टी-२० सिरिज: वेस्ट इन्डिज 'ए' सँग प्रतिस्पर्धा गर्दै नेपाल

A+ A A-

नेपाल र वेस्ट इन्डिज 'ए' बीचको पाँच खेलको टी-२० सिरिज सुरु हुँदै छ ।

सिरिजअन्तर्गत नेपालले पहिलो खेलमा आज वेस्ट इन्डिज 'ए' सँग प्रतिस्पर्धा गर्दै छ । नेपाल र वेस्ट इन्डिज 'ए' बीचको खेल कीर्तिपुरस्थित त्रिवि क्रिकेट मैदानमा दिउँसो १ बजेबाट सुरु हुनेछ ।

नेपाली टिममा रोहित पौडेल, आसिफ शेख, कुशल भुर्तेल, अनिल साह, आरिफ शेख, सन्दिप जोरा, दीपेन्द्रसिंह ऐरी र कुशल मल्ल छन् । यसैगरी, गुल्सन झा, ललित राजवंशी, करण केसी, सोमपाल कामी, प्रतिश जिसी, अविनाश बोहरा, विवेक यादव र आकाश चन्द पनि टिममा छन् ।

नेपाल क्रिकेट संघ (क्यान) ले शुक्रबार थप चार खेलाडीलाई टिममा बोलाएको छ । वेस्ट इन्डिज 'ए' विरुद्धको सिरिजका लागि विनोद भण्डारी, सागर ढकाल, कमलसिंह ऐरी र लोकेश बमलाई पनि टिममा समेटिएको छ । यसअघि क्यानले रोहितको कप्तानीमा १६ सदस्यीय टिमको घोषणा गरेको थियो ।

वेस्ट इन्डिज ‘ए’ सँग नेपालले दोस्रो खेल १६ वैशाखमा, तेस्रो खेल १९ वैशाख, चौथो खेल २० वैशाख र २२ वैशाखमा अन्तिम खेल खेल्नेछ । सिरिजका पाँचै खेल कीर्तिपुरस्थित त्रिवि अन्तर्राष्ट्रिय क्रिकेट मैदानमै हुनेछन् ।

नेपालले वेस्ट इन्डिज ‘ए’ सँग आईसीसी टी-२० विश्वकपको तयारी स्वरूप शृंखला खेल्न लागेको हो । वेस्ट इन्डिज ‘ए’ सँगको शृंखलापछि नेपाली क्रिकेट टिम टी-२० विश्वकप खेल्न अमेरिका प्रस्थान गर्नेछ । त्यसअघि नेपालले वेस्ट इन्डिज गएर अभ्यास गर्नेछ ।

टी-२० विश्वकपमा नेपाल समूह 'डी' मा छ । नेपाल रहेको समूहमा दक्षिण अफ्रिका, श्रीलंका, बंगलादेश र नेदरल्यान्ड्स छन् ।

नेपाली टिम : रोहित पौडेल (कप्तान), आसिफ शेख, कुशल भुर्तेल, अनिल शाह, आरिफ शेख, सन्दीप जोरा, दीपेन्द्रसिंह ऐरी, कुशल मल्ल, गुलशन झा, ललित राजवंशी, करण केसी, सोमपाल कामी, प्रतिश जिसी, अभिनाश बोहरा, विवेक यादव, आकाश चन्द, विनोद भण्डारी, सागर ढकाल, कमल सिंह ऐरी र लोकेश बम ।

वेस्ट इन्डिज टिम: रोस्टन चेश, एलिक एथानाजे (उपकप्तान), फबिएन एलेन, कदीम एलियन, जोशुवा विशोप, केसी कार्टी, जोनसन चार्ल्स, मार्क दयाल, आन्द्रे फ्लेचर, म्याथ्यु फर्ड, ओबेद म्याककोय, गुडाकेश मोती, किमो पल, ओशान थोमस र हायडेन वाल्स ।

प्रकाशित मिति: शनिबार, वैशाख १५, २०८१ ०६:५१