कोसीका स्वास्थ्यकर्मी कुटपिटबारे एसपी खड्का भन्छन्- दोषी देखिए कुट्ने प्रहरीलाई कारबाही हुन्छ

कोसीका स्वास्थ्यकर्मी कुटपिटबारे एसपी खड्का भन्छन्- दोषी देखिए कुट्ने प्रहरीलाई कारबाही हुन्छ

पुलिसले कुटेको भन्दै आन्दोलित बनेका कोसी अस्पतालका स्वास्थ्यकर्मी ।

A+ A A-

जिल्ला प्रहरी कार्यालय मोरङका प्रमुख प्रहरी उपरीक्षक सन्तोष खड्काले स्वास्थ्यकर्मीमाथि कुटपिट गर्ने प्रहरीलाई कारबाही गरिने बताएका छन् ।

उनले कुटपिट घटनाका विषयमा छानबिन गरिरहेकाले दोषी देखिने प्रहरीलाई कारबाही गरिने बताएका हुन् । उनले कोरोना महामारीमा आफ्नो ज्यान जोखिममा राखेर जनताको ज्यान बचाउन खटिएका स्वास्थ्यकर्मीप्रति प्रहरीको उच्च सम्मान रहेको भन्दै कुटपिटमा संलग्न प्रहरीका विषयमा छानबिन गरी दोषी देखिए कारबाही गरिने शिलापत्रलाई बताए ।

‘बेलुका ८ देखि बिहान ७ बजेसम्म कसैलाई पनि हिँड्डुल गर्न दिइएको छैन । त्यही क्रममा उहाँलाई प्रहरीले रोक्यो । उहाँले पनि आफ्नो डिटेल खुलाउन सक्नु भएन र प्रहरीले सामान्य बल प्रयोग गरेको देखियो,’ उनले भने, ‘उहाँहरूले महामारीमा ज्यान जोखिममा राखेर जनतालाई सेवा दिइराख्नुभएको छ । केही मिसअन्डस्ट्याण्डिङ भए पनि हामी हाम्रै गल्ती ठानेर अघि बढ्न तयार छौँ । तपाईंहरूलाई सुरक्षा दिन्छौँ भनेर कुरा गरेको छु । दोषी देखिएको खण्डमा दोषीलाई अवश्य कारबाही हुन्छ ।’

घटनाको विषयमा यथार्थ बुझिरहेको प्रहरी उपरीक्षक खड्काले बताए । उनले प्रहरीले स्वास्थ्यकर्मीलाई सम्मान गर्दै सुरक्षाका लागि सहजीकरण गर्ने बताए ।

घटनाका विषयमा बुधबार आन्दोलित बनेका स्वास्थ्कर्मीहरूसँग प्रहरी उपरीक्षक खड्काले छलफल गर्दै दोषीलाई कारबाही गर्ने प्रतिवद्धता जनाएपछि स्वास्थ्यकर्मीहरूले आन्दोलन स्थगित गरेको कोसी अस्पतालका मेडिकल सुपरिटेन्डेन्ट डा. चुमनलाल दासले शिलापत्रलाई जानकारी दिए ।

उनले छलफलमा कुटपिटमा संलग्न प्रहरीलाई कारबाही गर्ने सहमति भएपछि स्वास्थ्यकर्मीहरू आ–आफ्नो काममा फर्किएको बताए । ‘प्रहरी प्रमुखज्यूसँग बसेर छलफल गरिसकेपछि सबै स्वास्थ्यकर्मी काममा फर्किनुभएको छ,’ उनले भने, ‘उहाँले कुटपिट गर्ने प्रहरीलाई झिकाइसकेको तथा कारबाहीका लागि विराटनगरस्थित कोसी अस्पतालमा कार्यरत स्वास्थ्यकर्मी सिनियर अहेब अशोक राजवंशीलाई प्रहरीमा निवेदन भनेपछि सहमति भएको छ ।’

मंगलबार राति विराटनगरस्थित कोसी अस्पतालमा कार्यरत स्वास्थ्यकर्मी सिनियर अहेव राजवंशीलाई प्रहरीले कुटपिट गरेको थियो । मंगलबार राति अस्पतालको काम सकेर घर फर्कँदै गर्दा राजवंशी प्रहरीबाट कुटिएका थिए । स्वास्थ्यकर्मीको परिचयपत्र देखाउँदा पनि प्रहरीले कुटपिट गरेको उनले बताए ।

‘ड्युटी पूरा गरेपछि घर जाँदै गर्दा देवकोटा चोकमा पुगेपछि प्रहरीले रोक भन्नुभयो,’ उनले भने, ‘रोकिएपछि मलाई एक्कासि हात र तिघ्रामा भाटाले कुट्न थाल्नुभयो ।’ आफू स्वास्थ्यकर्मी भएको जानकारी गराउँदासमेत रातको समयमा हिँड्ने भन्दै कुटपिट गरेको उनले बताए । कुटपिटबाट राजवंशीको खुट्टा र घुँडामा चोटपटक लागेको छ । कुटपिटको विरोधमा स्वास्थ्यकर्मीहरूले प्रदर्शनसमेत गरेका थिए ।