विश्वासकाे मत पाएपछि मुख्यमन्त्री कँडेललाई प्रश्न- सत्ता साझेदारसँग कसरी सहकार्य हुन्छ ?

विश्वासकाे मत पाएपछि मुख्यमन्त्री कँडेललाई प्रश्न- सत्ता साझेदारसँग कसरी सहकार्य हुन्छ ?

A+ A A-

कर्णाली प्रदेशका मुख्यमन्त्री यामलाल कँडेलले संसदबाट विश्वासको मत लिएका छन् । २७ चैतमा नेकपा माओवादी केन्द्रको समर्थनमा नेकपा एमाले संसदीय दलका नेता कँडेल मुख्यमन्त्रीमा नियुक्त भएका थिए । उनले बिहीबार कर्णाली प्रदेशसभाबाट विश्वासको मत लिएका हुन् । उनलाई २३ जना सांसदको समर्थन छ ।

लामो प्रयासपछि कर्णालीको चौथो मुख्यमन्त्री बनेका कँडेलका सामु अवसर कम चुनौती धेरै छन् । धेरैले कर्णालीको मुख्यमन्त्रीमा देख्न चाहेका नेता पनि हुन् उनी । यो नै कँडेलका लागि पहिलो चुनौती हुनेछ । किनभने ठूलो जनमासले कँडेलले काम गर्न सक्छन् भन्ने अपेक्षा गरेको छ । यो अपेक्षा पूरा गर्नु उनका लागि ठूलो चुनौती सावित हुनेछ ।

मुख्यमन्त्री नियुक्त भएको १५ दिनमा विश्वासको मत लिएका कँडेलसँग शिलापत्रले संक्षिप्त प्रतिक्रिया लिएको छ । पदभार ग्रहण गर्दै समृद्ध कर्णाली बनाउन सबै पक्षसँग हातेमालो गरी जनमुखी काम गर्ने बताएका मुख्यमन्त्री कँडेलसँग गरिएको कुराकानीको सम्पादित अंश:

०००

संसदमा विश्वासको मत पाउनुभएको छ । तपाईंले बारम्बार बजेट प्रणाली नै ठीक छैन भन्दै आउनुभएको परिप्रेक्ष्यमा अब कसरी अगाडि बढ्नुहुन्छ ?

प्रदेशसभाबाट विश्वासको मत प्राप्त भएको छ । यसमा प्रदेशसभा र विश्वासको मत दिने र नदिने सबै माननीय सदस्यज्यूहरूलाई धन्यवाद दिन चाहन्छु । अबको एक/दुई दिनभित्र पूर्ण आकारको सरकार बन्छ र त्यो सरकारले दिनानुदिन काम त गर्छ नै, मूलत: आजसम्मको अनुभवका आधारबाट नीति तथा कार्यक्रम र बजेट बनाउनेतर्फ केन्द्रित भएर सरकार लाग्छ ।

नीति तथा कार्यक्रमको प्राथमिकताका बारेमा अहिले नै भन्नु अलि हतारो हुन्छ । किनकि त्यो व्यक्तिले सोचेको कुरा सरकारको र सरकारले सोचेको कुरा सबै सम्बद्ध निकाय र सरोकारवालाहरूको पक्षमा बनाउनका लागि केही छलफल र परामर्शपछि मात्रै भन्नु राम्रो हुन्छ । त्यस कारण विषय के हुन्छ, पछि जानकारी गराउने कुरा हुन्छ । अब सरकारले ध्यान पुर्‍याएर गर्ने काम भनेको नीति तथा कार्यक्रम र बजेट निर्माण नै हो ।

प्रदेश संरचना बनेको ७ वर्षसम्म योजनाको थिति बसाल्न नसक्दा सोचेको जस्तो कर्णालीको विकास हुन नसकेको अवस्था हो । यस कारण कर्णालीको भूगोलमा सुहाउने नीति बनाउन आवश्यक छ । कर्णालीको विशेषताका आधारमा नीति बनाएर लागू गर्न सके मात्रै यहाँको विकास र समृद्धि सम्भव हुने मेरो ठम्याइ छ । यसमा सर्वप्रथम योजना छनोटमा थिति बसाल्नुपर्नेछ भने गर्ने नभई वितरणउन्मुख बजेट प्रणालीलाई सुधार्नुपर्नेछ ।

तपाईंप्रतिको जनअपेक्षालाई कसरी पूरा गर्ने योजना बनाउनुभएको छ ?

मूल कुरा हिजो प्रस्तुत भएका नीति तथा कार्यक्रम र बजेटमा जे सदनभित्र छलफल चलेर जुन अन्योलको परिस्थिति निर्माण भएको थियो, अब प्रस्तुत हुने नीति तथा कार्यक्रम र बजेट कार्यान्वयमा कुनै पनि अन्योल नहुने गरी बजेट प्रस्तुत गर्नेतर्फ ध्यान दिनुपर्ने अवस्था रहन्छ ।

बजेट निर्माण गर्दा विगतमा प्रदेशसभाभित्र भएका कुरा तथा सल्लाह र सुझावलाई ध्यान दिएर अमूर्त होइन मूर्त रूपका, खासगरी आमनागरिकले अनुभूत गर्ने खालका योजनाहरू अघि बढाइनेछ ।

विगतमा सबैको सर्वसम्मत ढङ्गले प्रदेशसभाबाट पारित भएको विषय के हो भने साना–साना योजनामा प्रदेशले हात नहाल्ने, वितरणुमखी योजना र बजेट नबनाउने जुन कुरा छ, त्यो कुरा मलाई लाग्छ, यसलाई सच्याएर जानुपर्ने हुन्छ ।

विगतका कतिपय बहुवर्षीय योजनाहरूमा प्रदेश सरकारको उल्लेखनीय रकम खर्च भइसकेको एउटा अवस्था छ । यस्ता आयोजनाहरू समयमै सक्ने गरी प्राथमिकताका साथ बजेट व्यवस्थापन गर्नुपर्ने अवस्था रहन्छ भने, बजेटको सीमाले वा आकारले साथ दियो भने तपाईंले भनेजस्तै जनअपेक्षाअनुकूलका कतिपय कामकारबाही वा योजनाहरू समावेश गरेर अगाडि बढ्नुपर्ने अवस्था छ ।

यसमा सरकार एक्लैले मात्रै सक्ने कुरा भएन । कर्णालीको असमानतासँग लड्न सबैको हातेमालोको खाँचो छ । कर्णालीमा प्रतिष्ठा नभई समृद्धिको यात्रामा एकमत हुन आवश्यक छ । यसका लागि सम्बद्ध सबैसँग समन्वय, सहकार्य र समझदारीका साथ अगाडि बढ्ने प्रयत्न रहनेछ, र यो जरुरी पनि छ ।

सत्ता साझेदारसँग कसरी सहकार्य हुन्छ ?

सरकार चलाउने विषयमा कुनै पनि विमति छैन । शपथ लिएको लामो समयसम्म मन्त्रीमण्डल विस्तार नगरेको भन्ने परेको छ । हामी दलीय प्रणालीमा छौँ । गठबन्धनमा भागवण्डाको विषयमा केही विमति हुनुलाई अन्यथा लिनुपर्ने विषय होजस्तो लाग्दैन ।

हामी जुन धरातलबाट आएको भए पनि हाम्रो एउटै ध्येय हो कर्णालीको समृद्धि । यसमा सत्ता साझेदार मात्र होइन, प्रतिपक्षलाई समेत मिलाएर लैजाने कुरामा दुई मत छैन । अबको एक/दुई दिनमा सरकारले पूर्णता पाउँछ ।

प्रकाशित मिति: बिहीबार, वैशाख १३, २०८१ १९:५१