चौरजहारी घटनालाई राजनीतिकरण हुन नदिने गृहमन्त्रीको प्रतिवद्धता

A+ A A-

गृहमन्त्री रामबहादुर थापा चौरझारी घटनामा राज्यका तर्फबाट कुनै पनि राजनीतिकरण नहुने बताएका छन् । प्रतिनिधिसमामा रूकुम पश्चिमको चौरजहारी नगरपालिका-८ मा गत शनिबार घटनालाई राजनीतिकरण गरिएको भन्ने सवालको जवाफ दिँदै गृहमन्त्री थापाले कुनै पनि प्रकारणको राजनीतिकरण नगरिने प्रतिबद्धता जनाएका हुन् ।

उनले घटनाको छानबिन गर्नका लागि सहसचिव नेतृत्वको ५ सदस्यीय उच्चस्तरीय समितिको गठन गरेको पनि जानकारी दिएका छन् । घटनाको अनुसन्धान गरेर २ हप्ताभित्र छानबिन प्रतिवेदन पेस गर्न समितिलाई निर्देशन दिएको उनले बताए ।

प्रमुख प्रतिपक्षी नेपाली कांग्रेसका सांसदले मंगलबार उक्त घटनामाथि गृहमन्त्रीको जवाफ मागेपछि गृहमन्त्रीले छानबिन समिति गठन गरेको जानकारी गराएका हुन् ।

शनिबार बेलुकी रुकुम पश्चिम चौरजहारी नगरपालिका–८ सोतीस्थित मल्ल थरकी युवतीलाई लिन गएका युवा र गाउँलेको बीचमा भएको झडपमा परी बेपत्ता भएका ३ जना युवाको शव फेला परेको छ । अझै ४ जना बेपता भएको बताइएको छ ।

प्रहरीका अनुसार जाजरकोटको भेरी नगरपालिका–४ का २१ वर्षीय युवा नवराज विककी प्रेमिका सोतीकी युवतीलाई लिन भनी १९ जना गएका थिए । सोतीमा गाउँले र ती युवाबीच झडप हुँदा भेरी नगरपालिका–४ नवराज विक र चौरजहारी नगरपालिका–१ टीकाराम सुनार र भेरी नगरपालिका–४ गणेश बुढाको शव फेला परेको छ ।

सुनार र विकको शव आइतबार भेटिएको थियो भने गणेशको सोमबार भेटिएको छ । भेरी नगरपालिकाका सञ्जु विक, गोविन्द शाही, लोकेन्द्र सुनार र गोपाल बुढाथोकी शनिबारदेखि बेपत्ता छन् ।

चौरजहारी नगरपालिका–८ का वडाध्यक्ष डम्बर मल्लसहित स्थानीय १२ जनालाई प्रहरीले पक्राउ गरिएको छ ।

प्रकाशित मिति: मंगलबार, जेठ १३, २०७७ १४:२०