श्रीमतीसँगको झगडाले ९ जनाको हत्या ! आशंकित ज्वाइँले पनि गरे आत्महत्या

A+ A A-

पाँचथरको मिक्लाजुङ–३ आरुबोटेमा सोमबार राति दुई परिवारका ९ जनाको हत्या भयो ।

वडा कार्यालयबाट करिब २ सय मिटरको दूरीमा रहेका दुवै परिवारमध्ये एक परिवारका ५ र अर्को परिवारका चारजनाको हत्या भएको छ ।

गाउँपालिका प्रमुख प्रशासकीय अधिकृत अरुण राईका अनुसार मृतक बमबहादुर फियाकका कान्छा ज्वाइँ मानबहादुर माखिम मिक्लाजुङ–७ मा झुन्डिएकाे अवस्थामा फेला परेका छन् ।

उनले नै ससुराली र जेठीसासूको परिवारको हत्या गरी आफूले पनि आत्महत्या गरेको अनुमान गरिएको छ । उनको सात वर्षअघि बमबहादुर फियाककी छोरी अन्दाजी ३५ वर्षीया मनकुमारी फियाकसँग विवाह भएकामे थियो । तर, वैवाहिक जीवनमा खटपट भएपछि दुई वर्षदेखि मनकुमारी माइतै बस्दै आएकी थिइन् ।

दुई वर्षअघि नै सम्बन्ध विच्छेदका लागि प्रहरीमा गए पनि प्रहरीले मिलेर बस्न सुझाव दिएर पठाएको थियो । प्रहरीको प्रारम्भिक अनुसन्धानमा पारिवारिक कलहकै कारण घटना घटेको देखिएको छ ।

चार दिनअघि उद्योग विकास समितिले सिलाइ बुनाइ तालिम सञ्चालन गरेकाे थियाे । जसमा मनकुमारी पनि सहभागी थिइन् । जहाँ खानेकुरामा सिसा मिसाउँदा १३ जना वबरामी परेका थिए ।

स्थानीयका अनुसार आत्महत्या गरेका मानबहादुर र हत्या गरिएका दुई परिवारबीच झगडा हुँदै आएको थियो । एक वर्षअघि झगडा प्रहरीसम्मै पुगेपछि प्रहरीको रोहवरमा मिलापत्र गरिएको थियो ।

सो घटनामा मानबहादुरको संलग्नता रहेको आशंका गरिएको थियो । त्यसलगत्तै गए राति उनले श्रीमतीसहित ९ जनाको हत्या गरी आत्महत्या गरेको अनुमान गरिएको छ ।

सो घटनामा ४१ वर्षीया धनराज शेर्माको परिवारका पाँचजना र बमबहादुर फियाकको परिवारका चारजना मारिएका छन् । ३६ वर्षीया जस्मिता फियाक, ३५ वर्षीया मनकुमारी फियाक, ६ वर्षीया इक्सा शेर्मा, १३ वर्षीया योवना शेर्मा, ६ वर्षीया मुना शेर्मा, ७४ वर्षीय बमबहादुर फियाक, बमबहादुरकी श्रीमती र १२ वर्षीया आशिका खजुम लिम्बूको हत्या भएको हो । १२ वर्षीया सीता खजुम भने भागेर बाँच्न सफल भएकी छन् ।

प्रकाशित मिति: मंगलबार, जेठ ७, २०७६ २३:३६