संविधान संशोधनमा नेकपा तयार नभए संघीय समाजवादीले सरकार छोड्ने

A+ A A-

सत्तारुढ समाजवादी पार्टी नेपालले संविधान संशोधनका विषयमा सरकारले चित्तबुझ्दो जवाफ नदिए सरकार छोड्ने भएको छ । सरकारसँग ‘अन्तिम जवाफ’ माग्ने र त्यस्तो जवाफ चित्तबुझ्दो नभए सरकार छोड्ने निष्कर्षमा पार्टी पुगेको हो ।

कात्तिक २८ देखि ३० सम्म पार्टीको संघीय परिषद् र केन्द्रीय समिति बैठक बस्दैछ । उक्त बैठकमा संविधान संशोधनबारे सरकारको स्पष्ट धारणा माग्ने विषयमा छलफल हुने पार्टी नेता डा. शिवजी यादवले शिलापत्रलाई बताए ।

‘अन्तिम पटक सरकारसँग संविधान संशोधनका विषयमा जवाफ माग्ने तयारी छ, चित्तबुझ्दो र विश्वसनीय जवाफ नआए सरकारबाट बाहिरिएर जनताका बीचमा जानुको विकल्प छैन,’ उनले भने ।

संविधान संशोधनको विषय राजनीतिक निर्णयकै रूपमा अगाडि आए अझ विश्वासको वातावरण बन्ने उनको भनाइ छ । १८ जेठ २०७५ मा तत्कालीन संघीय समाजवादी फोरम सरकारमा सहभागी भएको थियो ।

सरकारमा सहभागी हुनुअघि नेपाल कम्युनिस्ट पार्टी (नेकपा) सँग फोरमले दुईबुँदे सहमति गरेको थियो । सहमतिमा फोरमले आन्दोलनका क्रममा उठाएका माग र मुद्दाहरूमा देश र जनताको पक्षमा संविधान संशोधन गरी सम्बोधन गरिने र उपरोक्त सहमतिका आधारमा संघीय समाजवादी फोरम, नेपाल सरकारमा सामेल हुने उल्लेख थियो ।

तर, फोरम सरकारमा सहभागी भएको डेढ वर्ष पुग्न लाग्दा पनि संविधान संशोधनका विषयमा औपचारिक छलफल भएको छैन ।

२३ वैशाखमा तत्कालीन नयाँ शक्ति नेपाल र फोरमबीच एकता भई समाजवादी पार्टी नेपाल बनेको छ । हाल सरकारमा त्यतिबेलाको फोरमका तर्फबाट अध्यक्ष उपेन्द्र यादव उपप्रधान एवं स्वास्थ्यमन्त्री, सुरेन्द्रकुमार यादव स्वास्थ्य राज्यमन्त्री र मोहम्मद इस्तियाक राई सहरी विकासमन्त्री छन् ।

सरकार छाड्न दबाब

समाजवादी पार्टीका अध्यक्ष उपेन्द्र यादवलाई सरकार छाड्न पार्टीभित्रैबाट दबाब छ । संघीय परिषद्का अध्यक्ष डा. बाबुराम भट्टराईले यादवलाई सरकारबाट बाहिरिन दबाब दिइरहेका छन् ।

यसबाहेक राजपाले पनि उनलाई एकता गर्ने भए सरकारबाट बाहिरिन भनिरहेको छ । अहिले यी दुई पार्टीबीच एकीकरणको कुरा चलिरहेको छ ।

‘संघीय परिषद् र केन्द्रीय समिति बैठकको अर्को महत्त्वपूर्ण एजेण्डा भनेको राजपासँग एकीकरण नै हो, राजपाले समाजवादी पार्टी सरकार छाडेर एकीकरणमा आओस् भन्ने चाहेको छ,’ डा. यादवले भने ।

उपप्रधानमन्त्री यादवले पनि विभिन्न सार्वजनिक कार्यक्रममा संविधान नसच्चिए सरकार छाड्ने बताउँदै आएका छन् । यद्यपि, भित्रिरुपमा अध्यक्ष यादवले सरकार छाड्न चाहेका छैनन् । सरकार छाडेपछि संविधान संशोधनको मुद्दा थप कमजोर हुने तर्क उनले गर्दै आएका छन् ।

‘हामी नभई दुई तिहाई हुँदैन, दुई तिहाई नभई संविधान संशोधन हुँदैन, त्यसैले सरकार छाड्नु नै समाधान होइन भन्ने तर्क अध्यक्षज्यू (उपेन्द्र यादव) को छ,’ डा. यादवले भने ।

यद्यपि, नेकपा र सरकारले राम्रो ‘रेस्पोन्स’ नगरे सरकारमा बसिरहने पक्षमा अध्यक्ष यादव नरहेको उनले प्रस्ट पारे ।

समाजवादी फोरमले संविधान जारी भएदेखि नै केही मुद्दामा असन्तुष्टि व्यक्त गर्दै आएको छ । सो पार्टीले संविधान संशोधनअन्तर्गत, प्रदेश संरचना, नागरिकताका सवालमा मधेशी जनताको भावना सम्बोधन हुनुपर्ने अडान लिएको छ ।

संशोधनको सम्भावना

प्रधानमन्त्री एवं नेपाल कम्युनिस्ट पार्टीका अध्यक्ष केपी शर्मा ओलीले औचित्य र आवश्यकताका आधारमा संविधान संशोधन हुने बताउँदै आएका छन् । तत्काल संविधान संशोधन गर्ने पक्षमा उनी छैनन् ।

पूर्वमन्त्री एवं नेकपा नेता हरिबोल गजुरेल भन्छन्, ‘अहिले संविधान संशोधनको सम्भावना छैन, प्रधानमन्त्री पनि अहिले संविधान सच्याउनुपर्छ भन्ने कुराको पक्षमा देखिनुभएको छैन ।’

गजुरेलका अनुसार, संघमा समाजवादीले सरकार छाडे प्रदेश २ मा नेकपाले पनि सरकार छाड्ने सम्भावना हुन्छ ।

‘उहाँहरूले यता (संघ) सरकार छाड्नुभयो भने प्रदेश २ मा हामी पनि सरकार छाड्छौं, त्यसपछि कांग्रेस आउन पनि सक्छ, यो कुरा उहाँहरूलाई थाहा हुनुपर्छ,’ गजुरेलले भने ।

प्रकाशित मिति: सोमबार, कात्तिक २५, २०७६ १६:०१