जानकी फाइनान्सः लगानीकर्ताको आकर्षण कायम राख्न सक्ला ? (समग्र विश्लेषण)

A+ A A-

नाफा घटेपनि लाभांश घटाएन
सानो तर लगानीकर्ता आकर्षित गर्ने कम्पनी
२ वर्षयता खराब कर्जामा उल्लेख्य सुधार
मूल्य बढ्ने प्रयास

२४ फागुन २०५३ बाट जानकी फाइनान्स सञ्चालनमा आएको हो । १ देखि ३ जिल्ला कार्यक्षेत्र बनाएर सञ्चालनमा यो वित्त कम्पनी सञ्चालनमा छ ।

सानो तर लगानीकर्ताहरुको आकर्षणमा रहदै आएको जानकारीले ५ वर्षयता औसत २० प्रतिशत लाभांश दिदै आएको छ । चुक्ता पुँजी वृद्धिको लागि सहयोगी विकास बैंकसँग मर्जर गर्ने सोचमा रहेको कम्पनीले आफ्नै क्षमताले पुँजी पु¥याएको थियो । ३ जिल्ले वित्त कम्पनीको लागि तोकिएको पुँजी ४० करोड रुपैयाँ पुँजी नाघिसकेको छ ।

तर, यो बीचमा कम्पनीको खराब कर्जामा भने उच्च वृद्धि देखिएको थियो । यसबीचमा ९ प्रतिशतसम्म खराब कर्जा देखिएको कम्पनीले गत आव अन्त्यमा भने यसलाई झारेर २ प्रतिशतमा सिमित पार्न सकेको छ । अघिल्लो आवमै जानकीले यसमा उल्लेख्य सुधार गरेको थियो ।

गत आवसम्म ६२ लाख सञ्चालन नोक्सानमा रहेको जानकीको वित्तीय अवस्था यो वर्ष ४ करोडले धनात्मक भएको छ । कम्पनीको खुद नाफामा भने ९ प्रतिशतले घटेर ११ करोड ६१ लाखमा सिमित भएको छ । यद्यपि कम्पनीले लाभांश दर भने घटाएको छैन ।

कम्पनीले ५ वर्षयता बोनस सेयरमा बढि जोड दिदै आएको देखिन्छ । यो अवधिमा बार्षिक औसत १९.८६ प्रतिशत लाभांश दिएको जानकारीले चालु आवमा भएको नाफापछि पनि २३.१६ प्रतिशत लाभांश दिने घोषणा गरिसकेको छ । नाफा रकमबाट २० प्रतिशत सञ्चितीमा अनिवार्य राख्दा यो क्षमता मात्रै १८.८८ हुन्छ । यसअघिको सञ्चितीमा रहेको बाड्न योग्य रकम समेत प्रयोग गरेको देखिन्छ ।

१५ प्रतिशतले बढेर ३५ करोड रुपैयाँ व्याज आम्दानी गरेको कम्पनीको खुद व्याज आम्दानी १६ करोड रुपैयाँ छ । शुल्क, कमिशनबाट २ करोड कमाएको कम्पनीले प्रावधानको रुपमा पहिले राखेको १३ करोड रुपैयाँ राइट ब्याक गरेको छ । यसपटक प्रावधान ३० प्रतिशतले घटाएर १० करोड राखेको छ ।

कम्पनीको पुँजी कोष पर्याप्तता अनुपात ३३ प्रतिशत छ । कम्पनीको सञ्चित कोषमा २८ करोड रुपैयाँ छ । उसको कोष लागत गत वर्षभन्दा घटेको भएपनि अझै यो दर उच्च नै छ । कोष लागत १०.८४ प्रतिशत रहेकोमा घटेर १०.१० प्रतिशत छ । निक्षेप प्राथमिक पुँजीको आधारमा कर्जा लगानी अनुपात ७६.५० छ । कम्पनीसँग थप लगानीको लागि पुँजी सहज नै छ ।

कम्पनीको प्रतिसेयर आम्दानी २३.६० प्रतिशत, मूल्य आम्दानी अनुपात ७.६३ प्रतिशत र प्रतिसेयर नेटवर्थ १ सय ५८ प्रतिशत छ ।

कम्पनीको अध्यक्षमा रघुप्रसाद शाह र प्रमुख कार्यकारी अधिकृतमा रजनिश कुमार सिंह छन् । कम्पनीमा सबैभन्दा धेरै सेयर स्वामित्व बलराम प्रसाद गुप्ता र दिनदयाल प्रसाद शाह लगायतको छ ।

बुलिश प्रवृत्तिको प्रयास

एक वर्षको अवधिमा शुरुमै मूल्य समायोजनको कारण २ सय २० वाट १ सय ६८ मा आइपुगेको कम्पनीको सेयर मूल्य बढ्ने प्रयासमा रहेपनि २ सयको तह पार गर्न सकिरहेको छैन । यसपटक हुने बोनस समायोजनको समेत थप असर पर्नेछ । यद्यपि त्यसअघि कतिसम्म वृद्धि हुनेछ, समायोजनको असर त्यही अनुसार पर्नेछ ।

मूल्य रेखा चित्रले कम्पनीको सेयरले १ सय ८४ मूल्यमा पटक पटक टेवा पाएर बढेको देखाएको छ भने २ सयमा पटक पटक प्रतिरोध पाएको छ । अन्तिम समयमा मूल्यमा डबल बटम आकृति बनेको छ । यसले मूल्य बढ्ने सम्भावना भने गर्छ ।

सेयर कारोबार सन्तुलित क्षेत्रमा वृद्धि भइरहेको छ । १४ दिने आरएसआई सुचकको स्केल ६१ मा आएको छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमार ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

केही समय अघि सिम्पल मुभिङ एभरेज रेखा क्रमओभर भएको छ । ७ दिने रेखाले २१ दिने रेखालाई काटेर माथि लागेको छ । मूल्य वियरिश प्रवृत्ति लागेको यसले संकेत गर्छ । पीभट विश्लेषणले भने अब बजार बढ्ने क्रममा रहे एक महिनामा २ सय ३ मा पहिलो प्रतिरोध र घट्ने क्रममा रहे १ सय ८९ मा पहिलो टेवा पाउने देखाउँछ ।

कम्पनीको सेयर मूल्य गत आइतवार अघिल्लो दिनको बन्दभन्दा ३ रुपैयाँले बढेर कारोबार शुरु भयो । सो दिन मूल्य बढेर २ सयसम्म पुग्यो र सेतो लामो धागोसहितको मैनवत्ति चित्र बन्यो । यसले मूल्य बढ्ने संकेत गर्छ । त्यस दिनपछि भने मूल्यमा सुधार देखिन सकेन भने खासै घटेको पनि छैन । मूल्यलाई लिएर लगानीकर्तामा अन्योल देखिएको संकेत यसले गर्छ ।

आइतवार यता राइजिङ थ्री मेथड्स प्यार्टन पनि बन्ने सम्भावना छ । जहाँ सेतो लामो मैनवत्ति पछि बनेका आकृतिहरु सेतो मैनवत्तिको शरीरको बीच भागबाट तल ओर्लिएको छैन । यसले मूल्य बढ्ने सम्भावना पनि नकार्न सकिने अवस्था छैन । तर, प्रवृत्तिमा भने ध्यान दिइराख्नु पर्ने देखिन्छ ।

प्रकाशित मिति: बिहीबार, भदौ २६, २०७६ २१:४५