इटहरीका मेयर भन्छन्, ‘मैले पत्रकारलाई चिया खुवाएर सम्झाएँ’

A+ A A-

बोली र व्यवहारका कारण विवादित बनेका इटहरी उपमहानगरपालिका प्रमुख द्वारिकलाल चौधरीले नेकपाभित्रैबाट आफूलाई बद्नाम गराउने काम भएको बताएका छन् । उनले नेकपाका स्थानीय रामप्रसाद चौलागाईंलगायतका नेता र केही पत्रकार आफ्नो बद्नाम गराउन सक्रिय रहेको बताए ।

‘चुनावमा द्वारिकलालले टिकट पाउनुहुँदैन भन्ने रामप्रसाद चौलागाईंले मैले टिकट पाएदेखि मलाई असहयोग गर्न थालेका थिए,’ मेयर चौधरीले शिलापत्रसँग भने, ‘उनले पत्रकार लगाएर विभिन्न कन्ट्रोभर्सीमा मलाई तान्ने प्रयास गरें, केही पत्रकार उनको स्वार्थमा प्रयोग भए, तीमध्ये विराट अनुपम एक हुन् ।’

मेयर चौधरीले राम्रो काम गर्ने पत्रकारलाई आफूले सम्मान गर्ने बताए । ‘सबै कर्मचारी, वकिल, डाक्टर, इन्जिनियर वा पत्रकार दूधले नुहाएका छैनन्,’ उनले भने, ‘केही बेइमान पनि छन्, त्यस्तालाई नछाड्ने भनेको हुँ ।’

खानेपानीमा रामप्रसादले भ्रष्टाचार गरेको भन्दै उनले त्यसको भण्डफोर गरिछाड्ने चेतावनी पनि दिए ।

पत्रकारको नाकको हड्डी भाँच्ने र ठेगान लगाउन सुपारी दिएको भन्ने अभिव्यक्ति आवेगमा निस्केको उनको जिकिर छ । ‘यी सबै मैले आवेगमा भनेको हुँ,’ उनले भने ।

केही महिनाभित्र ५/७ जना कर्मचारीलाई उपमहानगरबाट राजीनामा गर्न बाध्य बनाउने पनि उनले बताए । ‘हेर्दै जानुहोला, केही महिनाभित्रै ५–७ जना भ्रष्ट कर्मचारीले राजीनामा दिनेछन्,’ मेयर चौधरीले भने, ‘दिएनन् भने कसरी निकाल्नुपर्छ, जनताले निर्णय लिनेछन् ।’

उनले आफू देखावटी राजनीति गर्ने खालको व्यक्ति नभएको बताए । ‘म किसानको छोरा हुँ,’ चौधरीले भने, ‘गरिब, किसान, उत्पीडित, दलित, असहायका समस्या मलाई थाहा छ, त्यो समाधान गर्न म इमानदार र भएर लाग्छु तर उनीहरुको पसिनाको कमाइ खाने भ्रष्टलाई लात हान्न पनि पछि पर्दिनँ ।’

पर्शुराम बस्नेतलाई ‘गुन्डा’ भने

मेयर चौधरीले मोरङका नेकपा नेता पर्शुराम बस्नेतलाई ‘गुन्डा’ पनि भने । ‘मैले पत्रकारलाई धम्काएको मात्रै हो,’ चौधरीले भने, ‘विराटनगरमा पर्शुराम बस्नेत भन्ने गुन्डाले पत्रकारको नाकको हड्डी नै भाँचिदिएको थियो ।’

पत्रकार खिलानाथ ढकाललाई २०६८ सालमा तत्कालीन एमालेका युवा संगठनमा रहेका बस्नेतले आक्रमण गरेका थिए । आक्रमणमा संलग्न भएको प्रमाण नै भेटिँदा पनि बस्नेलाई कारबाही नभएको भन्दै मेयरले प्रहरी प्रशासन र अदालतमाथि प्रश्न उठाए । ‘पत्रकारको नाकको डाँडी नै भत्काइदिँदा खै कारबाही भयो त ?’ उनले प्रश्न गरे ।

मेयर चौधरीले भ्रष्टाचार गरेको भन्दै इटहरी–१९ का वडासचिव मनोज दाहाल र उपमहानगरपालिकाका सब ओभरसियर राम खड्कामाथि हातपात गरेका थिए भने समाचारमार्फत निरन्तर आफूबारे दुष्प्रचार गरेको भन्दै इटहरी पत्रकारप्रति असहिष्णु व्यवहार गरेका थिए ।

प्रश्न सोधेकै निहुँमा उनले पत्रकार कृष्ण बहाव भट्टराईलाई लोपारेका थिए भने पत्रकार विराट अनुपम (गौतम)लाई ज्यान मार्ने धम्की दिएका थिए ।

प्रकाशित मिति: शुक्रबार, जेठ २४, २०७६ २३:३६