अकासियाे आँपकाे मूल्य, नेपालभन्दा भारतलाई बढी फाइदा

A+ A A-

अत्यधिक आँप उत्पादन हुने प्रदेश २ मा यस वर्ष आँपको मूल्य अकासिएको छ । अहिले आँप प्रतिकेजी १ सय रुपैयाँसम्म बिक्री भइरहेको छ । जब कि, अघिल्ला वर्षकाे यही समयमा आँपकाे मूल्य १० रुपैयाँ प्रतिकेजीसम्म थियाे । यस वर्ष आँपकाे उत्पादन कम भएकाले मूल्य अकासिएको हाे । गाउँगाउँका आँप बगैंचा रित्तै छन् ।

बजारमा आँपको बिक्री भइरहेको छ तर सबैजसो आँप भारतबाट ल्याएकोले महँगो भएको जनकपुरधामको आँपको थोक विक्रेता रोबिन साहले बताए ।

आँप नफलेपछि किसान मारमा परेका छन् । यस वर्ष धनुषा, महोत्तरी, सिरहा, सर्लाही, सप्तरी, बारा, पर्सा र रौतहटसहितका स्थानमा सिजनको सुरुमै मालदह र बम्बई आँप प्रतिकिलो सय रुपैयाँभन्दा बढीमा खरिद–बिक्री हुने गरेको छ।

सुरुमै आँप महँगो भएकाले अन्तिम समयसम्म अझै बढ्न सक्ने स्थानीय व्यापारी बताउँछन् । आँपको उत्पादनमा कमी आएका कारण बढी मूल्यमा बेच्नुपरेको व्यापारीको भनाइ छ ।

‘थोरै फलेकाले गाउँगाउँमा आँप खोज्न जानुपर्छ,’ एक व्यापारीले भने, ‘बजारसम्म आँप पु-याउन लागत बढी लाग्ने गर्दा महँगोमा बेच्नुपरेको छ ।’

मौसमी असरका कारण यो वर्ष प्रदेश २ मा आँप निकै कम उत्पादन भएको छ । गत वर्ष रूखमा लटरम्म आँप फलेर लाखौंको आँप बिक्री गरेका किसान यो वर्ष निराश भएकाे धनुषाका किसान गंगाराम यादव सुनाउँछन् । गंगारामले आफ्नो दुई बिघा जग्गामा आँपखेती गरेका छन्।

‘सिँचाइ असुविधा हुँदा अन्य बाली छाडेर आँप लगाएँ,’ उनले भने, ‘यस वर्ष त आँप फलेकै छैन ।’

गत वर्ष उनको बगैंचामा आँप फालाफाल थियो । सस्तोमै बेचे पनि ७५ हजार आम्दानी भएको उनले सुनाए । यस वर्ष आफ्नै घरमा खानसमेत नपुगेको उनले सुनाए ।

‘यसपालि आँपमा मजुरा (फूल) नै कम लागेको थियो,’ जनकपुरधाम उपमहानगरपालिका २५ बभनगामाका मोहम्मद मजिबुलले भने, ‘त्यो पनि हावाहुरीले झा-यो ।’ आँपलाई कसरी हावाहुरी र रोगबाट बचाउनेबारे किसानलाई जानकारी नहुँदा समस्या भएकाे उनले बताए ।

प्रकाशित मिति: मंगलबार, असार २४, २०७६ ०१:४८