भीम रावललाई प्रश्न– एमाले छाेड्‌ने निर्णयमा पुग्नुभएको हो ?

A+ A A-

एमालेका असन्तुष्ट नेता भीम रावलले बिहीबार काठमाडौंमा दिएको एउटा अभिव्यक्तिलाई उनी पार्टी छाेड्ने तयारीमा रहेको अर्थमा लिइएको छ । एमालेको महाधिवेशन प्रतिनिधि परिषद् बैठकमा परिचय कार्ड नदिएर वञ्जिच गरिएको प्रसंगलाई जोडेर आफूलाई घँचेटेर घुम्तीमा पुर्‍याइएको दाबी उनको छ ।

एमालेका पूर्वउपाध्यक्ष रावलले के पार्टी छाड्न लागेका हुन् त ? यसै प्रसंगमा शिलापत्रले रावलसँग संक्षिप्त कुराकानी गरेको छ ।

०००

तपाईंको आजको अभिव्यक्तिलाई पार्टी छाड्न लागेको संकेतमा रूपमा धेरैले अर्थ लगाएका छन् । त्यस्तै हो ?

तत्कालै त्यस्तो निर्णयमा म पुगेको छैन । मैले भनेको यत्ति मात्र हो, घँचेटेर मलाई घुम्तीमा पुर्‍याइएको छ ।

अब मोडिने बेला भयो भन्नुभएको ?

घुम्तीमा म पुगेको होइन, उहाँहरू (पार्टी नेतृत्व)ले पुर्‍याउनुभएको हो । अब कि रोकिनुपर्‍यो, कि मोडिनुपर्ने भयो । त्यो परिस्थितिमा म पुगेको पक्कै हो ।

मोडिने निर्णयकाे तयारीमा हाे ?

म एक्लै यो निर्णय गर्दिनँ । मेरा थुप्रै साथीहरू, शुभेच्छुकहरू छन् । उनीहरूसँग छलफल गर्छु र एउटा निर्णयमा पुग्छु ।

पार्टी नेतृत्वसँग तपाईंको असमझदारी किन यति लामो चल्यो ?

त्यो मेरो कारणले होइन । म अनेक व्यवहार हुँदा पनि पार्टी कसैको पेवा होइन, कार्यकर्ताको साझा हो भनेर बसेँ । कतिसम्म भयो भने जिल्ला अधिवेशनमा कांग्रेसका प्रतिनिधिलाई शुभकामना दिन बोलाइयो, म पूर्वउपाध्यक्ष, बहालवाला सांसद थिएँ तर बोलाइएन । त्यत्रो मध्यपहाडी यात्रा भयो, पूर्वउपाध्यक्ष पनि सँगै हिँड्न भनिएन ।

अध्यक्ष केपी ओली र तपाईंबीचको इगोले विवाद लम्बिएको भनिन्छ नि ।

मेरो केही इगो छैन । इगो भएको भए विष्णु पौडेलजीले वा केपीजीले बोलाउँदा किन जान्थेँ । चुनावमा एकल सिफारिस हुँदा टिकट दिइएन । इगो भएको भए म चुनाव लड्थेँ होला । त्यसैले यो इगोभन्दा पनि मप्रतिको प्रतिशोध हो । आफैँले दुःख कष्ट गरेर हुर्काएको पार्टी, १० वर्ष त म सेती अञ्चल इन्चार्ज भएँ । पार्टी निर्माण, विस्तार र संरक्षणमा काम गरेँ । नेतृत्व जेजस्तो भए पनि सँगै काम गरेको एउटा ठूलो पङ्क्ति एमालेमै छ भनेर बसेँ । पार्टीमा मतभेदहरू भइरहन्छन् । ती बदल्न सकिन्छ भनेर बसेँ तर अहिले प्रतिनिधि परिषद् बैठकमा सहभागी हुनबाटै वञ्चित गरियो । र, उल्टै 'को हो र भीम रावल ?' भनेर टीभीमा भन्न थालियो । पार्टीलाई पैतृक अंश ल्याएजस्तो उहाँहरूले स्वेच्छाचारी र निरंकुश व्यवहार देखाउनुभयो ।

भनेपछि तपाईं अब एमालेमा बस्नै नसक्ने स्थितिमा पुग्नुभयो ?

मैले भनिहालेँ नि, कि म घुम्तीमै उभिएर बस्नुपर्‍यो । कि घुम्ती आयो भनेर मोडिनुपर्‍यो । यसको अर्थ आजभोलिमै केही निर्णयमा पुगिहाल्ने भन्ने होइन । म अरुजस्तो अत्तालिएर, आक्रोशित भएर हतारहतारमा निर्णय गर्ने मान्छे होइन । बडो सोचविचार गरेर मेरा साथी, शुभेच्छुक र मप्रति सद्भाव राख्ने नेता/कार्यकर्ताको रायसल्लाहअनुसार चल्छु ।

प्रकाशित मिति: बिहीबार, वैशाख १३, २०८१ १८:३३