कोरोना हटस्पटकै स्वास्थ्यकर्मी आन्दोलित, २ दिनदेखि सम्पूर्ण सेवा ठप्प

A+ A A-

कोरोना भाइरस संक्रमितको संख्या बढिरहेका बेला महोत्तरीको सम्सी गाउँपालिकाका स्वास्थ्यकर्मी सेवा बन्द गरी आन्दोलनमा उत्रिएका छन् ।

गाउँपालिकाभित्र रहेका सबै स्वास्थ्य चौकी, क्वारेन्टाइन र हेल्प डेस्कमा कार्यरत सम्पूर्ण स्वास्थ्यकर्मी गाउँपालिकाबाट प्रतिवद्धता जनाइएको जोखिम भत्ता नपाएको भन्दै आन्दोलनमा उत्रिएका हुन् । उनीहरू १४ असारदेखि सम्पूर्ण सेवा बन्द गरी धर्नामा बसेका छन् ।

५ स्वास्थ्य चौकी, १२ क्वारेन्टाइन रहेको सम्सी गाउँपालिकामा स्वास्थ्यकर्मीहरू आन्दोलित हुँदा क्वारेन्टाइनमै आइसोलेट गरिएका २ सय ७५ भन्दा बढी कोरोना संक्रमितको समेत नियमित स्वास्थ्य परीक्षण प्रभावित भएको छ ।

स्वास्थ्यकर्मीले माग सम्बोधन नभए आन्दोलन थप कडा बनाउने र गाउँपालिकाको कार्यालयमा नै ताल्चा लगाउने चेतावनी दिएका छन् । स्वास्थ्यकर्मीले जिल्ला प्रशासन कार्यालय महोत्तरीमा समेत ज्ञापनपत्र बुझाएका छन् ।

गाउँपालिकाले नै कार्यपालिकाबाट निर्णय गरेर स्वास्थ्यकर्मीलाई जोखिम भत्ता दैनिक १ हजार रुपैयाँका दरले दिने निर्णय गरे पनि सम्सी गाउँपालिकाका प्रमुख प्रशासकीय अधिकृतले रकम दिन आलटाल गरेको आरोप लगाउँदै स्वास्थ्यकर्मीहरू आन्दोलनमा उत्रिएका आन्दोलनकर्मीहरूले बताएका छन् ।

स्वास्थ्यकर्मीहरूको आन्दोलनले कोरोना संक्रमितको नियमित परीक्षणका साथै आकस्मिक, सुत्केरी सेवा, गर्भवती सेवा, बहिरंग सेवालगायतका सम्पूर्ण सेवा बन्द भएको छ । सम्सी गाउँपालिका कोरोनाको हटस्पटका रूपमा मानिन्छ । जिल्लामा सबैभन्दा बढी कोरोना संक्रमित यस गाउँपालिकामा छन् ।

प्रकाशित मिति: मंगलबार, असार १६, २०७७ १८:०२