उपेन्द्रलाई सरकार छाेड्न बाध्य पार्ने प्रधानमन्त्रीकाे त्याे व्यवहार

A+ A A-

सत्ता साझेदार दल समाजवादी पार्टी नेपालले सरकार छाडेको छ । मंगलबार सरकार छाड्ने निर्णय गरेको समाजवादीका तर्फबाट उपप्रधान एवं कानुन, न्याय तथा संसदीय मामिलामन्त्री उपेन्द्र यादव र शहरी विकासमन्त्री महोम्मद इस्तियाक राईले राजीनामा दिएका हुन् ।

मन्त्री पदबाट यादवले दिएकाे राजीनामा :

मंगलबार शीर्ष नेताहरूको बैठकले सरकारबाट बाहिरिने निचोड निकालेको थियो ।

संविधान संशोधनका विषयमा सरकार सकारात्मक नदेखिएपछि पार्टीबाट बाहिरिएको सो पार्टीका नेता डा. शिवजी यादवले बताए । यसअघि २८ कात्तिकदेखि ३० सम्म काठमाडौंमा बसेको पार्टीको संघीय परिषद् र केन्द्रीय समिति बैठकले संविधान संशोधनका विषयमा सरकारसँग ‘अन्तिम जवाफ’ माग्ने र जवाफ चित्तबुझ्दो नआए सरकार छोड्ने निष्कर्ष निकालेको थियो ।

संविधान संशोधनमा नेकपा तयार नभए संघीय समाजवादीले सरकार छोड्ने

‘हामीले अन्तिम पटक सरकारसँग संविधान संशोधनका विषयमा जवाफ माग्यौं, चित्तबुझ्दो र विश्वसनीय संकेत पाएनौं, त्यसैले सरकारबाट बाहिरिएर जनताका बीचमा जानुको विकल्प देखिएन,’ डा. यादवले शिलापत्रसँग भने ।

प्रधानमन्त्रीको त्यो व्यवहार

संविधान संशोधनका लागि एउटा विज्ञ टोली बनाएर आवश्यक प्रक्रिया अगाडि बढाउने प्रस्ताव कानुनमन्त्रीका हैसियतले सोमबारको मन्त्रिपरिषद् बैठकमा यादवले पेश गरेका थिए । उनले यसबारे त्यहाँ छलफल होस् भन्ने चाहेका थिए ।

‘तर प्रधानमन्त्रीले यो कुरा सुन्नै चाहनु भएन, बरु अलि अपमानजनक व्यवहार भयो,’ यादवले पार्टीको शीर्ष तहको बैठकमा भनेका कुरा उद्धृत गर्दै एक नेताले भने, ‘अनि हामी सबैले सरकारबाट बाहिरिनुपर्छ भन्ने मत राख्यौं र यहीअनुसार निर्णय भयो ।’

के थियाे उपेन्द्रकाे प्रस्तावमा ?

उपेन्द्र यादवले कानुनमन्त्रीकाे हैसियतमा संविधान संशाेधन प्रस्ताव तयार गरेका थिए । यस्ताे थियाे उनले तयार पारेकाे प्रस्ताव ः

सहमति पालना भएन

संविधान संशोधनको विषय राजनीतिक निर्णयको रूपमा अगाडि नआएकाले विश्वासको वातावरण बिग्रिएको उनको भनाइ छ । १८ जेठ २०७५ मा तत्कालीन संघीय समाजवादी फोरम सरकारमा सहभागी भएको थियो ।

सरकारमा सहभागी हुनुअघि नेपाल कम्युनिस्ट पार्टी (नेकपा) सँग फोरमले दुईबुँदे सहमति गरेको थियो । सहमतिमा फोरमले आन्दोलनका क्रममा उठाएका माग र मुद्दाहरूमा देश र जनताको पक्षमा संविधान संशोधन गरी सम्बोधन गरिने र उपरोक्त सहमतिका आधारमा संघीय समाजवादी फोरम, नेपाल सरकारमा सामेल हुने उल्लेख थियो ।

तर, फोरम सरकारमा सहभागी भएको डेढ वर्षसम्म पनि संविधान संशोधनका विषयमा औपचारिक छलफल भएन ।

समाजवादी पार्टी घोषणा, वैकल्पिक शक्तिको उदघाेष

२३ वैशाखमा तत्कालीन नयाँ शक्ति नेपाल र फोरमबीच एकता भई समाजवादी पार्टी नेपाल बनेको छ ।

सरकारमा तत्कालीन फोरमका तर्फबाट अध्यक्ष उपेन्द्र यादव उपप्रधान एवं स्वास्थ्यमन्त्री, सुरेन्द्रकुमार यादव स्वास्थ्य राज्यमन्त्री र मोहम्मद इस्तियाक राई शहरी विकासमन्त्री बनेका थिए । तर, प्रधानमन्त्री केपी शर्मा ओलीले मन्त्रिमण्डल पुनर्गठन गरी यादवलाई उपप्रधान एवं कानुन मन्त्रालयको जिम्मेवारी सुम्पेका थिए । राज्यमन्त्री यादव भने मन्त्रिमण्डल पुनर्गठन हुँदा हटाइएका थिए ।

कानुनमन्त्री भएपछि यादवले संविधान संशोधनको प्रस्ताव लैजाने तयारी गरेका थिए । तर, ओलीले अहिले त्यस्तो प्रस्ताव आवश्यक नभएको प्रतिक्रिया दिएपछि समाजवादी पार्टी सरकारबाट बाहिरिने निष्कर्षमा पुगेको स्रोतको भनाइ छ ।

प्रकाशित मिति: मंगलबार, पुस ८, २०७६ १५:३८