उपेन्द्रका दुःख ! वार्ता समितिमा कताबाट प्रतिनिधित्व गर्लान् ?

A+ A A-

स्वास्थ्यबाट कानुन मन्त्रालयतिर सरेका उपप्रधानमन्त्री उपेन्द्र यादव आजबाट नयाँ मन्त्रालयको कार्यभार सम्हाल्दैछन् । विदेश भ्रमणमा रहेका बेला प्रधानमन्त्री केपी शर्मा ओलीले उनको मन्त्रालय खोसेर नेकपा नेता भानुभक्त ढकाललाई दिए । भानुभक्तको मन्त्रालय उनलाई थमाए ।

उपेन्द्र यादव अध्यक्ष रहेको समाजवादी पार्टीका तर्फकाट राज्यमन्त्री बनेका स्वास्थ्य राज्यमन्त्री डा. सुरेन्द्र यादव अस्पतालमा हुँदै पदमुक्त भए । अब समाजवादी पार्टीकाे तर्फबाट सरकारमा सहभागी यादव ‘एक्ला बृहस्पति’ बनेका छन् । जसको उपप्रधानमन्त्री पद मात्र अहिलेसम्म स्थायी छ, मन्त्रालय फेरिइरहेको छ ।

पार्टीभित्र आक्रोश

बाबुराम भट्टराईले नेतृत्व गरेको तत्कालीन नयाँ शक्ति पार्टी र यादव नेतृत्वको संघीय समाजवादी फोरमबीच एकीकरणपछि समाजवादी पार्टी बन्यो । यादव कार्यकारी अध्यक्ष बने, भट्टराई संघीय परिषद अध्यक्ष ।

पार्टी गठनअघिदेखि नै केपी ओली नेतृत्वको सरकारसँग रुष्ट रहेका भट्टराईले सरकारमा सहभागी नहुन र संविधान संशाेधनको एजेण्डा बाेकेर सडक संघर्ष गर्न दबाब दिए । तर, यादवको एक्लो जोडबलले पार्टी सरकारमा सहभागी भयो । मन्त्री बने यादव, राज्यमन्त्री बने उनका अर्का कार्यकर्ता डा. यादव ।

सरकारमा सहभागी भएर दुईतिहाइ पुर्‍याउने त्यसपछि संविधान संशाेधन गराउने यादवको पुरानो रोडम्याप हो । यो योजनाअनुसार उपप्रधानमन्त्री बनेका यादवले सरकारमा सहभागी भएपछि कुनै पनि राष्ट्रिय महत्त्वका निर्णयमा ‘स्पेस’ पाएनन् ।

राजदूत नियुक्ति, संवैधानिक पदाधिकारी, प्रदेश प्रमुखहुँदै मन्त्री फेरबदलसम्ममा यादवलाई ओली नेतृत्वको सरकारले नसुनेपछि यादवमाथि सरकार छाड्न निरन्तर दबाब छ ।

समाजवादी पार्टीका अर्का अध्यक्ष भट्टराई सरकारका सबै गतिविधिको विरोध गर्छन् । यादव भने बचाउ गर्दै हिँड्छन् । हिजो पोखरामा भट्टराईको अभिव्यक्ति पनि सरकारप्रति आक्रोशको निरन्तरता भएको पार्टीका नेताहरू बताउँछन् ।

पहिले राई डुबे, अहिले भट्टराई

गौर नरसंहारपछि मधेशी जनअधिकार फोरम नेपाल पार्टी खोलेर केन्द्र राजनीतिमा उदाएका यादव त्यसयता सधैं शक्तिमै छन् । फोरमलाई विस्तार गर्ने क्रममा अशोक राईले नेतृत्व गरेको तत्कालीन संघीय समाजवादी पार्टी र यादवको पार्टीबीच एकता भयो ।

एकतापछि आफ्ना ‘राजनीतिक गुरु’ राईलाई माथ गर्दै यादव पार्टीको अध्यक्ष बने । मन्त्री बने । यादव आज पनि सो पार्टीमा वरिष्ठ नेताकै हैसियतमा छन् ।

राईलाई पार्टीमा भित्र्याएपछि यादवले बाबुराम भट्टराई नेतृत्वको नयाँ शक्तिसँग एकीकरण गरे । प्रर्वप्रधानमन्त्रीसमेत रहेका भट्टराईलाई नयाँ पार्टीको संघीय परिषद् अध्यक्षकाे हैसियतमा यादवले शपथग्रहण गराए ।

यादव कार्यकारी अध्यक्ष बने, भट्टराई संघीय परिषद् अध्यक्ष । पार्टी एकतापछि प्रधानमन्त्री र सशस्त्र विद्रोहका बेला तत्कालीन माओवादीको तर्फबाट जनसरकार प्रमुख भइसकेका भट्टराईले यादवबाट पद तथा गोपनीयताको शपथग्रहण गरे ।

हाल यादव उपप्रधानमन्त्रीको हैसियतमा सरकारमा छन्, कार्यकारी हैसियतमा पार्टी नेतृत्वमा छन् । पार्टीमा बहुमत उनकै पक्षमा हुँदा सरकार छाड्न निरन्तर दबाब दिने भट्टराईको एजेण्डा आइतबार बसेको पार्टी सचिवालय बैठकबाट समेत पारित हुन सकेन ।

संकटमा यादव, वार्तामा माग्छन् कि दिन्छन् ?

प्रधानमन्त्री केपी शर्मा ओलीले नरुचाइरहँदा पनि यादव सरकारमा बसिरहेपछि अर्का अध्यक्ष बाबुराम भट्टराईले भर्खरै बसेको पार्टी सचिवालय बैठकमा एउटा जुक्ति निकाले, संविधान संशाेधन र सरकारमा सहभागिताका विषयमा सरकार र नेकपासँग वार्ता गर्ने ।

बाबुरामको सो जुक्तिअनुसार सरकार र नेकपासँग वार्ता गर्न अध्यक्षद्वय र अशोक राईसहितको पाँच सदस्यीय समिति बनेको छ ।पार्टीले मूलतः संविधान संशाेधनको एजेण्डा उठाइरहेको छ । यादव आजबाट औपचारिक रूपमा कानुन मन्त्रालयमा पदभार ग्रहण गर्दैछन् ।

उनको पार्टीले उठाएको एजेण्डाअनुसार संविधान संशाेधनको मस्यौदा तयार पार्ने जिम्मा अब यादव आफैंले सम्हालेको मन्त्रालयमा पुगेको छ ।

यादवसँग अब दुईवटा चुनौती छन् । पहिलो आफ्नै पार्टीले उठाएको मागअनुसार सरकारको तर्फबाट कसरी र कुन प्रारुपको संविधान संशाेधनको मस्यौदा मन्त्रालयबाट तयार पारी मन्त्रिपरिषदमा पेश गर्ने चुनौती उनीसँग छ ।

दोस्रो सम्भावित चुनौती भने उनलाई निल्नु न ओकल्नु हुन सक्छ । पार्टीले सरकार र नेकपासँग वार्ता गर्न यादवलाई जिम्मा दिएको छ । अब सरकारले समाजवादी पार्टीसँग वार्ता गर्न कानुनमन्त्री यादवकै संयोजकत्वमा वार्ता टोली गठन गर्‍यो भने उपेन्द्र के गर्लान् ?

प्रकाशित मिति: सोमबार, मंसिर ९, २०७६ १३:५३