४१ पुरुष र २ महिला प्राध्यापक भीसीका‍‍े प्रतिस्पर्धामा, पूर्वभीसीदेखि बहालवालासम्म लाइनमा

४१ पुरुष र २ महिला प्राध्यापक भीसीका‍‍े प्रतिस्पर्धामा, पूर्वभीसीदेखि बहालवालासम्म लाइनमा

A+ A A-

‘भीसीको आवेदन दिने लाइन हो ? ओहो ! तपाईं पनि लाइनमा ?,’ त्रिभुवन विश्वविद्यालयको उपकुलपतिका लागि दरखास्त दिन शिक्षा मन्त्रालयको उच्च शिक्षा शाखामा पुगेका एक प्राध्यापकले अर्को प्राध्यापकलाई प्रश्न गरिरहेका थिए ।

आवेदन दिन लाइनमा बसेका एक प्राध्यापकले अर्को प्राध्यापकलाई हात मिलाउँदै बधाई पनि दिइरहेका थिए । ‘भीसी हुनेले त बिहानै दरखास्त दिएर गइसके रे नि,’ एकअर्कामा उनीहरू वार्तालाप गरिरहेका थिए ।

कतिपयले कागजात पूरा नल्याएकाले दर्ता गर्न पनि पाएनन् । केही प्राध्यापक त समय घर्किएपछि दरखास्त दिन पुगेका थिए । ‘५ बझ्नै बाँकी छ । यति छिट्टै बन्द भएछ । म भीसीका लागि योग्य थिएँ । तर भएन,’ ती प्राध्यापकले भने । उनले आफ्नो नाम भने खुलाउन चाहेनन् ।

आफ्नो सहयोगीलाई उनले पहिले नै पठाएका थिए तर कागजात संकलन गर्दा र उनी जाममा परेकाले ४ बजेपछि आवेदन दिन पुग्दा ढोका बन्द भइसकेकाले उनले दर्ता गर्नै पाएनन् । ढोका बन्द गरेर निस्केका कर्मचारीले भने, 'समय सकियो ।'

त्रिविको उपकुलपतिका लागि आवेदन दिएका ४३ जना को-को हुन् ? (सूचीसहित)

अर्का एक प्राध्यापकले भने, ‘होइन, प्राध्यापक पनि कति लोभी भएका ? यसरी लाइन लागेरै त के भीसी हुनु ?’ सर्च कमिटीले दरखास्तका लागि १५ दिनको समय दिएको थियो । उपकुलपतिका लागि दरखास्त दिने अन्तिम दिन भएकाले तोकिएको समय दिउँसो ४ बजेसम्म प्राध्यापकको भिड लागेको थियो ।

5d649e19-7f13-442a-9995-2ff32b8da080 (2)1705928068.jpg

मन्त्रालयका अनुसार उपकुलपतिका लागि ४३ जनाले आवेदन दिएका छन्, जसमा दुई जना महिला प्राध्यापक छन् । मानविकी तथा समाजशास्त्र संकायकी डीन डा. कुसुम शाक्य र प्राडा संगीता रायमाझीले भीसीका लागि दरखास्त दिएका छन् । ‘अधिकारका लागि पनि दिनैपर्छ भनेर दिएको हुँ,’ शाक्यले भनिन्, ‘निष्पक्ष ढंगले होस् । यो प्रतिस्पर्धाले म कहाँ छु, के छु भन्ने पनि थाहा हुन्छ ।’

उपकुलपतिका लागि दरखास्त दिनेमा ४१ पुरुष प्राध्यापक छन् । त्रिविका पूर्वउपकुलपतिदेखि मध्यपश्चिम विश्वविद्यालयका बहालवाला उपकुलपतिले समेत दरखास्त दिए । मध्यपश्चिम विश्वविद्यालयका उपकुलपति प्राडा नन्दबहादुर सिंहले दरखास्त दिएका हुन् । तत्कालीन प्रधानमन्त्री केपी ओलीले १८ फागुन २०७६ मा सिंहलाई उपकुलपतिमा नियुक्त गरेका थिए । उनको कार्यकाल फागुनमा सकिँदै छ ।

तर, उनी यता त्रिविको भीसीका लागि दरखास्त दिन शिक्षा मन्त्रालय आइपुगेका थिए । त्यसैगरी, त्रिविका पूर्वउपकुलपति प्राडा तीर्थ खनियाँले पनि आवेदन दिए । मन्त्रालय स्रोतका अनुसार उनी आफैँ भने उपस्थित भएका थिएनन् । सहयोगीमार्फत उनले दरखास्त दिएका हुन् । त्रिभुवन विश्वविद्यालयका पूर्वरजिस्ट्रार प्राडा चन्द्रमणि पौडेलले पनि उपकुलपतिका लागि दरखास्त दिएका छन् ।

96ae5dae-4088-4792-b1fa-7a83d977232d (2)1705928084.jpg

‘मैले हिजो नै दिएको छु,’ उनले भने, ‘अब के हुन्छ, हेरौँ ।’ पौडेल राष्ट्रिय परीक्षा बोर्डको अध्यक्षसमेत भइसकेका व्यक्ति हुन् । सुरुदेखि नै उनी उपकुलपतिको रेसमा छन् । पौडेलले कुलपतिसमेत रहेका प्रधानमन्त्री पुष्पकमल दाहाल प्रचण्डलाई भेटेर त्रिवि सुधारका लागि लिखित रूपमा पत्रसमेत बुझाएका छन् ।

गत १९ पुसमा राष्ट्रियसभाको प्रत्यायोजित व्यवस्थापन तथा सरकारी आश्वासन समितिमा उनले त्रिवि सुधारको मार्गचित्र पेस गरेको बताएका थिए । त्रिभुवन विश्वविद्यालयका कार्यवाहक उपकुलपति प्राडा शिवलाल भुसालले उपकुलपतिका लागि दरखास्त दिएका छन् । उपकुलपति धर्मकान्त बाँस्कोटाको कार्यकाल १६ कात्तिक २०८० मा सकिएपछि भुसाललाई कार्यवाहक उपकुलपतिको जिम्मेवारी दिइएको छ । कामु उपकुलति चलाइरहेका भुसाल पनि सुरुदेखि नै भीसी बन्ने दौडमा छन् ।

त्यसैगरी, खुला विश्वविद्यालयका पूर्वउपकुलपति लेखनाथ शर्माले दरखास्त दिएका छन् । ‘साथीहरूले दिनुपर्छ भनेर भन्नुभयो । प्रतिस्पर्धा धेरै रहेछ,’ उनले भने । त्यस्तै, प्राध्यापकहरू टंक धमला, महानन्द चालिसे, भोजराज अर्याल, प्रकाश घिमिरे, केदार घिमिरे, कृष्णराज तिवारीलगायतले उपकुलपतिका लागि दरखास्त हालेका छन् ।

60f93e27-4c72-408e-89f9-5e2e9621e37b (2)1705928115.jpg

यी नाम दरखास्त दिन पुगेका प्राध्यापकबाट संकलन गरिएको हो । उपकुलपति नियुक्तिका लागि नाम सिफारिस गर्न गठित सर्च कमिटीले दरखास्त दिनेको नाम सार्वजनिक गरेको छैन । त्रिवि उपकुलपति नियुक्तिका लागि पहिलोपटकको दरखास्त आह्वानमा विरोध भएपछि दोस्रोपटक २३ पुसमा निकालिएको थियो ।

समितिले यसअघि पहिलोपटक २० पुसमा सार्वजनिक गरेको सूचनामा विश्वविद्यालयको पदाधिकारीमा न्यूनतम तीन वर्ष काम गरेको व्यहोरा खुलाउनुपर्ने विषयसमेत समेटिएपछि आलोचना भएको थियो ।

त्यसपछि प्रधानमन्त्री एवं विश्वविद्यालयका कुलपति पुष्पकमल दाहाल प्रचण्डले उक्त प्रावधान हटाउन निर्देशन दिएका थिए । प्रधानमन्त्रीको निर्देशनपछि समितिले पहिलोपटक प्रकाशन गरेको विज्ञापन रद्द गरी दोस्रोपटक सूचना निकालेको थियो । अब सर्च किमिटीले नाम सिफारिस गरेपछि प्रधानमन्त्रीले उपकुलपति नियुक्त गर्नेछन् ।