरमा लगानी गर्दा के होला ? (समग्र विश्लेषण)

लक्ष्मी बैंकः ३३ प्रतिशत नाफा बढाएको बैंकको सेयरमा लगानी गर्दा के होला ? (समग्र विश्लेषण)

A+ A A-

३३ प्रतिशतले नाफा बढ्यो
१३ प्रतिशत लाभांश क्षमता
खेतान र संघाईको वर्चस्व
मूल्य वियरिश, निगरानी आवश्यक

२१ चैत २०५८ बाट सञ्चालनमा आएको लक्ष्मी बैंक दोस्रो पुस्ताको बैंक हो । पछिल्लो समय बैंक आक्रामक रूपमा शाखा विस्तारमा लागेको छ । लक्ष्मीले गत आर्थिक वर्षको चौथो त्रैमासमा भने १ अर्ब ५७ करोड रुपैयाँ नाफा गरेको छ । बैंकको नाफा अघिल्लो आर्थिक वर्षको तुलनामा ३३.४३ प्रतिशतले बढेको छ ।

आर्थिक वर्ष २०७१/०७२ मा लाभांश नदिएको लक्ष्मी बैंकले सत करिब १३.५१ प्रतिशतको लाभांश बाँड्न सक्ने देखिन्छ । बैंकले नाफाका आधारमा लगानीकर्तालाई १ अर्ब १५ करोड रुपैयाँ वितरण गर्न सक्ने उल्लेख गरेको छ ।

बैंकको खुद ब्याज आम्दानी ३० प्रतिशतले बढेको छ । सञ्चालन नाफा भने ३६ प्रतिशतले बढेको छ । बैंकको पुँजी कोष पर्याप्तता अनुपात ११.३३ प्रतिशत रहेकाले हालको नियामकीय प्रावधान (११ प्रतिशत) नजिक छ । ऋणपत्र जारीपछि यसमा केही सहज हुनेछ भने बैंकले लाभांशबाट बोनस सेयर दिन सक्ने सम्भावनासमेत छ ।

बैंकको निक्षेप र प्राथमिक पुँजीका आधारमा जारी भएको कर्जाको अनुपात ७७.१३ प्रतिशत छ । बैंकलाई थप कर्जा लागनी गर्न पुँजी कम हुँदै गएको देखिन्छ ।

बैंकको सञ्चित कोषमा २ अर्ब १६ करोड रुपैयाँ रकम छ । बैंक पुँजी कोष लागत सामान्य घटेर ७.०१ मा सिमित भएको छ । समग्रमा यो उच्च नै छ । लक्ष्मीको ८ अर्ब ८१ करोड ब्याज आम्दानी छ भने व्याज खर्च ५ अर्ब रुपैयाँ छ ।

लक्ष्मीले खराब कर्जाका आधारमा सो कर्जाको १ सय ५२ प्रतिशत रकम राखेको छ । बैकले प्रावधान रकम १३ करोड छ । यसअघि ३१ करोड रुपैयाँ प्रावधान राखेकोमा यसमा केही कटौती हुँदासमेत नाफा बढ्न केही सहयोग पुगेको छ ।

बैंकको प्रतिसेयर आम्दानी १७.६७ रुपैयाँ, मूल्य आम्दानी अनुपात १२.७९ गुणा र प्रतिसेयर नेटवर्थ १ सय ४१ रुपैयाँ छ ।

इक्रा नेपालले करिब ४ महिनाअघि बैंकको निष्कासनका क्रममा रहेको ऋणपत्रलाई रकम फिर्ता गर्न सक्ने क्षमताका आधारमा हेरिएको सुरक्षा सूचकमा मध्यम मानिएको छ । बैंकले १० प्रतिशत व्याजदर दिने गरी २ अर्ब रुपैयाँ बराबरको ऋणपत्र जारी गर्ने तयारी गरिरहेको छ ।

पछिल्लो समय शाखा विस्तारमा आक्रामक देखिएको लक्ष्मीको तीन वर्षयता समष्टिगत लगानी वृद्धि समग्रमा २५ प्रतिशतको दरमा छ ।

संस्थागत कर्जामा उच्च वृद्धि (हिस्सा ५९ प्रतिशत), प्रतिलब्धि (प्रतिफल) दर समग्र क्षेत्रभन्दा केही कम (१२.१४ प्रतिशत) तथा कुसनको रूपमा रहेको पुँजी अनुपात घट्दो क्रममा रहेको तथ्यांकले देखाएको छ ।

बैंकमा अजयविक्रम शाह प्रमुख कार्यकारी अधिकृत छन् भने शम्भुप्रसाद आचार्य अध्यक्ष रहँदै आएकोमा बैंकको आधिकारिक वेबसाइटमा अध्यक्ष नै उल्लेख गरिएको छैन । बैंकमा खेतान र संघाई समूहको लगानी छ । नागरिक लगानी कोषको ८.६८ प्रतिशत लगानी रहेको बैंकमा संस्थापकहरूबाट ६४ प्रतिशत र सर्वसाधारणबाट ३६ प्रतिशत लगानी छ ।

मूल्य वियरिश

एक वर्षअगाडि सुरू दिनमै उच्च विन्दु २ सय ६५ रुपैयाँमा पुगेको बैंकको सेयर मूल्य त्यसता सो तहमा पुग्न सकेको छैन । बैंकले हाल ४१ प्रतिशत रिट्रेस गरेको छ । बैंकको सेयर कारोबार सन्तुलित रहेको १४ दिने आरएसआईले देखाएको छ । हाल यो स्केलको ५५.८८ मा आएको छ । ६० सम्म पुगेर यो घटेको हो । आरएसआई स्केल ३० भन्दा मुनि भए सेयर अधिक विक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

सिम्पल मुभिङ एभरेज रेखामा २१ दिने रेखा र ७ दिने रेखा एक आपसमा जोडिएका छन् । २१ दिने रेखा माथि लागेका मूल्य बियरिश र ७ दिने रेखा माथि लागेमा मूल्य बुलिश प्रवृत्तिमा जानेछ ।

पीभट विश्लेषणले भने अब बजार घट्ने क्रममा रहे एक महिनामा २ सय २१ मा पहिलो प्रतिरोध र बढ्ने क्रममा रहे २ सय १० मा पहिलो टेवा पाउने देखाउँछ ।

बढ्ने प्रयासमा रहेको बैंकको सेयर मूल्यले अन्तिम दुई दिनमा डार्क क्लाउड कभर वियरिश आकृति बनाएको छ । यसमा पहिलो दिन सेतो लामो मैनबत्ती आकृति र दोस्रो दिन कालो लामो मैनबत्ती छ । सेतो लामो मैनबत्तीभन्दा माथि बजारमा कारोबार सुरू भएर मूल्य घट्ने क्रममा सो मैनबत्तीको मध्य भागसम्म आइपुगेर कालो मैनबत्ती बनेको छ । यसले मूल्य वियरिश प्रवृत्तिमा जाने सम्भावनालाई देखाउँछ ।

नोट: बजार जोखिममा आधारित हुन्छ । लगानी गर्दा रणनीतिअनुसार बजारको परिवेशको स्वमूल्यांकन गर्नु उचित हुन्छ ।

अन्य कम्पनीको विश्लेषण