जेठदेखि ट्रायल दिँदा आफ्नै सवारीसाधन प्रयोग गर्न पाइने, सानो गल्तीले फेल नहुने

जेठदेखि ट्रायल दिँदा आफ्नै सवारीसाधन प्रयोग गर्न पाइने, सानो गल्तीले फेल नहुने

A+ A A-

सवारी चालक अनुमतिपत्र (लाइसेन्स) को ट्रायल दिँदा आफ्नै सवारीसाधन प्रयोग गर्न पाइने भएको छ ।

यातायात व्यवस्था विभागले प्रस्ताव गरेको सवारीसाधन अनुमतिपत्र कार्यविधि २०७७ भौतिक पूर्वाधार तथा यातायात मन्त्रालयले अनुमोदन गरेसँगै १ जेठदेखि यो नियम लागू हुने भएको हो ।

यसअघि सर्वसाधारणले ट्रायल सेन्टरले तोकेको सवारीसाधनले ट्रायल दिनुपर्ने व्यवस्था थियो । ट्रायल सेन्टरले तोकेको सवारीसाधनमा यान्त्रिक गडबडीका कारण ट्रायल फेल हुने गरेको धेरै गुनासो आउने गरेको थियो ।

विभागले यसका लागि केही नियम भने बनाएको छ । ट्रायल दिने मोटरसाइकल वा स्कुटर पेट्रोलबाट चल्ने इन्जिन क्षमता कम्तीमा ९५ सीसी हुनुपर्नेछ । यसको ह्विल बेस १ हजार २ सय मिलिमिटरको हुनुपर्नेछ ।

मोटरसाइकल मात्रको हकमा म्यानुअल ट्रान्समिसन, हिल होल्ड, हिल असिस्ट वा समान प्रकारको उपकरण हुनुपर्नेछ । त्यसैगरी, म्याद नसकिएको सवारी दर्ता प्रमाण पत्र र म्याद नसकिएको तेस्रो पक्ष बीमा अनिवार्य हुनुपर्ने यातायात व्यवस्था विभागका प्रवक्ता डा. लोकनाथ भुसालले जानकारी दिए ।

त्यस्तै कार, जीप, भ्यानको हकमा पेट्रोल, डिजेल र ग्यासबाट चल्ने इन्जिन क्षमता कम्तीमा ७५० सीसीको हुनुपर्ने छ भने गाडीको बेस २ हजार ३ सय मिलिमिटर अनिवार्य हुनुपर्नेछ।

सानो गल्तीले ट्रायल फेल नहुने

सावारी चालक अनुमतिपत्रका लागि प्रयोगात्मक परीक्षा ट्रायल सहज बनाइएको छ । पहिलेको ट्रायलको कुनै पनि चरणमा सानो मात्रै गल्ती भएपनि फेल हुने नियम हटाइएको छ । हाल ७ चरणमा निश्चत अंक राखेर १०० पूर्णाङ्क बनाई ७० ल्याउनेलाई पास गराइने भुसालले जानकारी दिए ।

भुसालका अनुसार घुमाउँरो ८ मा एक पटक टेकेमा वा रेखा छोएमा १० नम्बर घटाइने छ भने २ पटक गल्ती दोहोर्‍याए स्वत: फेल हुनेछ । त्यस्तै साघुँरो फलेक भने अनिवार्य कटाउनु पर्नेछ भने युटर्नको १० नम्बर निर्धारण गरिएको छ । ट्रेनिङमा साइड लाइट नबाले १० नम्बर घट्नेछ तर युटर्नको रेखा छोए फेल हुने विभागले जनाएको छ ।

परीक्षार्थीले ट्राफिक लाइट नबाले १५ नम्बर काटिनेछ भने स्पिड ब्रेकरमा एक पटक खुट्टा टेके ५ नम्बर काटिने र एक पटक स्टार्ट बन्द भए ५ नम्बर काटिने भुसालले जानकारी दिए ।

उकालोको अंक भार २० तय गरिए पनि तोकिएको रेखा काटेमा वा नरोकेर गएमा फेल हुनेछ । रोकेको अवस्थामा ६ इन्चभन्दा पछि सरेमा फेल हुनेछ । ओरालो झर्ने क्रममा रेखा नाघे वा नरोके स्वत: फेल हुने विभागले जनाएको छ ।

त्यस्तै, लिखित परीक्षाका लागि विभागले ५ सयवटा प्रश्न सार्वजनिक गर्नेछ । तीमध्ये सोधिने २० वटा प्रश्नमा ८० प्रतिशत प्रश्न मिलाउनुपर्नेछ । यसअघि लिखितमा ५० प्रतिशत प्रश्न मिलाए पास हुने व्यवस्था थियो ।

प्रकाशित मिति: बिहीबार, चैत १९, २०७७ १७:५६