क्यान अध्यक्ष भन्छन्– खेलाडीलाई एसी बसमा ल्याएका थियाैँ, त्यो भिडियो पनि भाइरल बनाइदिए हुन्थ्याे

क्यान अध्यक्ष भन्छन्– खेलाडीलाई एसी बसमा ल्याएका थियाैँ, त्यो भिडियो पनि भाइरल बनाइदिए हुन्थ्याे

A+ A A-

नेपालसँग ५ टी– २० सिरिज खेल्न आएको वेस्ट इन्डिज ए क्रिकेट टोलीको स्वागत गर्न स्वयम् क्रिकेट म्यानेजर विनोद दास त्रिभुवन अन्तर्राष्ट्रिय विमानस्थलमा पुगे । खेलाडीहरूलाई खादा लगाएर स्वागत गरे । यहाँसम्म सबै राम्रै चलिरहेको थियो । तर, जब खेलाडीले किटब्याग गाडीमा राखेको भिडियो सामाजिक सञ्जालमा बाहिरियो, त्यो एकै क्षणमा भाइरल बन्यो । सो भिडियोले सामाजिक सञ्जाल रंगिएको छ । यो भिडियो स्वदेशमा मात्रै सीमित रहेन, बरु नेपाल बाहिरसमेत नेपालको खिल्ली उडाउन प्रयोग भएको छ ।

त्यो भिडियोमा खेलाडीहरूले आफ्नो किटब्याक एक पुरानो देखिने पिकअप भ्यानमा राखेको देखिन्छ । भ्यान निकै पुरानो मात्र छैन, त्यसको छतसमेत छैन । यसकै कारण नेपाल क्रिकेट संघ (क्यान) को आलोचना गर्दै सो भिडियोलाई भाइरल बनाइएको छ ।

यसरी भिडियो भाइरल बनाएर क्यानको बेइज्जत गरिएको क्यानका अध्यक्ष चतुरबहादुर चन्दको गुनासो छ । उनले शिलापत्रसँग भने, ‘संसारकै चलन खेलाडीले आफ्नो किट ब्याग आफैँ गाडीमा राख्नेछ । यहाँ पनि आफैँ राखेका हुन् । खेलाडीहरू निकै खुसी छन् । तर, यहाँ भिडियो भाइरल बनाएर देशकै बेइज्जत गरिएको छ । यसले कसलाई राम्रो भयो ?’ उनले किटब्याक राखेको गाडी पुरानो भएको भने स्वीकार गरे । तर, त्यो गाडी सामान राख्न मात्र प्रयोग भएको उनले बताए । उनले भने, ‘खेलाडीहरूलाई एसी बसमा ल्याएका हौँ, त्यो भिडियो पनि भाइरल बनाइदिएको भए हुने थियो । तर, किटब्याग राखेको मात्र भाइरल बनाइयो ।’

वेस्ट इन्डिज दुईपटकको एकदिवसीय र टी– २० विश्वकप विजेता टिम हो । नेपालमा क्रिकेट खेल्न आएको यो नै अहिलेसम्मको सबैभन्दा माथिल्लोस्तरको टोली पनि हो । टेस्ट राष्ट्रको ए टोलीको नेपाल भ्रमण विमानस्थलमा उच्चस्तरीय स्वागतदेखि नेपालको क्रिकेट क्रेजसम्म देखाउने अवसर थियो, जसमा क्यान केही चुकेको छ ।

सामान राख्न प्रयोग गरेको गाडीको भिडियोलाई लिएर देश र देशबाहिर पनि आलोचना भएको छ । भारतीय सञ्चारमाध्यम पञ्जाब केशरीले वेस्ट इन्डिजको टोलीलाई लिन नेपालले सानो हात्ती पठाएको भन्दै यो घटनालाई मजाक बनाएको छ । पञ्जाब केशरीले समाचारमा नेपाल पुगेको वेस्ट इन्डिजको टोलीलाई विमानस्थलमा लिन एउटा सानो हात्ती र अर्को कन्डिसन बिग्रिसकेको पुरानो गाडी गएको टिप्पणीसहित समाचार बनाएको छ ।

उसले वेस्ट इन्डिजका खेलाडी पनि नेपालले गरेको यस्तो व्यवहारका कारण अचम्मित भएको उल्लेख गरेको छ । नेपालमा भएको यस्तो स्वागतको भिडियो क्रिकेट विश्लेषक तथा लेखक निब्राज रहमानले समेत ट्विटरमा शेयर गरेका छन्, जसमा धेरैले नेपालको स्वागतलाई हँसिमजाक बनाएका छन् भने कतिपयले वेस्ट इन्डिजको स्तर यो अवस्थामा पुगेको हो भन्दै प्रश्न गरेका छन् ।

प्रकाशित मिति: शुक्रबार, वैशाख १४, २०८१ १६:२१