अपवित्र गठबन्धनले मलाई भित्ताको मिथिला चित्रजस्तै बनाउन खोज्यो : प्रधानमन्त्री

अपवित्र गठबन्धनले मलाई भित्ताको मिथिला चित्रजस्तै बनाउन खोज्यो : प्रधानमन्त्री

A+ A A-

प्रधानमन्त्री केपी शर्मा ओलीले लोकतान्त्रिक प्रणालीको माला जप्नेहरू सोही प्रणालीलाई असफल पार्ने खेलमा लागेको बताएका छन् ।

नेपाल उत्पीडित जातीय मुक्ति समाजको राष्ट्रिय भेलालाई सोमबार काठमाडौंमा सम्बोधन गर्दै प्रधानमन्त्री ओलीले हरेक प्रदेशमा सरकार परिर्वतनका खेल भइरहेको र त्यो खेलमा संघीयताको माला जप्नेहरू नै लागेको बताएका हुन् ।

उनले अग्रगामी शक्तिविरुद्ध दक्षिणपन्थी, वामपन्थी, अतिवादीलगायत सबै प्रकारका गठबन्धन लागेको टिप्पणी गरे । यस्तो अपवित्र गठबन्धन जसरी हुन्छ मुलुकमा द्धेष, घृणा र फाटो बढाएर विभिन्न किसिमका आतंक मच्चाउने काममा लागेको दाबी उनले गरे ।

'अग्रगामी शक्तिविरुद्धको गठबन्धन, दक्षिणपन्थी र वामपन्थी, अतिवादीलगायत सबै प्रकारका अपवित्र गठबन्धन गरेर अस्थिरता ल्याउने, स्थिरता हुन नदिने, द्वेष फैलाउने, घृणा फैलाउने, फाटो बढाउने, अनेकता मच्चाउने काम मात्रै भएका छन्' उनले भने ।

उनले अपवित्र गठबन्धन कम्युनिस्ट आन्दोलन ध्वस्त पार्ने अभियानमा लागेको र आफूलाई 'भित्तामा बनाएको मिथिला चित्र बनाउने' ढंगमा अघि बढेको टिप्पणी गरे ।

संघीयताको माला जपेर नथाक्नेहरू नै अहिले संघीयताप्रति जनतामा वितृष्णा फैलाउने काममा लागेको र जनतामा पनि संघीयता नचल्ने रहेछ कि भन्ने आशंका जन्मन थालेको तर्क उनले गरे ।

प्रधानमन्त्री ओलीले आफूले वामपन्थी आन्दोलनलाई एकजुट बनाउ हर सम्भव प्रयास गरेको उल्लेख गर्दे अहिले भष्मासुरको कथामा जस्तै आफैँमाथि शक्तिको प्रयोग देखाउने काम भएको टिप्पणी गरे ।

'महादेवले भष्मासुरलाई बरदान दिएजस्तै मैले बहुमत दिएँ । मैले बहुमत दिएपछि खोई यो बहुमतको प्रयोग गरेर टाउकोमा हात राखौँ भनेर मैलाई साधारण सदस्य पनि नरहेने गरि पार्टीबाट निकालेको तपाईंहरूले सुन्नुभयो होला नि । मैले नै अगुवाइ गरेर पार्टी एकठाउँमा ल्याएँ । तर उनीहरूलाई चाहिएको रहेछ बहुमत । मलाई चाहिएको थियो एकता ।'

प्रकाशित मिति: सोमबार, चैत ३०, २०७७ १९:४३