बलियो वेस्ट इन्डिजविरुद्ध नेपाललाई आत्मविश्वास भर्ने चुनौती ! (भिडियाे)

A+ A A-

वेस्ट इन्डिज एसँगको पाँच टी–२० खेलको शृङ्खला शनिबारदेखि सुरु हुँदै छ । पहिलो खेल शनिबार दिउँसो १ बजे त्रिवि क्रिकेट मैदान कीर्तिपुरमा सुरु हुनेछ । अर्को महिना अमेरिका र वेस्ट इन्डिजमा हुने टी– २० विश्वकपअघि नेपालले घरेलु मैदानमा खेल्न लागेको यो अन्तिम शृङ्खला हो । यसलगत्तै नेपाल थप अभ्यासका लागि वेस्ट इन्डिज नै जाँदै छ ।

कीर्तिपुरमा हुने टी– २० शृङ्खलाका लागि वेस्ट इन्डिजको टोली नेपाल आइसकेको छ । वेस्ट इन्डिज ए टोलीमा अधिकांश खेलाडी सिनियर टोलीमा खेलिसकेका छन् । दुईपटकको टी– २० र एकदिवसीय विश्वकप विजेता टोली वेस्ट इन्डिज बलियो टेस्ट राष्ट्र हो । आईसीसीको टी– २० वरीयतामा वेस्ट इन्डिज सातौँ स्थानमा छ भने नेपाल १६औँ स्थानमा छ ।

वेस्ट इन्डिज ‘ए’ टोलीमा तीन जनाबाहेक सबै खेलाडी सिनियर टोलीबाट खेलिसकेका छन् । वेस्ट इन्डिजको कप्तानी अलराउन्डर रोस्टन चेजले गर्नेछन् । उनले आफ्नो राष्ट्रका लागि ४९ टेस्ट र ११ टी– २० खेल खेलेका छन् । वेस्ट इन्डिजको टोलीमा किमो पाउल, आन्द्रे फ्लेचर, जोन्सन चार्ल्सजस्ता अनुभवी तथा म्याथ्यु फर्ड, एलिक एथानाज र केसी कार्टीजस्ता उदीयमान खेलाडी छन् । त्यसैले वेस्ट इन्डिजसँगको शृङ्खला नेपालका लागि टी– २० विश्वकपअघि निकै महत्त्वपूर्ण हुनेछ । हालै भएको एसीसी प्रिमियर कपमा चौथो बनेर निराश नेपाली टोलीका लागि यो सिरिज स्तरमापनका लागि पनि महत्त्वपूर्ण हुनेछ ।

टी–२० विश्वकपमा नेपाल रहेको समूहमा दक्षिण अफ्रिका, श्रीलंका, नेदरल्यान्ड्स र बंगलादेश रहेका छन् । एकदिवसीयमा नेपालले भारत र पाकिस्तानसहित विश्वका पावरहाउस मानिने राष्ट्रसँग प्रतिस्पर्धा गरे पनि टी– २० मा बलिया राष्ट्रसँग प्रतिस्पर्धा गर्ने अवसर पाएको छैन । एसीसी प्रिमियर कपमा यूएईसँग पराजित भएसँगै एसियाकप टी– २० खेल्ने अवसर पनि नेपालले गुमाएको छ ।

वेस्ट इन्डिजसँग नेपालले हालसम्म एकपटक एकदिवसीय विश्वकप छनोटमा मात्रै प्रतिस्पर्धा गरेको छ, जसमा वेस्ट इन्डिजले ३३९ रन बनाएको थियो भने जवाफी ब्याटिङ गरेको नेपाल २३८ रनमा अलआउट भएर १०१ रनले पराजित भएको थियो । सो खेलमा वेस्ट इन्डिजका लागि साई होपले १३२ रन र निकोलास पुरनले ११५ रन बनाएका थिए । होप यतिबेला इन्डियन प्रिमियर लिगमा दिल्ली क्यापिटल्स र निकोलास पुरन लखनउ सुपरजाइन्ट्सबाट खेलिरहेका छन् । नेपालका लागि आरिफ शेखले ६३, गुलसन झाले ४२, रोहित पौडेलले ३० तथा आरिफ शेख र करण केसीले २८/२८ रन बनाएका थिए ।

अहिले पनि वेस्ट इन्डिजसँग खेल्ने टोलीमा यी खेलाडी रहनेछन् । पछिल्लो समयमा नेपालको ओपनिङ राम्रो हुन सकेको छैन । कुशल भुर्तेल पछिल्ला तीन खेलमा शून्य रनमै आउट भएका छन् भने नेपालबाट पाएको अवसरमा राम्रो गरेका अनिल साहले एसीसी प्रिमियर कपमा मौका पाएका थिएनन् । वेस्ट इन्डिजसँगको खेलमा पनि नेपालबाट विश्वकप खेल्ने टोली नै रहनेछ । विश्वकप सुरु हुन १ महिना मात्रै बाँकी रहँदा हुन लागेको यो शृङ्खलामा नेपाललाई आफ्ना कमजोरी पत्ता लगाएर सुधार गर्ने अवसर हुनेछ ।

प्रकाशित मिति: शुक्रबार, वैशाख १४, २०८१ २०:०४