नेपाल अत्यधिक सवारी दुर्घटनाकाे जाेखिममा, १० वर्षमा २० हजारकाे ज्यान गयाे

A+ A A-

नेपाल सवारी दुर्घटना उच्च हुने देशको सूचीमा देखिएको छ । औषत एक लाख सवारीसाधनमध्ये १ हजार ६ सय ७७ वटा सवारी साधन दुर्घटनामा पर्ने गरेको एक अध्ययनले देखाएको छ ।

शहरी क्षेत्र एकीकृत सार्वजनिक यातायात व्यावस्थापन गर्ने सम्वन्धमा व्यवस्था गर्न बनेको विधेयकमाथि छलफलको क्रममा संसद सचिवालयले गरेको अध्ययनले यस्तो तथ्यांक देखाएको हो ।

अन्तर्राष्ट्रिय निकायहरू आधिकारिक वेवसाइट, यातायात व्यवस्था विभाग, नेपाल प्रहरी लगायतको तथ्यांकलाई आधार मानेर गरिएको अध्ययनमा नेपालमा पछिल्लो १० वर्षमा सडक दुर्घटनामा परी मृत्यु हनेको संख्या २० हजार ६ सय ७३ छ । १० वर्षको अवधिमा एक लाख ७ सय ७४ वटा दुर्घटना परेकोमा १ लाख २४ हजार १८१ जना घाइते भएका छन् ।

दुर्घटना हुने प्रमुख तीन कारणमा चालकको लापरवाही, तीव्र गति र मादक पदार्थ सेवन देखिएको छ । चालकको लापरवाहीको कारण भएको दुर्घटनामा पछिल्लो पाँच वर्षको अवधिमा मात्रै १० हजार जनाले ज्यान गुमाएका छन् ।

नेपालमा एक लाख मध्ये करिव १ हजार ७ सय सवारी-साधन दुर्घटनामा पर्ने गरेकोमा अफगानस्तानमा भने एक लाख सवारीसाधन मध्ये १ हजार ४ सय ४८, भुटानमा ३ सय ६, थाइल्याण्डमा १ सय १९ वटा दुर्घटनामा पर्ने गरेको देखिएको छ ।

छिमेकी देश भारतमा एक लाख सवारी साधनमध्ये १ सय वटा र चीनमा जम्मा ३६ वटा दुर्घटनामा पर्ने गरेको देखिएको छ । संसारकै कम दुर्घटना हुने जापानमा एक लाखमध्ये ७ वटा दुर्घटनामा पर्ने देखिएको छ ।

यातायात विज्ञ डा. मधुसुदन अधिकारीले अल्प र कम विकसित राष्ट्रहरूमा सवारी दुर्घटना बढी हुने बताए । दुर्घटना कम गर्नको लागि चालक तथा लगानीकर्ताहरूलाई सवारीसाधनबाट हुने कमाइ पहिले एकिन गर्न सक्नुपर्ने बताउँछन् ।

राम्रो बाटो, राम्रो नियम सबै आवश्‍यक हो तर संसार सबै पैसाका पछि लाग्ने हो आचार्यले भने, तिव्र गतिमा चलाएपछि मैले छिटो नाफा कमाउँछु, प्यासेन्जर भेटाउछु भनेपछि क्रमश कम हुन्छ। उनले नेपालमा यातायात प्राधिकरण मार्फत संचालन गरिने सार्वजनिक साधनमा यी विषयमा ख्याल गरिनु पर्ने बताए।

सरकारले शहरी क्षेत्रमा यातायात प्राधिकरण गठन गरी प्राधिकरणको व्यवस्थापनमा सार्वजनिक सवारीसाधन चलाउने तयारी गरेको छ । त्यस्तै दुर्घटना कम गर्न सार्वजनिक सवारी साधनप्रतिको विश्‍वास बढाउदै सवारी चाप नियन्त्रण गर्नुपर्ने विज्ञहरुले बताएका छन् ।

प्रकाशित मिति: सोमबार, फागुन १९, २०७६ १०:०६