नेकपामा कार्यदिशा बहस : जज कि जबज ?

फाइल तस्वीर

A+ A A-

अबको कार्यदिशा के हो ? सत्तारुढ नेपाल कम्युनिस्ट पार्टी (नेकपा)भित्र यस विषयमा माथापच्ची चलिरहेको छ । काठमाडौंमा जारी स्थायी कमिटी बैठकमा अध्यक्षद्वय केपी शर्मा ओली र पुष्पकमल दाहाल ‘प्रचण्ड’ले राजनीतिक प्रतिवेदन पेश गरेका छन् । प्रतिवेदनमा पार्टीको तात्कालिक कार्यनीति र रणनीतिक लक्ष्यबारे प्रस्ताव गरिएको छ । तात्कालिक कार्यनीतिमा ‘समाजवादोन्मुख जनताको जनवाद’ भन्ने छ भने ‘वैज्ञानिक समाजवाद हुँदै साम्यवाद’ रणनीतिक लक्ष्यका रूपमा प्रस्तावित छन् ।

तर, स्थायी कमिटीमा पेश गरिएको यो प्रस्तावप्रति सदस्यहरू वैचारिकरूपमा ध्रुविकृत देखिएका छन् ।

बैठकमा अहिलेसम्म बोलेका अधिकांश सदस्यले कार्यदिशा प्रस्ट नभएको भन्दै समाजवादी कार्यक्रम र कार्यदिशा तय गर्नुपर्नेमा जोड दिएका छन् ।

तर, स्थायी कमिटी सदस्य शंकर पोखरेलले जनताको बहुदलीय जनवाद (जबज) हुँदै समाजवादमा जानुपर्ने सुझाव दिएका छन् । ‘जनताको बहुदलीय जनवाद नै नेकपाको मार्गदर्शक सिद्धान्त हुनुपर्छ,’ नेता पोखरेलले बैठकमा भने ।

उनले नेपालमा लोकतान्त्रिक गणतन्त्र स्थापनासँगै आधारभूत रूपमा जनवादी क्रान्ति सम्पन्न भएको पनि बताए । ‘जबजको सबै मान्यता र विशेषता स्वीकार गरिसकेपछि जबज स्वीकार गर्न किन अप्ठेरो भनी उनले प्रश्नसमेत गरे ।

नेता ईश्वर पोखरेल, विष्णु रिमाल र प्रदीप ज्ञवालीले पनि घुमाउरो भाषामा जबजलाई समाजवादको बाटो बनाउनुपर्ने मत राखेका छन् । उनीहरूले बहुदलीय प्रतिस्पर्धात्मक प्रणालीबाट नै मुलुकमा समाजवाद स्थापना गर्न सकिनेमा जोड दिए ।

यीबाहेक अन्य सदस्यले सिधै समाजवादी कार्यदिशा तथा न्यूनतम कार्यक्रम तय गरी अघि बढ्नुपर्ने बताए । उनीहरूले अहिले प्रस्ताव गरिएको रणनीतिक लक्ष्य र तात्कालिक कार्यक्रम अस्पष्ट रहेको टिप्पणी गरे ।

नेताहरू माधवकुमार नेपाल र नारायणकाजी श्रेष्ठले जनवादको कार्यदिशा काम छैन भनेका छन् । नेता नेपालले पार्टीले अब सिधै समाजवादी बाटो अँगाल्नुपर्नेमा जोड दिए । श्रेष्ठले पनि यही लाइनमा बोले ।

तर, वरिष्ठ नेता झलनाथ खनालले भने प्रस्तावित प्रतिवेदन आधारभूत रूपमा ठीक रहेको बताएका छन् ।

‘हामीकहाँ ०६२/६३ को जनक्रान्तिमार्फत् पुँजीवादी–जनवादी क्रान्ति पूरा भएको छ,’ खनालले भने, ‘अब समाजवादी क्रान्ति र निर्माणको युगमा हामी प्रवेश गरेका छौं ।’

प्रचण्डले पेश गरेको प्रतिवेदनमाथि शुक्रबारसम्म स्थायी कमिटीका ४२ र आमन्त्रित ४ गरी ४६ सदस्यले बोलेका छन् । शनिबारको बैठकमा अध्यक्षद्व ओली र प्रचण्ड तथा महासचिव विष्णु पौडेलले सदस्यहरूले उठाएका प्रश्नको जवाफ दिनेछन् ।