युनिलिभरः मूल्य र लाभांश सबैभन्दा धेरै, सेयर किन्दा के होला ? (समग्र विश्लेषण)

युनिलिभरः मूल्य र लाभांश सबैभन्दा धेरै, सेयर किन्दा के होला ? (समग्र विश्लेषण)

A+ A A-

युनिलिभर नेपालको नेपाल यात्रा निकै रोचक छ । हिस्दुस्तान लिभरको लगानीमा बिसं २०४९ तिर ७ करोड ३६ लाख लगानीमा यो उद्योग सञ्चालनमा आएको हो । निर्यातमुलक उद्योगको उत्पादन निकासी हुने क्रम सन् २००० बाट घट्न थाल्यो भने सन् २००४ बाट लगभग रोकियो ।

त्यसयता कम्पनीले नेपाली बजारलाई नै केन्द्रीत गर्न थाल्यो । सोही समयबाट कम्पनीको नाम युनिलिभर नेपाल राखियो । आव २०७२/७३ मा १ अर्ब १२ करोडको उच्च नाफा कमाएको कम्पनीको त्यसयता नाफा त्यो दरमा पुग्न सकेको छैन ।

तर, कम्पनीले अहिले पुनः नाफा वृद्धि गर्दै लगेको छ । त्यसलगत्तै ९६ करोड ५० लाख नाफा गरेको कम्पनीले गत आव २०७५/७६ मा नाफा ६.७४ प्रतिशतले वृद्धि गरेर १ अर्ब ६ करोड पु¥याएको छ ।

कम्पनीले ५ वर्षयता बार्षिक औसत ९६८ प्रतिशत लाभांश दिएको छ । नगद लाभांश वितरणमा जोड दिदै आएको कम्पनीको चुक्ता पुँजी स्थीर छ । सञ्चितिमा भने २ अर्ब २३ करोड रुपैयाँ छ ।

कम्पनीको सञ्चालन आम्दानी ५ अर्ब ७५ करोड र अन्य आम्दानी ५१ करोड रुपैयाँ छ । कम्पनीको कुल खर्च पनि ४ अर्ब ८९ करोड रुपैयाँ छ । कुल सञ्चालन आम्दानी १८ प्रतिशतले बढ्दा खर्च २१ प्रतिशतले वृद्धि भएको हो ।

कम्पनीमा उत्पादनको लागि र तयारी अवस्थामा रहेको सामग्री (इन्भेन्ट्रिज) ८२ करोड रुपैयाँ बराबर छ । इन्भेन्ट्रिजमा ९ प्रतिशतको वृद्धि छ । उत्पादन बढाउने उदेश्यले समेत यो बढेको हुनसक्छ । तर, निरन्तर यस्तो वृद्धिदर बढ्ने गरेमा भने खरीद सामाग्रीको सही उपयोग नभएको हुन सक्ने समभावना पनि रहन्छ । कम्पनीको त्यस्तो सम्भावना देखिदैन । यसको बिक्रीपछि कम्पनीको नाफा थप बढ्न सक्छ ।

कम्पनीले व्यापार लगायतबाट १ अर्ब २९ करोड रुपैयाँ उठाउन बाँकी छ भने १ अर्ब ४१ करोड रुपैयाँ तिर्न बाँकी छ । कम्पनीको कुल चालु सम्पत्ती र गैर चालु सम्पत्तिमा वृद्धि भएको छ ।

युनिलिभरको कुल दायित्व १ अर्ब ६१ करोड र कुल सम्पत्ति ३ अर्ब ९४ करोड छ । कम्पनीले बैंकहरुमा राख्दै आएको मुद्दती निक्षेप भने ३० प्रतिशतले घटेर ५८ करोड रुपैयाँमा सिमित भएको छ ।

गत वर्ष अन्तिम सेयर कारोबार २० हजार २ सय ५० मा भएको कम्पनीको प्रतिसेयर आम्दानी १ हजार १ सय ५८ र मूल्य आम्दानी अनुपात १७.४८ गुणा रहेको छ । प्रतिसेयर नेटवर्थ २ हजार ५ सय २६ रुपैयाँ छ ।

युनिलिभरमा हिन्दुस्तान लिभरको ८० प्रतिशत, श्रीविक्रम ल्याण्ड एण्ड इण्डट्रियल कम्पनीको ५ प्रतिशत र सर्वसाधारणको १५ प्रतिशत सेयर स्वामित्व छ । श्रीविक्रम ल्याण्ड एण्ड इण्डट्रियलको तर्फबाट व्यवसायी रविभक्त श्रेष्ठ सञ्चालक छन् ।

कम्पनीको अध्यक्ष प्रदिप बेनर्जी र प्रबन्ध निर्देशक आशिश राई छन् । सर्वसाधारण सेयरधनीको तर्फबाट शंकरलाल अग्रवाल सञ्चालक समितिमा छन् ।

सेयर विश्लेषण

युनिलिभर ब्लुचिप कम्पनीकै रुपमा छ । बजारमा सर्वाधिक मूल्य हुने पहिलो कम्पनी नै यही हो । सेयरको अंकित मूल्य १ सय रुपैयाँको आधारमा कम्पनीले दिइरहेको लाभांश उच्च प्रतिफल हो ।

तर, हालको बजार मूल्यमा पस्ने लगानीकर्ताको लागि भने यो प्रतिफल निकै न्युन हो । यद्यपि यो सेयर किनेर दिर्घकालसम्म नियमित लाभ लिने सोचमा लगानीकर्ताहरुले होल्ड गरिरहेका छन् ।

कम्पनीको सेयर नियमित करोबारमा समेत छैन । सर्वसाधारण सेयर लगानीकर्ताको साथमा १ लाख ३८ हजार कित्ता सेयर रहेपनि एक कारोबार दिनमा औसत ३१ कित्ता सेयर किनबेच हुन्छ । कम कारोबार हुने र माग आपुर्तिले सही काम नगर्ने यस कम्पनीको प्राविधिक विश्लेषण गर्नु खासै उपयुक्त हुदैन ।

तर पनि, गत महिनामा ३ पटक जस्तो कारोबार भएको कम्पनीको सेयर मूल्यले कालो मारुबोजु आकृति बनाएको छ । यसले मूल्य घट्न सक्ने संकेत गरिरहेको छ ।

पीभट विश्लेषणले आगामी महिना काराबोरमा १९ हजार ९ सय ९७ मा पहिलो प्रतिरोध र १९ हजार ४ सय २ मा पहिलो टेवा पाउने संकेत गर्छ ।

युनिलिभरको आरएसआई सूचक ५३.७७ छ । यसले कारोबार सन्तुलित क्षेत्रमा रहेको संकेत गर्छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

७ दिने रेखा २१ दिनेभन्दा माथि रहेकोले मूल्य बुलिश प्रवृत्तिमा नै रहेको संकेत गरिरहेको छ ।

नोट: बजार जोखिममा आधारित हुन्छ । लगानी गर्दा रणनीतिअनुसार बजारको परिवेशको स्वमूल्यांकन गर्नु उचित हुन्छ ।

अन्य कम्पनीको विश्लेषण