यी हुन् विदेश सचिव श्रृंगलाको नेपाल भ्रमणबाट भारतले राखेका चार अपेक्षा

s.jpg

A+ A A-

भारतीय विदेश सचिव हर्षबर्द्धन श्रृंगलाको नेपाल नाता पुरानो छ। उनी नेपाली भाषा मजैले बोल्छन्। भारतीय विदेश मन्त्रालयमा सचिव हुनुअघि साउथ ब्लकबाटै नेपाल र भुटान मामिला हेरेका थिए । उनले बंगलादेश, श्रीलंका, माल्दिभ्स र म्यानमारमा समेत काम गरिसकेका छन्।

भूराजनीतिका कारण घरेलु राजनीति फेरबदल भइरहने मुलुकहरुमा अपनाउनुपर्ने कुटनीतिमा उनी निकै खप्पिस छन्। त्यसैले श्रृंगलाको नेपाल भ्रमण चिसिएको नेपाल-भारत सम्बन्धलाई लय फर्काउन सहयोगी हुने अपेक्षा भारतले राखेको छ।

यस्ता छन् श्रृंगलाको भ्रमणबाट भारतीय अपेक्षा

ओलीसँगको सौहार्दता फर्काउने
श्रृंगलाको भ्रमणमा भारतले प्रधानमन्त्री ओलीसँगको सौहार्द संवादको अपेक्षा राखेको छ। नेपालले नयाँ नक्सा जारी गरेपछि चिसिएको सम्बन्धलाई प्रधानमन्त्री ओलीसँगको संवादमार्फत सहजतातर्फ ल्याउनुपर्ने भारतको अपेक्षा छ । उनले प्रोटोकलको ख्याल गर्दै ओलीसँग संवाद गर्नुपर्ने र भारतका पुराना हितैसी रहेका ओलीबाट भारतप्रतिको दृष्टिकोण विस्तृत रुपमा खुलाउनुपर्ने अपेक्षा उसले राखेको छ।

भारतलाई उपेक्षा नगर्ने सन्देश प्रवाह गर्ने

सत्तारुढ नेकपा आन्तरिक विवादमा रहेका बेला चीनले आफ्नो भूमिका बढाइरहेको छ। नेपालमा चीनको दबदबा महशुस गरेको भारतले श्रृंगलाबाट भारतलाई उपेक्षा नगर्ने सन्देश प्रवाहको अपेक्षा गरेको छ । नेपालको सार्वभौमिकताको सम्मान गर्दै उनले चीनसँग निकटता बढाउँदा भारतलाई उपेक्षा गरेको अवस्थामा दिल्लीले नेपालप्रतिको दृष्टिकोण पुर्नविचार गर्ने सन्देश प्रवाहको अपेक्षा भारतले गरेको छ।

मधेशमा सद्भावको सन्देश

मधेश केन्द्रित दलले संविधानमा नागरिकता लगायतका विषयमा असन्तुष्ट हुँदै संविधानलाई सहर्ष स्वीकार गरेका छैनन्।

यस्तो अवस्थामा भातरले श्रृंगलाको भ्रमणबाट मधेशप्रति सद्धभाव र समर्थनको को सन्देश फैलाउनुपर्ने अपेक्षा राखेको छ। नेपाली भाषामा सम्बोधन गर्ने तयारीमा रहेका उनले मधेशका सिमान्तकृत समुदायको अधिकारका लागि भारतले सहयोग गरिरहने विश्वास दिलाउनुपर्ने भारतको अपेक्षा छ।

भारत संघीय लोकतान्त्रिक गणतन्त्रात्मक नेपालको पक्षमा

नेपालमा अहिले वर्तमान व्यवस्था उल्टाउँदै राजतन्त्र फर्काउन माग सहित विभिन्न प्रदर्शन भइरहेका छन्। यस्तो अवस्थामा भारत नेपालको राजनीतिक परिवर्तन उल्टाउने पक्षमा नरहेको सन्देश श्रृंगलाले दिनुपर्नेछ । भारत संघीय लोकतान्त्रिक गणतन्त्रात्मक नेपालको पक्षमा दृढतापूर्व उभिने र धर्मनिरपेक्ष नेपालको सम्मान गर्ने प्रष्ट साथ मन्तव्य राख्नुपर्ने भारतको अपेक्षा छ।

हिन्दुस्थान टाइम्समा प्रकाशित सामाग्रीमा आधारित

प्रकाशित मिति: बिहीबार, मंसिर ११, २०७७ ११:३०