राष्ट्रियसभा अध्यक्ष र बंगलादेशका राष्ट्रपतिबीच शिष्टाचार भेट

A+ A A-

राष्ट्रियसभा अध्यक्ष गणेशप्रसाद तिमिल्सिना र बंगलादेशका राष्ट्रपति मोहम्मद अब्दुल हमिदबीच भेटवार्ता भएको छ । भेटमा दुई देशबीचको आपसी सम्बन्ध र सहकार्यबारे कुराकानी भएको छ ।

भेटमा राष्ट्रपति हमिदले दूरीले नजिक भएका दुई देशबीच आर्थिक विकासका लागि सहकार्यका थुप्रै क्षेत्र रहेको बताए । राष्ट्रपति हमिदले बङ्गलादेशको स्वतन्त्रता संग्राममा समर्थन गर्ने नेपाल ७औं राष्ट्र भएको बताउँदै उक्त समर्थनको प्रशंसा गरे ।

त्यसैगरी दुई देशको जनस्तर र संसदीय सम्बन्धलाई अभिवृद्धी गर्न भ्रमण आदन–प्रदान गर्नुपर्ने बताउँदै राष्ट्रपति हमिदले अध्यक्ष तिमिल्सिनालाई बंगलादेश भ्रमणका लागि विशेष निमन्त्रणा गरेका अध्यक्ष तिमिल्सिनाको सचिवालयले जानकारी दिएको छ ।

नेपाल जस्तो सुन्दर र नजिकको देशमा अघिल्लो वर्ष २० हजारभन्दा बढी बङ्गलादेशीले नेपाल भ्रमण गरेको जानकारी गराउँदै यसलाई बृद्धि गर्न सकिने राष्ट्रपति हमिदको धारणा छ ।

एक अर्काे प्रशंगमा राष्ट्रपति हमिदले बङ्गलादेशमा पढ्ने नेपाली विद्यार्थीको भिषा समस्या समधानमा आफूले पहल गर्ने प्रतिबद्धता व्यक्त गरे ।

अध्यक्ष तिमिल्सिनाले नेपाल र बङ्गलादेशको कूटनीतिक सम्बन्ध कायम भएदेखि नै मैत्रीपूर्ण रहेको बताए । दुई देशबीच व्यापार, पर्यटन र संस्कृतिजस्ता क्षेत्रमा आपासी हितका लागि सहकार्य गर्न सकिने अध्यक्ष तिमिल्सिनाको भनाइ छ ।

नेपाल राजनीतिक मुद्दा समधानपछि विकास र समृद्धिमा केन्द्रित रहेको जानकारी गराउँदै अध्यक्ष तिमिल्सिनाले बङ्गलादेशको सहयोगको अपेक्षा गरे । बंगलादेशसँग नेपालको व्यापार घाटा छ । यसलाई कम गर्नका लागि जलविद्युत र पर्यटनका क्षेत्रको सहकार्य बढाउनु उपयुक्त हुने तिमिल्सिनाको धारणा छ । जलविद्युत उत्पादन, ग्रिड जडान र विद्युत प्रवाहमा सहकार्य गर्दा दुबै देशलाई फाइदा पुग्ने उनले विचार अध्यक्ष तिमिल्सिनाले राखे ।

अध्यक्ष तिमिल्सिनाले नेपालले सन् २०२० लाई नेपाल भ्रमण वर्षका रुपमा मनाउन लागेकाले गर्मी मौसममा शितलता लागि बङ्गलादेशी जनातालाई राष्ट्रपतिमार्फत नेपाल भ्रमणको निम्ता गरे । त्यसैगरी, अध्यक्ष तिमिल्सिनाले दुई देशको जनस्तर र संसदीय सम्बन्ध अभिवृद्धी गर्नुपर्ने धारणा राख्दै भ्रमण तथा अनुभव आदान–प्रदान हुनुपर्ने धारणा राखे ।

प्रकाशित मिति: बुधबार, कात्तिक २७, २०७६ १६:१७