राजपा र समाजवादी पार्टीबीच फेरि एकीकरणको चर्चा, होला त एकता ?

A+ A A-

राष्ट्रिय जनता पार्टी (राजपा) नेपाल र समाजवादी पार्टीबीचको एकीकरणको चर्चा फेरि सुरू भएको छ । राष्ट्रियसभाको चुनावको बेला नेकपासँग राजपाको तालमेल भएपछि नेकपासँगै सरकारमा जाने सम्भावना बढेको थियो । तर, भारतीय नेताहरूको दबाबका कारण सरकारमा जानुभन्दा समाजवादी पार्टीसँग एकीकरणमै जाने योजना बनेको राजपाको उच्च स्रोतले जनाएको छ ।

नेपालमा सरकार निर्माणदेखि परिर्वतनसम्ममा भारतको साउथ ब्लकले खेल्ने गरेको विगतका इतिहासहरू छन् । नेपालमा सरकार बनाउने र बिगार्नेमा सक्रिय रहेकाहरू केपी ओली नेतृत्वको सरकारमा नजान राजपा नेताहरूलाई दबाब दिइरहेका छन । एकैसाथ राजपाका अध्यक्षमण्डलका तीन नेता भारत गएका थिए । राजेन्द्र महतो, शरदसिंह भण्डारी र राजकिशोर यादवले व्यक्तिगत कामका लागि गएको बताए पनि दिल्लीको संकेत बुझ्न गएको बताइएको छ । यी तीनै जना संघीय सरकार र प्रदेश सरकारमा नेकपासँगको गठबन्धन चाहने नेतामध्येका हुन् ।

अध्यक्ष मण्डलका तीन सदस्य एक साता लामो भारत भ्रमण सकेर स्वदेश फर्किएपछि उनीहरूले आफ्ना निकटका कार्यकर्ताहरूलाई सरकारमा जाने सम्भावना नरेको पनि बताएको पार्टीभित्रकै एक वरिष्ठ नेताले बताएका छन् ।

एक साता भारत भ्रमण सकेर राजपा अध्यक्ष मण्डलका सदस्यहरू राजेन्द्र महतो, शरदसिंह भण्डारी र राजकिशोर यादव स्वदेश फर्किसकेका छन् । गत शुक्रबार राति काठमाडौं आइपुगेका उनीहरूले अहिलेकै अवस्था सरकारमा सहभागी नहुने निचोड निकालेका हुन् ।

संघीय सरकारमा सहभागी हुनुभन्दा अघि मधेश आन्दोलनका केही मुद्दा सम्बोधन भए मात्रै सरकारमा सहभागी हुने राजपा अध्यक्षमण्डलका सदस्य राजेन्द्र महतोका ज्वाइँ एवं सोही पार्टीका केन्द्रीय सदस्य अनिल महासेठले बताए । सांसद रेशम चौधरीको रिहाइ, झुटा मुद्दा फिर्ता, संविधान संशोधन भए मात्रै राजपा संघीय सरकारमा जाने राजपाका महासचिव राजीव झाले बताए ।

प्रधानमन्त्री केपी शर्मा ओलीले तत्काल उपसभामुख, दुई वा तीन मन्त्री लिएर संघीय सरकारमा सहभागी हुन र प्रदेश २ मा नेकपा र राजपा गठबन्धनको सरकार गठन गर्नेगरी प्याकेजमै सहमति गर्न प्रस्ताव राजपालाई गरेका छन् । यस विषयमा प्रधानमन्त्री ओली र राजपा नेता, महन्थ ठाकुर, राजेन्द्र महतोलगायतका नेतासँग छुट्टाछुट्टै छलफल भएको छ ।

राजपा अध्यक्ष मण्डलका सदस्यहरू महतो, भण्डारी र यादवले भारत भ्रमणमा रहेका बेला त्यहाँका नेताहरूसँग भेटघाट गरेका छन् । कूटनीतिज्ञसँग राजपा नेताहरूले भेटेका फोटोहरू सामाजिक सञ्जालमा पनि आइसकेका छन् । भारतमा मुस्लिमहरूद्वारा भइरहेको आन्दोलन र दिल्ली चुनावलाई लिएर गृहमन्त्री अमित शाह भारतीय जनता पार्टी (बीजेपी) का अध्यक्ष जेपी नाडा बढी ब्यस्त रहेकाले उहाँहरूसँग भेटघाट नभए पनि अन्य नेतासँग भेटघाट भएको स्रोतले जनाएको छ ।

तर राजेन्द्र महतोसँगै दिल्ली गएका उनका ज्वाइँ एवं राजपाका केन्द्रीय सदस्य अनिल महासेठले महतोजी श्रीमतीलाई उपचार गराउन, भण्डारीजी बिहेको कार्यक्रममा र यादवजी लखनउमा आयोजित एक कार्यक्रममा सहभागी हुन गएको बताए । उनले आफू महतोजीसँगै पूरै भारत भ्रमणमा रहेको र उनले कसैसँग भेट नगरेको बताए ।

राजपा अध्यक्ष मण्डलका संयोजक महेन्द्रराय यादव नेकपासँग जानुभन्दा समाजवादी पार्टीसँग एकीकरणको पक्षमा खुलेर लागेको देखिएको छ । महेन्द्रराय यादव र उपेन्द्र यादवसँग कुरा पनि अघि बढेको राजपा स्रोतले जनाएको छ ।

‘हामी सधैँ वैकल्पिक शक्तिको पक्षमा रहेको र राजपा समाजवादी बीच एकीकरण भयो भने हामी बलियो हुन्छौँ,’ राजपाका केन्द्रीय सदस्य महासेठले बताए ।

पहिला समाजवादी पार्टीका अध्यक्ष उपेन्द्र यादव पार्टी एकीकरणको विपक्षमा थिए तर प्रधानमन्त्री ओलीले बेइज्जतीपूर्ण ढंगले सरकारबाट निकालेपछि राजपालाई सरकारमा जान नदिन पार्टी एकीकरणलाई अगाडि बढाउने हावा दिएका छन । राजपा र नेकपाबीच सहमति भयो भने प्रदेश २ पनि हातबाट जाने खतरा समाजवादी अध्यक्ष बुझिरहेका छन् । तर राजपाका अधिकांश प्रभावशाली नेताहरू प्रदेश २ सरकारसँग असन्तुष्ट देखिएका छन् । राजपाका प्रवक्ता मनिष सुमनले यो सरकार महाअकर्मण्यहरूको हातमा रहेको आरोप लगाएका छन् ।

‘संघीयताका लागि धेरै जनताले प्रहरीको लाठी खाए । १ सय २४ जनाले सहादत नै प्राप्त गरे । एउटा सुन्दर दिन आउँछ भन्ने सपना थियो, त्यो प्रदेश चलाउनेहरूका कारण पूरा हुन्छ जस्तो लागिरहेको छैन,’ उनले बताए । तर तीन नेताको दिल्ली जानुभन्दा पहिला जति राजपा नेताहरू खुलेर बोलिरहेका थिए, अहिले त्यति बोलिरहेका छैनन् ।

प्रकाशित मिति: बिहीबार, फागुन ८, २०७६ १३:३०