ग्लोबल टी–२० को दोस्रो राउन्डमा कोसँग कहिले खेल्दै छन् सन्दीप र सोमपालको टिम ?

ग्लोबल टी–२० को दोस्रो राउन्डमा कोसँग कहिले खेल्दै छन् सन्दीप र सोमपालको टिम ?

A+ A A-

क्यानडामा जारी ग्लोबल टी–२० को पहिलो राउन्ड सकिएको छ । पहिलो राउन्डमा सन्दीप लामिछानेले सन्तोषजनक प्रदर्शन गरे पनि सोमपाल कामीको प्रदर्शन निराशाजनक नै रह्यो । पहिलो राउन्डको समाप्तिसँगै आजबाट दोस्रो राउन्ड सुरु हुँदै छ ।

पहिलो राउन्डका ५ खेलमा ८ अंक जोडेको ब्राम्प्टन वुल्भ्स शीर्ष स्थानमा छ भने ७ अंकका साथ डिफेन्डिङ च्याम्पियन भ्यानकुभर नाइट्स दोस्रो स्थानमा अवस्थित छ । यस्तै, मोन्ट्रियल टाइगर्सले ५ अंकका साथ तेस्रो स्थानमा छ । समान ४ अंक जोडेका सन्दीपको टोरन्टो नेसनल्स र सोमपालको विन्निपेग हक्स नेट रनरेटका आधारमा क्रमशः चौथो र पाँचौं स्थानमा छन् । २ अंक मात्र जोड्न सफल एडमन्टन रोयल्स अंक तालिकाको पुछारमा छ ।

पहिलो राउन्ड सिंगल राउन्ड रोबिनका आधारमा खेलाइए पनि दोस्रो राउन्ड प्लेअफ कम नकआउटका आधारमा खेलाइनेछ । प्लेअफमा आफ्नो स्थान सुरक्षित गर्न सबै ६ टिमले अंक तालिकाको स्थानका आधारमा प्रतिस्पर्धा गर्नेछन् ।

पहिलो भएको ब्राम्प्टनले अन्तिम भएको एडमन्टनको सामना गर्नेछ भने सोमपालको विन्निपेगले डिफेन्डिङ च्याम्पियन भ्यानकुभरसँग प्रतिस्पर्धा गर्नेछ । यस्तै, सन्दीपको टोरन्टोले सन्दीपकै पूर्वक्लब मोन्ट्रियलको सामना गर्नेछ ।

दोस्रो राउन्डका विपक्षीसँग कस्तो थियो पहिलो राउन्डमा प्रदर्शन ?

सोमपालको टिम विन्निपेगले पहिलो राउन्डको दोस्रो खेलमा भ्यानकुभरसँग प्रतिस्पर्धा गरेको थियो । रोमञ्चक खेलमा आक्रामक ब्याटिङ गर्दै भ्यानकुभरले दिएको २०८ रनको विशाल लक्ष्य विन्निपेगले झन् विस्फाेटक ब्याटिङ गर्दै १५.२ ओभरमै पूरा गरेको थियो । क्रिस गेलले २७ बलमा ४५ रन तथा भान डेर डुसेनले २० बलमा ३९ रन बनाएपछि भ्यानकुभरले २० ओभरमा ५ विकेट गुमाउँदै २०८ रन बनाएको थियो ।

असम्भव मानिएको विशाल लक्ष्यसहित जवाफी ब्याटिङमा आएको विन्निपेगले १५.२ ओभरमा कीर्तिमानी जित निकाल्न सफल भयो । विन्निपेगका लागि क्रिस लिनले ३४ बलमा ७४ रन तथा जेपी डुमिनीले ३८ बलमा नटआउट ७७ रन बनाएपछि जित सम्भव भएको हो । सोमपाल त्यसबेला राष्ट्रिय टिमका लागि सिंगापुरमा एसियन छनोट खेल्न व्यस्त भएकाले टिममा थिएनन् ।

यस्तै, सन्दीपको टोरन्टोले अन्तिम खेलमा उनको पूर्व क्लब मोन्ट्रियलसँग प्रतिस्पर्धा गरेको थियो । टस हारेर ब्याटिङको निम्तो पाएको मोन्ट्रियलले निर्धारित २० ओभरमा ९ विकेट गुमाउँदै १३६ रन जोडेको थियो ।

जवाफी ब्याटिङमा आएको टोरन्टोले १७.३ ओभरमा ६ विकेट गुमाउँदै लक्ष्य पूरा गरेको थियो । अघिल्लो खेलभन्दा प्रदर्शन सुधारेका सन्दीपले ४ ओभर बलिङ गर्दै २८ रन दिएर १ विकेट लिएका थिए । सन्दीपले १५ बलमा ९ रन बनाएर खेलिरहेका म्याथ्यु क्रसलाई एलबीडब्ल्यू आउट गरेका थिए ।

कस्तो छ दोस्रो राउन्डको सम्भावना ?

सोमपालको टिमका तुलनामा सन्दीपको टिमले कमजोर प्रतिद्वन्द्वी पाएको छ । डिफेन्डिङ च्याम्पियन समेत रहेको भ्यानकुभर र विन्निपेग दुवैको बलियो पक्ष ब्याटिङ लाइनअप हो त्यसैले पनि उनीहरुबीचको पहिलो राउन्डको खेल हाइस्कोरिङ भएको थियो ।

फुल टाइम बलरले आशातित प्रदर्शन नगरेकाले विन्निपेग अलराउन्डरको भर पर्न बाध्य छ । दुवै टिमको ब्याटिङ लाइन अप समान रुपमा बलियो भए पनि भ्यानकुभरको बलिङ लाइन अप तुलनात्मक रुपमा बलियो छ त्यसैले उसलाई रणनीतिक फाइदा छ ।

सो खेलमा जुन टिमले टस जित्यो, उसैले खेल जित्ने सम्भावना छ । दुवै टिमले टस जितेर सुरुमा ब्याटिङ नै रोज्नेछन् । बलियो ब्याटिङका कारण टार्गेट डिफेन्ड गर्नभन्दा दुवैलाई टार्गेट पछ्याउन सहज हुन्छ ।

दुवै टिमले पहिलो राउन्डमा टार्गेट पछ्याउँदा सहज जित निकालेका छन् । पहिलो राउन्डमा विन्निपेगको तुलनामा भ्यानकुभरका बलरको प्रदर्शन सन्तोषजनक छ त्यसैले भ्यानकुभरले पहिले ब्याटिङ गरे पनि उसलाई हराउन त्यति सहज हुनेछैन ।

दोस्रो राउन्डका खेल हुने समय :
ब्राम्प्टन वुल्भ्स भर्सेस एडमन्टन रोयल्स
राति १०ः१५ बजे, मंगलबार, २१ साउन

भ्यानकुभर नाइट्स भर्सेस विन्निपेग हक्स
बिहान २ः१५ बजे, बुधबार, २२ साउन

मोन्ट्रियल टाइगर्स भर्सेस टोरन्टो नेसनल्स
राति १०ः१५ बजे, बुधबार, २२ साउन

प्रकाशित मिति: बुधबार, साउन २२, २०७६ ०२:२१