सहकारी ठगीले इलाम २ मा तनाव दिएपछि रवि लामिछानेको नयाँ स्टन्ट, धन्यवाद दिन गृह मन्त्रालय पुग्ने को हुन् ?

सहकारी ठगीले इलाम २ मा तनाव दिएपछि रवि लामिछानेको नयाँ स्टन्ट, धन्यवाद दिन गृह मन्त्रालय पुग्ने को हुन् ?

A+ A A-

भोलि १५ वैशाखमा इलाम २ मा हुने उपचुनावलाई प्रभावित पार्ने गरी गृहमन्त्री रवि लामिछानेको सचिवालयले शुक्रबार गलत सूचना सम्प्रेषण गरेको पुष्टि भएको छ । मन्त्रिपरिषद्को बैठकले बिहीबार सहकारी समस्या समाधान गर्न कानुनी प्रबन्ध गर्ने निर्णय गरेको विषयलाई 'मिस लिड' गर्दै गृहमन्त्री लामिछानेले गलत प्रचारबाजी गराएका छन् ।

लामिछानेको सचिवालयले सहकारीसम्बन्धी समस्या द्रुत प्रक्रियाबाट समाधान गर्न पहल गरेकोमा धन्यवाद दिन सहकारीपीडित सिंहदरबार पुगेको भन्दै सञ्चारमाध्यममा ह्वाट्सएप ग्रुपमार्फत प्रेस नोट पठायो । जुन यथार्थभन्दा भिन्न थियो ।

सहकारी प्रकरणमा लामिछाने आफैँ मुछिएका छन् । यस्तो बेला उनलाई धन्यवाद दिने पीडित को हुन् भनेर शिलापत्रले खोजेको छ । शुक्रबार गृह मन्त्रालय पुगेर गृहमन्त्री लामिछानेसँग कुरा गरेका व्यक्ति हुन्, पोखराका सहकारी बचतकर्ता संरक्षण राष्ट्रिय अभियानका अध्यक्ष कुशलव केसी । उनी गृहमन्त्री लामिछानेलाई धन्यवाद दिन सिंहदरबार गएकै होइन रहेछन् । उनले शिलापत्रसँग भने, ‘हिजो हामीलाई गृहमन्त्रीको सचिवालयबाट सहकारीबारे निर्णय गरेका छौँ, आउनुहोस् छलफल गरौँ भनेर बोलाउनुभएको हो । हामी धन्यवाद दिन गएकै होइनौँ ।’

गृहमन्त्रीको सचिवालयले धन्यवाद दिएको भनी प्रचार गरेको छ त भन्ने प्रश्नमा उनले आफूहरूले धन्यवाद नदिएको बताए । बरु यसअघि सहकारीपीडितसँग भएको सम्झौता कार्यान्वयनबारे आफूहरूले गृहमन्त्रीसँग छलफल गरेको उनले बताए ।

अझ रोचक कुरा त के छ भने केसी खासमा सहकारीपीडित पनि होइनन् । उनले आफू अभियन्ता मात्र भएको स्वीकार्दै शिलापत्रसँग भने, ‘म सहकारीको पीडित बचतकर्ता होइन । बरु बचतकर्ता संरक्षणको आन्दोलनमा मैले १५ लाख डुबाइसकेको छु ।’

केसी गत चैतमा अनशनसमेत बसेका थिए । त्यतिबेला राष्ट्रिय मानवअधिकार आयोगले पनि उनको जीवनरक्षा गर्न भन्दै विज्ञप्ति जारी गरेको थियो । केसी अभियन्ता मात्र होइनन्, एक युट्युबर पनि हुन् । उनी क्राइम टीभी नेपाल नामको युट्युब च्यानल चलाउँछन् । पछिल्लो समय नेपालमा युट्युबरहरूले आफूलाई अभियन्ता बनाउने प्रचलन पनि चलेको छ । उनले पनि त्यसैलाई पछ्याएको देखिन्छ ।

इलाम २ मा १५ वैशाखमा हुने उपचुनावमा लामिछानेले सहकारी प्रकरणमा निकै प्रश्नको सामना गरिरहेका छन् । कांग्रेसले उनीमाथि संसदीय छानबिन हुनुपर्ने माग गरिरहेको छ । त्यसैले पनि उनले चुनावको अघिल्लो दिन 'ड्यामेज कन्ट्रोल' को रणनीतिअनुरुप स्टन्ट गरेका हुन सक्छन् ।

उता पोखराका सहकारीपीडितले भने गृहमन्त्रीलाई धन्यवाद दिएको थाहा पाएपछि आश्चर्य प्रकट गरेका छन् । 'धन्यवाद दिए तर के विषयमा दिएको भन्ने नै बुझ्न गाह्रो छ', कास्की सहकारीपीडित संघर्ष समितिका अध्यक्ष किरण श्रेष्ठले भनेका छन्, ‘अध्यादेश ल्याउने भनियो, आउने हो कि होइन थाहा छैन । अध्यादेश गर्भमै तुहिन सक्छ । कस्तो अध्यादेश आउने हो ? यहाँ सहकारीका १० थरीका ठग छन् । त्यो अध्यादेशले छुन्छ कि छुन्न ? आफ्नै मान्छेलाई बचाउनलाई मात्र ल्याउने हुन् कि ? अहिल्यै धन्यवाद दिने रे । कस्तो कुरा हो यो ?’

उनले थप भनेका छन्, ‘कोही मरेको-मर्‍यै छन् । जीबी राईलाई ल्याऊ भन्दा थाहा छैन । अध्यादेश होइन, जीबी राईलाई ल्याए हुन्छ । इलामको चुनावलाई प्रभावित पार्नैका लागि हो । यो जुन पीडित हुँ भनेको छ, यसको विषयमा कुरा उठाउनुपर्नेछ ।’

प्रकाशित मिति: शुक्रबार, वैशाख १४, २०८१ १७:४८