कमल थापाले भने, 'प्रदेश २ काे यही सरकारलाई ५ वर्ष काम गर्न दिनुपर्छ’

A+ A A-

प्रदेश २ मा सरकार परिवर्तनको हल्ला चलिरहेको समयमा राष्ट्रिय प्रजातन्त्र पार्टीका अध्यक्ष कमल थापाले प्रदेश सरकारलाई स्थायित्व प्रदान गर्न आवश्यक रहेको बताएका छन् । स्थायी सरकारले नै विकास गर्न सक्ने भएकाले प्रदेश २ मा अहिले रहेकै सरकारलाई नै स्थायित्व दिनु आवश्यक रहेको बताए ।

नेकपाले प्रदेश २ मा पनि सरकार बनाउन लागेको हल्लातर्फ इंगित गर्दै उनले प्रदेश सरकारले २ वर्षको अवधिमा खासै केही काम गर्न नसके पनि यही सरकारलाई ५ वर्ष काम गर्न दिनुपर्ने धारणा राखे ।

जनकपुरधाममा आज आयोजित पत्रकार सम्मेलनमा उनले भने, ‘२ वर्षमा नेकपाको सरकारले कुनै राम्रो काम गर्न सकेन, ५ वर्षभित्र यो सरकारले काम गर्न सकेन भने जनताले आफैँ यी दलहरूको विकल्प खोज्नेछन् ।’

जनताले विश्वासका साथ मत दिए पनि त्यो विश्वासलाई टिकाइराख्न सरकारले उदाहरणीयय काम गर्न नसकेको भन्दै उनले बरू भ्रष्टाचार, धर्म परिवर्तनलगायतका समस्याहरू बढ्दै गइरहेको प्रति चिन्ता व्यक्त गरे ।

उनले संघीय सरकार र स्थानीय सरकार आफैँमा शक्तिशाली सरकारहरू रहेकाले बीचमा प्रदेश सरकारको आवश्यकता नरहेको बताए ।

उनले भने, ‘देशमा संघीय सरकार र ७ सय ५३ स्थानीय सरकारहरू छन्, बीचमा प्रदेशको आवश्यकता नै छैन, यसलाई देशले पनि धान्न सक्दैन ।’

जनकपुरधाममा निर्वाचन अभिमुखीकरण बैठकमा आएका अध्यक्ष थापाले वर्तमान संविधानमा सुधारको आवश्यकता रहेको भन्दै यस संविधानलाई सर्वस्वीकार्य बनाउन सुधार गर्नुपर्ने आवश्यकता रहेको बताए।

मधेसवादी दलहरूको मागहरूलाई कुनै न कुनै रूपमा सम्बोधन गर्नुपर्ने आवश्यकता रहेको भन्दै राप्रपाले उठाउँदै आएको हिन्दु राष्ट्र पुनर्स्थापनाको निम्ति संविधानमा संशोधनको आवश्यकता रहेको बताए।

धर्म निरपेक्षताको आडमा संगठित र योजनाबद्ध रूपमा धर्म परिवर्तन गराउने काम भइरहेको भन्दै उनले भने, ‘यो धर्म परिवर्तनबाट सनातन हिन्दु राष्ट्रको पहिचान समाप्त भएर विदेशी धर्म र संस्कृति बढने सम्भावना बढेको छ । यसले सामाजिक सद्भाव र एकता खल्बल्याउँछ र अन्त्यमा देशलाई धार्मिक द्वन्द्वमा फसाउँछ।’

पूर्ण धार्मिक स्वतन्त्रतासहितको सनातन हिन्दु राष्ट्रका विषयहरू समावेश गरी संविधान संशोधन गर्ने जनसमुदायको माग रहे पनि व्यक्तिविशेषको स्वार्थ पूरा गर्न अनावश्यक र अनुपयुक्त विषयका लागि संविधान संशोधन गर्नु गलत रहेको बताए ।

त्यस्तै, देशभर एमसीसी सम्झौताविरूद्ध आवाज उठिरहेको समयमा थापाले सो सम्झौताको पक्षमा आफू रहेको बताए। उनले एमसीसी सम्झौतामा केही संशोधन गरिए नेपाल र नेपाली जनताको हितमै यो सम्झौता रहेको स्पष्ट पारे। यद्यपि यो सम्झौताको नाउँमा एमसीसीलाई देशको कानुनभन्दा माथि राख्नु सह्य नहुने उनको भनाइ थियो ।

प्रकाशित मिति: बुधबार, फागुन १४, २०७६ १७:४६