ट्रम्पको दबाबबीच पेन्सले भने- यो अमेरिकाका लागि कालो दिन

A+ A A-

अमेरिकी संसदमा राष्ट्रपति डोनाल्ड ट्रम्पका समर्थकले गरेको आक्रमणलाई लिएर अमेरिकीसहित विश्वभरका नेताहरुले भत्र्सना गरेका छन् ।

ट्रम्पको रिपब्लिकन पार्टीका नेताहरुले पनि आक्रमणको निन्दा गरेका छन् । रिपब्लिकन सिनेटर रुबियोले अमेरिकी कंग्रेसमा बोल्दै अमेरिकी प्रजातन्त्रमाथि नै हमला भएको भन्दै यो देखेर रुस र चीनजस्ता देश हाँसिरहेको हुनसक्ने टिप्पणी गरेकी छन् ।

यसैबीच अमेरिकी उपराष्ट्रपति माइक पेन्सले यसलाई अमेरिकी इतिहासको कालो दिनका रुपमा टिप्पणी गरेका छन् । उनले क्यापिटलमा भएको हिंसाको निन्दा गर्दै सो घटनामा परी केही व्यक्ति मारिएकामा दुःख व्यक्त गरेका छन् ।

ट्विटरमा माइक पेन्सले लेखेका छन्, ‘हामी ती व्यक्तिहरुप्रति आभारी हुनेछौं, जसले यो ऐतिहासिक स्थानलाई बचाउनका लागि आफ्नो स्थान छाडेनन् ।’

उनले अमेरिकी संसदलाई संबोधन गर्दै भने, ‘जसले क्यापिटलमाथि हमलाको कोशिस गरे, उनीहरुले जित्नेछैनन् । हिंसाले कहिल्यै पनि जित्दैन । जीत स्वतन्त्रताको हुन्छ । यो सदन जनता र उनीहरुका प्रतिनिधिको हो । हिंसा र बर्बरताकाबीच हामी यो सदनबाट बोलिरहेका छौं । हाम्रो प्रजातन्त्रको लचकता र त्यसको शक्ति संसारका लागि साक्षी हुनेछ ।’

हिंसाबीच उनले ट्विट गरेका छन्, ‘शान्तिपूर्ण ढंगले प्रदर्शन गर्नु हरेक अमेरिकी नागरिकको अधिकार हो । तर क्यापिटलमा भएको हमलालाई स्वीकार गर्न सकिदैन । यसमा सामेल जोसुकैलाई कडा सजाय हुनेछ ।’

अमेरिकी राष्ट्रपतिमा जो बाइडेनको जित घोषणा नगर्न राष्ट्रपति ट्रम्पले दबाब दिइरहेका बेला पेन्सको यो भनाई बाहिर आएको हो ।

बुधबार राति ट्विट गर्दै ट्रम्पले लेखेका थिए, ‘यो अधिकतम साहस देखाउने समय हो माइक । राज्यहरु आफ्नो मतमा सुधार गर्न चाहन्छन् । उनीहरुलाई चुनावी धाँधलीबारे जानकारी भइसकेको छ । माइकले ती भोटलाई राज्यमा नै फिर्ता पठाउनुपर्छ र हामी जित्नेछौं । यो गर्नुहोस् माइक ।’