एनआइसी एसिया बैंकः पाँच वर्षदेखि औषत २५ प्रतिशत लाभांश, सेयर किनबेच कम (समग्र विश्लेषण)

एनआइसी एसिया बैंकः पाँच वर्षदेखि औषत २५ प्रतिशत लाभांश, सेयर किनबेच कम (समग्र विश्लेषण)

A+ A A-

लाभांश क्षमता २४.३६ प्रतिशत, घोषणा २१ प्रतिशत
प्रतिस्पर्धी बैंकहरुको समेत ध्यान खिच्न सफल
बैंकमा अग्रवाल समूहको पकड
५०७ को लक्ष्य

५ साउन २०५५ बाट सञ्चालनमा आएको एनआइसी बैंक १६ असार २०७० मा बैंक अफ एशियासँग मर्जर भएसंगै एनआइसी एशिया बैंकको नामबाट सञ्चालनमा छ ।

आक्रामक रुपमा अगाडी बढिरहेको एनआइसी एसियाले गत आर्थिक वर्षको चौथो त्रैमाशमा १ सय २८ प्रतिशतले नाफा बढाएर ३ अर्ब ५ करोड रुपैयाँ पुर्याएको छ । बैंकको पछिल्लो प्रगतिले प्रतिस्पर्धी बैंकहरुको समेत ध्यान खिचेको छ । केही महिनाअघि नबिल बैंकका प्रमुख कार्यकारी अधिकृत अनिल केशरी शाहले एनआइसी एसिया बैंकको तारिफ नै गरेका थिए ।

आक्रामक लगानी भएपनि बैंकको खराब कर्जा ०.५ प्रतिशतभन्दा मुनि नै रहेको तथ्यांक सार्वजनिक भएको छ । तर, बैंकको कर्जा बिग्रिएर रहेको सम्पत्ति २७ करोड बराबर भएको समाचारहरु प्रकाशित भएका छन् । यो रकम लिलामीबाट समेत उठ्न नसकेको रकम हो । यद्यपि यस्तो सम्पत्ति पछि कुनै समय पुनः बिक्री हुने सम्भवना भने रहन्छ ।

हालै एटिएम ह्याक प्रकरणमा बैंकको कार्डबाट १७ लाख झिकिएको खबर सार्वजनिक भएको छ । चिनिया ह्याकहरु पक्राउ परेको र साथबाट १ करोडभन्दा बढि रकम समेत फेला परेकोले यसको ठूलो जोखिम बैंकलाई नपर्न सक्छ ।

५ वर्षमा औसत २५ प्रतिशतको लाभांश बाढेको एनआइसीले गत आवमा नाफा पछि २४.३६ प्रतिशत लाभांश बाड्न सक्ने अवस्था थियो । बैंकले नाफाको आधारमा लगानीकर्तालाई २ अर्ब १५ करोड रुपैयाँ वितरण गर्न सक्ने उल्लेख गरेको थियो । बैंकले भने १० प्रतिशत बोनस र ११.०५ प्रतिशत नगद लाभांशको घोषणा गरिसकेको छ ।

बैंकको खुद व्याज आम्दानी, फि र कमिशन शुल्कबाट भएको आम्दानी, अन्य आम्दानीमा वृद्धि भएकोले नाफा वृद्धिमा सहयोग पुगेको हो । बैंकको व्याज आम्दानी ४२ प्रतिशत र खुद व्याज आम्दानी ६५ प्रतिशतले बढेको छ ।

बैंकको पुँजी कोष पर्याप्तता अनुपात १३.४८ प्रतिशत रहेकोले नियामकीय प्रावधान (११ प्रतिशत) भन्दा सहज नै छ । बैंकले हाल प्रस्ताव गरेको बोनसले समेत यस्तो अनुपातलाई थप बढाउने छ ।

बैंकको निक्षेप र प्राथमिक पुँजीको आधारमा जारी भएको कर्जाको अनुपात ७४.८४ प्रतिशत छ । एनआइसी एसियाले थप कर्जा लगनी गर्न सक्ने अवस्था नै छ ।

बैंकको सञ्चित कोषमा ३ अर्ब ८८ करोड रुपैयाँ रकम छ । उसको पुँजी कोष लागत सामान्य घटेर ६.९७ मा सिमित भएको छ । यो समग्र बैंकहरुको तुलनामा भने उच्च नै हो । बैंकले खराब कर्जाको आधारमा सो कर्जाको २ सय ७२ प्रतिशत रकम राखेको छ । बैकले प्रावधान रकम ५९ करोड रुपैयाँ छ ।

एनआइसी एसियाको प्रतिसेयर आम्दानी ३४.५६ रुपैयाँ, मूल्य आम्दानी अनुपात १२.९६ गुणा र प्रतिसेयर नेटवर्थ १ सय ६९ रुपैयाँ छ ।

बैंकमा अग्रवाल समूहको बाहुल्यता छ । यद्यपि बार्षिक वित्तीय विवरणमा ०.५ प्रतिशतभन्दा धेरै लगानी गर्नेको विवरण सार्वजनिक गर्नुपर्नेमा बैंकले त्यसो गरेको छैन । बैंकको अध्यक्षमा अग्रवाल समूहबाट तुलसीराम अगवालले प्रतिनिधित्व गरिरहेका छन् भने रोशनकुमार न्यौपाने प्रमुख कार्यकारी अधिकृत छन् ।

५०७ को लक्ष्य

एनआइसी एसियाको सेयर गत एक वर्षमा दैनिक औसत ३६ हजार ९ सय ७३ कित्ता किनबेच हुदै आएको छ । यो बैंकको कुल जारी सेयरको १ प्रतिशतभन्दा पनि कम हो । यो दर १ प्रतिशतभन्दा कम हुनुले सैद्धान्तिक अर्थमा एक व्यक्तिमा रहेको सेयर अर्को व्यक्तिमा नै नपुगेको भन्ने हुन्छ । तरपनि, समग्र बजारमा सूचीकृत कम्पनीहरुको कारोबार अनुपात न्युन नै छ । त्यसैले बैंकको अनुपातलाई मात्र फरक रुपमा हेर्नु सही हुँदैन ।

बैंकको सेयर अधिक बिक्री क्षेत्रको नजिक पुगेर सन्तुलित क्षेत्रबाट माथि लाग्ने क्रममा छ । केही महिनाअघि बर्षकै उच्च बिन्दु (मूल्य ५०७) मा पुगेको बैंकको सेयरले त्यसयता ७१ अंकसम्म गुमाए पनि २१ प्रतिशत रिट्रेस भएर हालको मूल्य (४५१ रुपैयाँ) मा आएको छ ।

बैंकको मूल्य सन्तुलित क्षेत्रभित्रै बढ्ने प्रयासमा रहेको १४ दिने आरएसआई स्केल ३७ बाट बढेर दुई दिनमै ५५.९ मा आएको छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० को बीचमा भए सन्तुलित क्षेत्रमार ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

सिम्पल मुभिङ एभरेज रेखाले मूल्य अझै वियरिश प्रवृत्तिमै रहेको संकेत गर्छ । ७ दिने रेखाले २१ दिनेलाई काटेर तल रहेको छ । यी दुई रेखालाई निगरानी गर्नुपर्ने देखिएको छ ।

पीभट विश्लेषणले भने अब बजार बढ्ने क्रममा रहे एक महिनामा ४ सय ६७ मा पहिलो प्रतिरोध र घट्ने क्रममा रहे ४ सय ३६ मा पहिलो टेवा पाउने देखाउँछ ।

बैंकको सेयर मूल्यले अन्तिम चार दिनमा शुरुका तीन दिन मर्निङ स्टार बुलिश आकृति बनाएको छ । यसमा पहिलो दिन कालो मैनवत्ति, दोस्रो दिन उल्टो ह्यामर र तेस्रो दिन सेतो मैनवत्ति बनेको छ ।

यसले मूल्य बढ्ने संकेत गर्छ । यो संकेतले जस्तै अन्तिम दिन मूल्य बढेको छ । केही दिन वृद्धिले निरन्तरता पाउन सक्छ । तर, उल्टो ह्यामरको माथिल्लो धागोभन्दा तल नै सेतो मैनवत्ति आकृतिहरु बनिरहेका छन् । ह्यामरको धागोले बनाएको उच्च बिन्दु (४७१ रुपैयाँ) मा प्रतिरोध परीक्षण भने गर्न सक्छ ।

नोट: बजार जोखिममा आधारित हुन्छ । लगानी गर्दा रणनीतिअनुसार बजारको परिवेशको स्वमूल्यांकन गर्नु उचित हुन्छ ।

अन्य कम्पनीको विश्लेषण