प्रचण्ड सरकारमा सहभागी हुँदै नाउपा, रञ्जितानिकट चौधरी मन्त्री बन्ने

A+ A A-

नागरिक उन्मुक्ति पार्टी माओवादी केन्द्रका अध्यक्ष पुष्पकमल दाहाल प्रचण्ड नेतृत्वको सरकारमा सहभागी हुने भएको छ । ३० फागुनमा प्रधानमन्त्री प्रचण्डलाई विश्वासको मत दिएको नाउपा दुई-तीन दिनभित्रै सरकारमा सहभागी हुन लागेको हो ।

नाउपाकी अध्यक्ष रञ्जिता श्रेष्ठ चौधरीले आफूनिकट सांसद अरुण चौधरीलाई मन्त्री बनाउने तयारी गरेकी छिन् । बालुवाटार स्रोतका अनुसार नाउपाले भूमि व्यवस्था, सहकारी तथा गरिबी निवारण मन्त्रालय पाउने सहमति भएको छ ।

भूमि व्यवस्था मन्त्रालयको जिम्मेवारी सत्तारुढ दल एमालेका बलराम अधिकारीले सम्हालिरहेका छन् । भूमि व्यवस्था, सहकारी तथा गरिबी निवारण मन्त्रालय लिएर पार्टी सरकारमा सामेल हुन लागेको नाउपाका एक नेताले बताए । ‘हाम्रो पार्टीबाट अरुण चौधरी सरकारमा सामेल हुने निर्णय भएको छ । उहाँ एक-दुई दिनमै मन्त्री बन्नु हुन्छ,' ती नेताले भने ।

प्रचण्ड नेतृत्वकै सरकारमा नाउपाकी अध्यक्ष श्रेष्ठ १७ चैत २०७९ मा मन्त्री बनेकी थिइन् । उनले त्यतिबेला भूमि व्यवस्था, सहकारी तथा गरिबी निवारण मन्त्रालय नै सम्हालेकी थिइन् । प्रधानमन्त्री प्रचण्डले २१ फागुन २०८० मा कांग्रेससँगको सहकार्य तोडेर एमालेसँग मिलेर नयाँ गठबन्धन बनाएपछि श्रेष्ठ पदमुक्त भएकी थिइन् ।

नाउपाभित्र संरक्षक रेशम चौधरी र अध्यक्ष श्रेष्ठबीचको विवाद उत्कर्षमा पुगेको छ । नाउपाभित्र दुई गुट छन् । मन्त्री बन्न लागेका चौधरी पनि रञ्जितानिकट मानिन्छन् । प्रतिनिधिसभामा नाउपाका चार सांसद छन् । अध्यक्ष श्रेष्ठ, अरुण चौधरी, गंगाराम चौधरी र लालवीर चौधरी नाउपका सांसद हुन् । नाउपका संरक्षक चौधरी भने सत्ता गठबन्धनको विरुद्धमा छन् । पार्टीभित्रको विवादकै कारण नाउपाले सुदूरपश्चिम प्रदेशमा मुख्यमन्त्री गुमाउन पुगेको छ ।