ग्रिजम्यान बार्सिलोना जान लागेका हुन् ?

A+ A A-

फ्रान्सका स्टार स्ट्राइकर एन्टोनी ग्रिजम्यानले स्पेनिस क्लब एट्लेटिको मड्रिड छाड्ने घोषणा गरेका छन् । पाँच वर्षदेखि ग्रिजम्यान एट्लेटिकोबाट खेल्दै आएका थिए ।

एट्लेटिको मड्रिडले विज्ञप्तिमा लेखेको छ, ‘ग्रिजम्यानले क्लब छाड्ने निर्णय लिएका छन् । अब उनी दोस्रो ठाउँमा फरक खालको चुनौतीको सामना गर्न चाहन्छन् ।’

ग्रिजम्यान सन् २०१४ बाट एट्लेटिकोमा अनुबन्ध भएका थिए । उनले क्लबका लागि २ सय ५३ म्याचमा १ सय ३३ गोल गरे । उनले २०१८ मा युरोपा लिगको उपाधि, यूएफा सुपरकप र २०१४ मा स्पेनिस सुपरकप जित्न सहयोग गरे ।

२८ वर्षीय ग्रिजम्यानले अब खेल्ने क्लबबारे खुलाएका छैनन् । तर, उनी बार्सिलोना जान लागेको अनुमान भने गरिएको छ ।

ग्रिजम्यानले भने ‘मेरा लागि यो निर्णय निकै मुस्किल कुरा थियो । तर, मलाई लाग्यो कि यो मेरो मनको आवाज हो । पाँच वर्ष मेरा लागि स्वर्णिम रह्यो । यस क्रममा क्लबका तर्फबाट पहिलोपटक कुनै उपाधि जितियो ।’

रोसीले पनि छाड्दै छन् क्लब

यस्तै, इटालियन क्लब एएस रोमाका ड्यानियल डी रोसीले पनि क्लब छाड्दै छन् । ग्रिजम्यान र रोसीले आ–आफ्नो देशलाई विश्वकप जिताएका छन् ।

ग्रिजम्यान पछिल्लोपटक विश्वकप जित्ने फ्रान्सको टोलीमा थिए । रोसी भने सन् २००६ मा इटालीको टोलीमा थिए । त्यतिबेला इटालीले विश्वकप जितेको थियो ।

रोसीले अन्तिम म्याच २६ मेमा परमाविरुद्ध खेल्ने

३५ वर्षीय रोसीले रोमाका लागि ६ सय १५ म्याचमा ६३ गोल गरे । क्लबका लागि उनको अन्तिम म्याच २६ मेमा परमाविरुद्ध हुनेछ । रोसी सन् २००७ र २००८ मा कोपा इटालिया र २००७ मा सुपरकोपा टाइटल जित्ने रोमाको टोलीमा थिए । रोमाका लागि रोसीभन्दा बढी म्याच फ्रान्सिस्को टोटीले मात्र खेलेका छन् । टोटीले सन् २०१७ मा रिटायर हुनुअघि ७ सय ८६ म्याच खेलेका थिए । डिफेन्सिव मिडफिल्डर भएर खेल्ने रोसीले इटालीका लागि सन् २००४ देखि २०१७ सम्म १ सय १७ प्रतिस्पर्धामा २१ गोल गरे ।