एनसीसी बैंकः एकै वर्ष दुई पटक लाभांशको सम्भावना (समग्र विश्लेषण)

A+ A A-

२०७४/७५ को नाफाबाट १६.७२ प्रतिशत लाभांश, फेरि १४ प्रतिशत लाभांश दिन सक्ने क्षमता
नाफामा सुधार, प्रतिसेयर आम्दानी उच्च
बिभिन्न समूहको पकड, एनबी समूह अझै ठूलो समूहमा

२८ असोज २०५३ बाट सञ्चालनमा आएको नेपाल क्रेडिट एण्ड कमर्स (एनसीसी) बैंक दोस्रो पुस्ताको बैंक हो । विगतमा खराब अवस्थामा पुगेको बैंकको राष्ट्र बैंकलेसमेत व्यवस्थापन सम्हालेको थियो । राष्ट्र बैंकले मर्जर पूरा गर्न सञ्चालक समितिको गठन गरिदिएको थियो । अहिलेसम्म पनि राष्ट्र बैंकले बनाइदिएकै सञ्चालक समिति छ ।

चुक्ता पुँजी ८ अर्ब पुर्‍याउनुपर्ने प्रावधानअनुसार बैंकमा चारवटा विकास बैंकहरू मर्ज भएका थिए । एपेक्स डेभलपमेन्ट बैंक, इन्फ्रास्ट्रकचर बैंक, सुप्रिम डेभलपमेन्ट र इन्टरनेशनल डेभलपमेन्ट बैंक मर्ज भएका थिए ।

यसबीच बैंकमा रहेको एनबी समूहले एपेक्स डेभलपमेन्ट बैंकको मर्जर रोक्नुपर्ने माग गर्दै उच्च अदालत पाटनमा मुद्दा दायर गर्दा तत्काललाई एपेक्सको हिसाब अलग राख्न अन्तरिम आदेश दिएको भए पनि पछि यही विषयमा परेको अन्य मुद्दामा सबै मुद्दामा दाबी नपुग्ने भन्दै खारेज भएको छ ।

हालै मात्र एनसीसीले २०औं र २१औं साधारणसभा सम्पन्न गरेको छ । आर्थिक वर्ष २०७४/७५ को नाफाबाट बैंकले प्रस्ताव गरेको बोनस पारित भएसँगै बैंकको पुँजी ८ अर्ब रुपैयाँ पुगेको छ । यी दुई आर्थिक वर्षको नाफाबाट एनसीसीले १६.७२ प्रतिशत लाभांश दिएको छ । बैंकले गत आव २०७५/७६ को चौथो त्रैमासिक वित्तीय विवरणमा भने लाभांश नजोडिएको चुक्ता पुँजी समावेश गरेको छ ।

एनसीसीले गत आर्थिक वर्षको चौथो त्रैमाशमा भने १ अर्ब ५२ करोड रुपैयाँ नाफा गरेको छ । यो नाफाबाट बैंकले करिब १४ प्रतिशत लाभांश दिन सक्ने देखिन्छ । गत वर्षको वार्षिक साधारणसभा आगामी पुस मसान्तभित्रमा गरिसक्नुपर्ने कानुनी व्यवस्था छ । यसो हुँदा बैंकले यही आर्थिक वर्षमा फेरि १४ प्रतिशत जति लाभांश दिन सक्छ ।

एनसीसीले गत आवको नाफाका आधारमा लगानीकर्तालाई १ अर्ब १९ करोड रुपैयाँ वितरण गर्न सक्ने उल्लेख गरेको छ । अघिल्लो आवको बोनस वितरणपछि ८ अर्ब १३ करोड रुपैयाँ चुक्ता पुँजी पुग्ने बैंकको यस आधारमा भने गत आवको लाभांश क्षमता १४.७५ प्रतिशत छ । नियमित लाभांश नदिएको बैंकको ५ वर्षको औसत लाभांश भने १४.५४ प्रतिशत छ । विगत ५ वर्षमा बैंकले ३ वर्षमात्र लाभांश दिएको थियो ।

बैंकको खुद ब्याज आम्दानी ९१ प्रतिशतले बढेको छ । सञ्चालन नाफा भने २० प्रतिशतले बढेको छ । बैंकको पुँजी कोष पर्याप्तता अनुपात १४.०४ प्रतिशत रहेकाले हालको नियामकीय प्रावधान (११ प्रतिशत) भन्दा सहज छ ।

एनसीसीको निक्षेप र प्राथमिक पुँजीको आधारमा जारी भएको कर्जाको अनुपात ७३.८४ प्रतिशत छ । बैंकलाई थप कर्जा लगानी गर्न पुँजी सहज देखिन्छ ।

एनसीसीको सञ्चित कोषमा ३ अर्ब ५९ करोड रुपैयाँ छ । उसको पुँजी कोष लागत सामान्य घटेर ७.४९ मा भएको छ । समग्रमा यो उच्च नै छ । ८ अर्ब २ करोड ब्याज आम्दानी गरेको एनसीसीको ब्याज खर्च ५ अर्ब रुपैयाँ बराबर छ । बैंकले खराब कर्जाका आधारमा सो कर्जाको १ सय २९ प्रतिशत रकम राखेको छ । खराब कर्जामा सुधार भए पनि यो २ प्रतिशतभन्दा माथि नै छ ।

एनसीसीको प्रतिसेयर आम्दानी २३.५८ रुपैयाँ, मूल्य आम्दानी अनुपात १०.४३ गुणा र प्रतिसेयर नेटवर्थ १ सय ७८ रुपैयाँ छ ।

मा रमेशराज अर्याल प्रमुख कार्यकारी अधिकृत छन् भने उपेन्द्रकेशरी न्यौपाने सञ्चालक समिति अध्यक्ष छन् । बैंकमा मर्जर पछि एक समूहको मात्र पकड रहने अवस्था हटेको छ । बिभिन्न समूहका विभिन्न संस्थाको नाममा सेयर छ । एनबी समूह पनि प्रमुख सेयर लगानीकर्तामा छ ।

मूल्य वियरिश

हालै मात्र वर्षको उच्चविन्दु २ सय ६५ रुपैयाँमा पुगेको बैंकको सेयर मूल्य अहिले आरोलो लाग्ने क्रममा छ । बैंकको सेयर कारोबार सन्तुलित नै रहे पनि अधिक बिक्री क्षेत्रनजिक आउन लागेको १४ दिने आरएसआई सूचकले देखाएको छ । हाल यो स्केलको ३२.१४ मा आएको छ । आरएसआई स्केल ३० भन्दामुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

सिम्पल मुभिङ एभरेज रेखामा २१ दिने रेखा र ७ दिने रेखा एकआपसमा नजिकिएका छन् । २१ दिने रेखा माथि लागेमा मूल्य बियरिश र ७ दिने रेखा माथि लागेमा मूल्य बुलिश प्रवृत्तिमा जानेछ ।

पीभट विश्लेषणले भने अब बजार घट्ने क्रममा नै रहे एक महिनामा १ सय ९० मा पहिलो टेवा र बढ्ने क्रममा रहे २ सय २ मा पहिलो प्रतिरोध पाउने देखाउँछ ।

घट्दो क्रममा रहेको बैंकको सेयर मूल्यले स्पष्ट संकेत दिएको छैन । मूल्य घट्न थामिने प्रयासमा रहेको संकेत भने गरिरहेको छ । एक वर्षयताकै न्युन बिन्दुमा रहेको बैंकको मूल्यले १ सय ९० आस पासमा टेवा खोजिरहेको छ । लगानी गर्नुअघि केही दिनको कारोबार हेर्नु सही हुन्छ ।