प्रतिसेयर आम्दानी ४५ रुपैयाँ रहेको शिखरको सेयर किन अवमूल्यन ? (समग्र विश्लेषण)

प्रतिसेयर आम्दानी ४५ रुपैयाँ रहेको शिखरको सेयर किन अवमूल्यन ? (समग्र विश्लेषण)

A+ A A-

१८.४६ प्रतिशतले नाफा वृद्धि
४ वर्षमा औसत २८ प्रतिशत प्रतिफल
बीमा शुल्कको मुख्य स्रोत मोटर र अग्नि बीमा
एक वर्षयताकै न्युन विन्दुबाट मूल्य बढ्ने क्रममा

१५औं निर्जीवन कम्पनीको रुपमा आएको शिखर इन्स्योरेन्स कम्पनीले सञ्चालनमा आएको पनि १५ वर्ष पार गरेको छ । यस क्षेत्रको अब्बल कम्पनीको रुपमा दरिदै आएको शिखरको गत आवको चौथो त्रैमाशमा पनि १८.४६ प्रतिशतले नाफा वृद्धि गरेर ४७ करोड रुपैयाँ पुगेको छ ।

३ अर्ब २९ करोड रुपैयाँ आम्दानी गरेको शिखरले २ अर्ब ६५ करोड रुपैयाँ खर्च गरेसँगै नाफा नोक्सान हिसाबमा ६४ करोड रुपैयाँ सारेको छ । लगानी तथा अन्य आयबाट १३ करोड ८२ लाख रुपैयाँ र पहिले गरेको व्यवस्थाबाट ८० लाख फिर्ता ल्याएसँगै ७८ करोड रुपैयाँ आम्दानी गरेको छ । व्यवस्था र खर्चमा गएको ३१ करोड पछि ४७ करोड रुपैयाँ नाफा भएको हो । योसंगै बीमा कोष २७ प्रतिशतले वृद्धि भएर १ अर्ब ५ करोड रुपैयाँ पुगेको छ ।

शिखरले बिगत ४ वर्षमा सेयर लगानीकर्ताहरुलाई औसत २८ प्रतिशतको दरमा लाभांश दिएको छ । आव २०७४/७५ मा कम्पनीले लाभांश घोषणा गरेन । कम्पनीले गत आवको सभाबाट ०७४/०७५ को ३० प्रतिशत हकप्रदको प्रस्ताव पारित गरेको छ । हकप्रद जारीपछि पुँजी १ अर्ब ३७ करोड पुग्नेछ ।

ढिलो साधारणसभा गर्ने, समयमा नै लाभांश घोषणा नगर्ने प्रवृत्ति कै कारण पछिल्लो समय बीमा कम्पनीहरुप्रति लगानीकर्ताहरुको विश्वास घट्न थालेको छ । कुनै समय हकप्रदकै कारणसमेत सेयर मूल्य बढि तिर्न चाहने लगानीकर्ताहरु अहिले भने चुक्तापुँजी वृद्धि पछि घट्न सक्ने प्रतिफललाई लिएर चिन्तित हुन थालेका छन् ।

कम्पनीको महाविपत्ती कोषमा ७ करोड रुपैयाँ छ । यो कोष जति वृद्धि हुँदै गयो, कम्पनीबाट पुनरबीमाको नाममा बाहिरिने रकममा कटौति गर्न थप सहयोग पुग्दै जानेछ । कम्पनीसँग आफैले दायित्व लिन सक्ने (बीमा शुल्क रिटेन गर्ने) क्षमता बढ्दै जान्छ । तर, कम्पनीको यस्तो कोष बढ्न सकेको छैन् । २०७२ को भूकम्प पछि यो बीमा क्षेत्रमा ठूलो दाबी परेको थियो । त्यसैले पनि निर्जीवन बीमा कम्पनीहरुको यस्तो कोषको अझ बढि महत्व हुन्छ ।

शिखरले ३ अर्ब ५१ करोड रुपैयाँ कुल बीमा शुल्क आर्जन गरेको छ । ३ लाख बढि बीमालेख जारी गरेको छ । हालसम्म १६ हजार ६ सय ३५ बीमालेखको दाबी भुक्तानी गरेको छ । यसमार्फत कम्पनीबाट १ अर्ब ८५ करोड ग्राहकले लगिसकेका छन् । कम्पनीमा परेका दाबी मध्ये भुक्तानी हुन बाँकी ८१ करोड १६ लाख रुपैयाँ बराबरको छ ।

२०७३/७४ को कम्पनीको बार्षिक विवरण अनुसार उसको बीमा शुल्कको मुख्य स्रोत मोटर बीमा, अग्नि बीमा लगायत रहेको छ । करिब ५२ प्रतिशत मोटर बीमा, १६ प्रतिशत अग्नि बीमा, विविध बीमा १० प्रतिशत र सामुन्द्रिक बीमाको हिस्सा ६ प्रतिशत छ । कुल बीमा शुल्कको ४८ प्रतिशत रकम पुनरबीमामा खर्च हुने गरेको छ ।

शिखरको प्रतिसेयर आम्दानी ४४ रुपैयाँ ७३ पैसा छ । मूल्य आम्दानी अनुपात १७ छ । यसले कम्पनीले कमाएको एक रुपैयाँलाई लगानीकर्ताहरुले १७ रुपैयाँसम्म तिरेको भन्ने अर्थ लाग्छ । यो दर २० देखि ३० सम्म हुनु उचित मानिन्छ । सेयर अवमूल्यन भएको यसले संकेत गर्छ ।

हाल कम्पनीको प्रमुख कार्यकारी अधिकृतमा दिपप्रकाश पाण्डे छन् । कम्पनीको अध्यक्षता राजेन्द्र प्रसाद श्रेष्ठले गरिरहेका छन् । २०७३/७४ को बार्षिक विवरण अनुसार कम्पनीमा गौरव अग्रवालको सबैभन्दा धेरै (१३ प्रतिशत) सेयर लगानी छ ।

अधिक बिक्रीबाट सन्तुलित क्षेत्रमा

शिखरको सेयर मूल्य एक वर्षयताकै न्युन विन्दु ७३० रुपैयाँबाट बढ्ने क्रममा छ । हाल मूल्य ७ सय ६७ रुपैयाँ छ । कम्पनीले सो अघि ७ सय ७० मा पटक पटक टेवा पाएको देखिए पनि अहिले यही विन्दुमा प्रतिरोध परीक्षण गरिरहेको छ । रेखाचित्र अनुसार अब मूल्य बढ्ने क्रममा रहे ८ सय २४ मा पहिलो प्रतिरोध पाउने छ भने त्यसपछि ९ सय कट्न ठूलो अवरोध देखिदैन । नजिकको उच्च विन्दु ९३५ बाट ७ सय ३० पुगेर फर्किने क्रममा ८ सय २४ मा आएपछि ४५ प्रतिशत रिट्रेस भएको मूल्य थप बढ्न सफल भएन ।

१४ दिने आरएसआई सुचक स्केल ३८ मा आएको छ । २२ सम्म पुगेर मूल्य सन्तुलित क्षेत्रमा आएको हो । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमार ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

२१ दिने र ७ दिने सिम्पल मुभिङ एभरेज क्रसओभर भएको छ । पछिल्लो पटक छोटो अवधिमै क्रसओभर देखिएको हो । यसले मूल्य वियरिश प्रवृत्तिमा नै रहेको संकेत गर्छ । यी दुईबीच दुरी कायमै छ । यी रेखालाई विशेष याद गरिराख्नु पर्ने देखिन्छ । २१ दिने रेखालाई काटेर ७ दिने रेखा माथि लागेमा बजार केही समय बढ्नेछ ।

मूल्य घट्दो क्रममा रहेको कम्पनीको एक महिना अवधिको पीभट विश्लेषणले भने अब आगामी एक महिनामा ७ सय ४५ मा पहिलो टेवा पाउन सक्नेछ र मूल्य बढ्न थालेमा भने ८ सय ६ मा पहिलो प्रतिरोध पाउनेछ ।

कम्पनीको सेयर मूल्यले बनाएको मैनवत्ति आकृतिले अन्तिम तीन दिनमा पहिलो दुई दिन सेपरेटिङ लाइन्स वियरिश आकृति बनाएको छ । यसमा पहिलो दिनको सेतो मैनवत्ति र दोस्रो दिनको कालो मैनवत्तिको सुरु मूल्य एउटै छ । यसले मूल्य वियरिश प्रवृत्तिमा जाने संकेत गर्छ । यद्यपि यसलाई दरिलो संकेत मानिदैन । अन्तिम दिनसमेत कालो मैनवत्ति बनेको छ । तर, अन्तिम दिनको कालो मैनवत्तिको शरीर त्यसअघिको सेतो मैनवत्तिको शरीर भित्र (सुरु र अन्तिम मूल्य बीच) नै रहेकोले बिक्रीकर्ता मूल्य धेरै घटेर बेच्न इच्छुक नभएको देखिन्छ । कारोबारको लागि आगामी दिनको पहिलो कारोबार हेर्नु उपयुक्त हुन्छ ।