डीएभी विद्यालयमा राग र तालमिश्रित सांस्कृतिक कार्यक्रम ‘तरङ्ग’ सम्पन्न

A+ A A-

ललितपुरस्थित डीएभी सुशील केडिया विश्व भारती विद्यालयमा राग र तालमिश्रित सांस्कृतिक कार्यक्रम ‘तरङ्ग’ बुधबार विद्यालयको सभागृहमा भव्य रूपमा सम्पन्न भएको छ ।

भारतीय राजदूतावासका डेपुटी चिफ अफ मिसन श्री प्रसन्न श्रीवास्तवको मुख्य आतिथ्यतामा सम्पन्न भएको कार्यक्रममा भारतीय चर्चित कलाकारहरूको एकल प्रस्तुति थियो भने डीएभी विद्यालयको तर्फबाट विभिन्न प्रकारका सामूहिक तथा एकल प्रस्तुति रहेका थिए ।

डीएभी विद्यालय र सुशीला आर्ट एकेडेमीले संयुक्त रूपमा आयोजना गरेको उक्त कार्यक्रममा भारतीय चर्चित कलाकार शशी रमेशको भरतनाट्यम नृत्य, बिभाहरी आशिष नेभ्रेकारको कत्थक नृत्य र शिवप्रसाद एनएनको बेजोड गीत र सङ्गीतले उपस्थित सबैलाई मन्त्रमुग्ध बनाउन सफल भएका थिए ।

त्यसैगरी, डीएभी विद्यालयका विभिन्न तह र कक्षाका विद्यार्थीहरूले टाट्कर जय पुरी घराना र ठुम्रीमा आधारित कत्थक नृत्य, काशी विश्वनाथम कथामा आधारित भरतनाट्यम नृत्य र उत्तर–दक्षिण भारतको क्लासिकल जुगलबन्दी नृत्यलाई बेजोड रूपमा प्रस्तुत गरेका थिए ।

साथै, केही समसामयिक चर्चित नेपाली र हिन्दी गीत सङ्गीतलाई समेत क्लासिकल विद्याका विभिन्न तालमा प्रस्तुत गरेका थिए । तरङ्गको राग आयामलाई घनिभूत तुल्याउन डीएभी विद्यालयका विद्यार्थीहरूले एकल, युगल र सामूहिक गीत प्रस्तुत गरे । कार्यक्रममा साहित्य, सङ्गीत र कला अनुरागी, अभिभावक, शिक्षक र विद्यार्थीहरूको उपस्थिति थियो ।

कार्यक्रममा सुशीला आर्ट एकेडेमीकी संस्थापक एंव अध्यक्ष युलीया कोइरालाले स्वागत मन्तव्यसहित गीत सङ्गीत र नृत्यले शिक्षा क्षेत्रमा पुर्‍याइरहेको अतुलनीय योगदानको चर्चा गर्दै डीएभी विद्यालयका अध्यक्ष अनिल केडिया र प्राचार्य डा. भुवनेश्वरी रावको साहित्य र कलाप्रतिको समर्पणको मुक्त कण्ठले प्रशंसा गरिन् ।

कार्यक्रमलाई सम्बोधन गर्दै भारतीय दूतावासका डेपुटी चिफ अफ मिसन प्रसन्न श्रीवास्तवले कार्यक्रमका आयोजकले दुई देशबीच साहित्य, कला र संस्कृति आदान–प्रदान र जगेर्ना गर्ने अभियानमा पुर्‍याइरहेको योगदानको चर्चा गर्दै उपस्थित सम्पूर्ण विद्यार्थी, अविभावक, शिक्षक र साहित्यानुरागीहरूलाई उत्तरोत्तर प्रगतिको शुभकामना दिएका थिए ।

DAV (1)1714033093.JPG

सो अवसरमा उनले अनादिकालदेखि नेपाल–भारतबीच रहेको पारस्परिक तथा अन्योन्याश्रित सम्बन्धमा सांस्कृतिक भूमिकाको विस्तृत रूपमा चर्चा गरेका थिए ।

कार्यक्रममा प्रस्तुत भएका भारतीय कलाकारलगायत डीएभी विद्यालय र सुशीला आर्ट एकेडेमीसम्बद्ध सङ्गीत र नृत्य विभागका सम्पूर्ण शिक्षकहरूलाई मुख्य अतिथि श्रीवास्तव, उनकी धर्मपत्नी श्रीमती निधी श्रीवास्तव र विद्यालयकी प्राचार्य डा. भुवनेश्वरी रावले मायाको चिनोसहित प्रशंसापत्र प्रदान गरेका थिए ।

उपस्थित पाहुनाको स्वागत र सत्कारका लागि विद्यालयका उप–प्राचार्य रामचन्द्र खनाल, सीएओ विजया टाटर, एसएसओ प्रशान्त सामल र प्लस टु को–अर्डिनेटर टेङ्क मेघजी देवजीलगायत विभिन्न तहका कोअर्डिनेटरहरूको उपस्थिति थियो ।

शिक्षकद्वय शशिलता राई र मोहिनी तामाङले सञ्चालन गरेको सो कार्यक्रम आस्था ठाकुरको मन्तव्यसहित औपचारिक रूपमा समापन भएको थियो ।

प्रकाशित मिति: बिहीबार, वैशाख १३, २०८१ १३:५०