दीपेन्द्रले हत्या गरिसकेपछि राजा वीरेन्द्रलाई लात्तीले हिर्काए

A+ A A-

केतकी चेस्टर राजा वीरेन्द्रकी काकाकी छोरी हुन् । राजा महेन्द्रका भाइ बसुन्धरा र हेलनकी माहिली छोरी केतकीको बेलायती नागरिकसँग विवाह भएको थियो । ब्रिटिस एयरलायन्सका पाइलटसँग विवाह गर्न उनले राज पदसमेत त्यागेकी थिइन् । केतकीको त्यो दोस्रो विवाह थियो ।

१९ जेठमा भएको दरबार हत्याकाण्डको प्रत्यक्षदर्शी हुन् केतकी चेस्टर । दरबार हत्याकाण्डमा घाइते भएकी उनी कैयाैं दिन अस्पतालमा कोमामा रहिन् । केतकीले धेरै समय अस्पतालको आईसीयूमा बस्नुपर्यो । हत्याकाण्डको बेला गोली लागेको उनको एउटा हात अझैसम्म चल्दैन ।

केतकीले दुई वर्षअघि बीबीसी रेडियो विश्व सेवाको कार्यक्रम ‘विट्नेस’मा दरबार हत्याकाण्डको स्मरण गर्दै अन्तर्वार्ता दिएकी थिइन् । हत्याकाण्ड पछि पहिलोपटक उनले दिएको अन्तर्वार्तामा दरबार हत्याकाण्डको धेरै रहस्य खुलेको थियो ।

केतकीले दरबार हत्याकाण्डकाे रहस्य यसरी खुलाइन् ।

दरबार हत्याकाण्ड तत्कालीन युवराज दीपेन्द्रले नै गरेका हुन् । उनको दोहोर चरित्र थियो, बाहिर एक प्रकारको, भित्र अर्कै । त्यस दिन दरबारको विलियर्ड रुममा नियमित रुप्मा शुक्रबार चल्ने पार्टी आयोजना गरिएको थियो । राजपरिवारका लगभग सबै सदस्य पार्टीमा संलग्न थिए ।

त्यस दिन दीपेन्द्र अनौठो व्यवहार गर्दै थिए । उनी रक्सीले मातेको अभिनय गरिहेका थिए । मैले मेरो नजिकैकी मेरी बहिनीसँग कुरा पनि गरे । किन यिनी रक्सीले मातेको जस्तो देखिन खोजिरहेका छन् ?

उनले त्यसरी अभिनय गरेपछि राजपरिवारका युवा सदस्यले उनलाई डोर्याएर उनको कोठातिर लगे । त्यसको केही बेरमै उनी फेरि पार्टी भइरहेको बिलियर्ड रुममा फर्किए । फर्किंदा उनले कम्ब्याट ड्रेस लगाएका थिए । उनी कमान्डो ड्रेसमा थिए । हातमा पन्जा, गगल्स, आर्मी बुट अनि उनको दुवै हातमा हतियार थियो ।

उनी बेला बेलामा त्यस्तो सो अप गर्थे । हामीले पनि उनले सो अप नै गरेको होला भन्ने सोच्याैं । तर, उनी राजा वीरेन्द्र भएतिर गए । दाहिने हातमा भएको मेसिन गन अचानक चलाउन थाले । सिलिङतिर फर्काएर भटाभट गोली चलाए ।

हामीलाई कुनै यस्तो अवस्थामा कुनै पनि प्रतिक्रिया नजनाउन सिकाइएको हुन्थ्यो । हामीले केही गरेनौं । गल्तीले आफैं बन्दुक चलेको हो कि जस्तो लाग्यो । सबै गोली सकिएपछि उनी कोठाबाट बाहिर निस्किए ।

त्यसबेला हामीले थाहा पायाैं, राजा वीरेन्द्रलाई समेत गोली हानिएको रहेछ । राजा वीरेन्द्रको अनुहारमा आश्चर्य देखिन्थ्यो । उनी लडे । तर, जोरले होइन, नियन्त्रित रूपमा लडेकोजस्तो गरी बिस्तारै ।

फेरि दीपेन्द्र कोठमा आए, त्यति नै बेला दीपेन्द्रका काका धीरेन्द्रले उनलाई रोक्न खोजे । दीपेन्द्र काका धीरेन्द्रसँग निकै नजिक थिए । दीपेन्द्रले नजिकैबाट धीरेन्द्रलाई समेत गोली हाने । धीरेन्द्र हुत्तिएर केही पर फालिए । त्यसपछि उनी झन् बहुला जस्ता भए । धीरेन्द्र उनका निकै प्यारा काका थिए । काकालाई गोली हानेपछि उनले बहुलाजस्तो जताततै गोली हान्न थाले ।

सबैभन्दा मलाई आश्चर्य तब भयो, जब दीपेन्द्रले आफ्नो बुबाको शरीरमा लात्ताले हिर्काए । लाग्थ्यो उनी बुबा मेरका छन् कि छैनन्, यकिन गर्न चाहन्थे । हिन्दु मान्यतामा बुबालाई भगवान् मानिन्छ । उनले त्यसरी आफ्नाे बुबालाई लात्ताले हान्लान् भन्ने सोच्न सकिँदैनथ्यो । यसले पनि थाहा हुन्छ, उनी बुबालाई कति घृणा गर्थे ।

त्यसैले मलाई लाग्छ दरबार हत्याकाण्ड दुर्घटना थिएन । दीपेन्द्रको योजनामा नै भएको थियो !