१० हजार जरिमानाबारे यसो भन्छ ट्राफिक महाशाखा

A+ A A-

हिजोआज काठमाडौं उपत्यकामा ट्राफिक प्रहरीले राखेको एउटा बोर्ड देख्न पाइन्छ जहाँ लेखेको छ– ट्राफिक नियम उल्लंघन गरेमा १० हजारसम्म जरिवाना गरिनेछ । उपत्यका मुख्य तथा सहायक सडकमा यस्ता बोर्ड महानगरीय ट्राफिक महाशाखाले राखेको हो ।

यस्ता बोर्ड सिंहदरबारदेखि नयाँ बानेश्वर, त्रिपुरेश्वर, थापाथलीलगायतका चोक र सडकको बीच लेनमा ठड्याएका छन् ।तर के ट्राफिक प्रहरीले १० हजार रुपैयाँसम्म जरिमाना गर्न पाउँछ त ? यस्तो कानुन छ ? ट्राफिकले यत्रो जरिमाना गर्न पाउने कुनै कानुनी व्यवस्था छैन । त्यसो भए ट्राफिक प्रहरीले यस्तो बोर्ड किन राख्यो त ?

यो प्रश्नमा ट्राफिक प्रहरीको जवाफ छ– यो जरिमाना ट्राफिक प्रहरीले लिने होइन, यातायात व्यवस्था कार्यालयले लिने हो ।

ट्राफिक प्रहरीले सवारी चालकका सबैभन्दा ठूलो गल्तीमा ५ हजार रुपैयाँसम्म मात्रै जरिमाना गर्न सक्ने व्यवस्था छ । यस्तो जरिमाना सार्वजनिक सवारीले सरकारबाट निर्धारित भाडा दरभन्दा बढी लिएको खण्डमा हुने हो ।

५ हजारभन्दा बढी जरिमाना गर्ने अधिकार भने यातायात व्यवस्था कार्यालयलाई मात्रै हुन्छ । सवारीको स्वरुप परिवर्तन तथा मोडिफाइ गरेमा र वास्तविक प्लेट नराखी आफूखुसी नम्बर राखेमा कार्यालयले यस्तो जरिमाना गर्न सक्छ ।प्रशिक्षण केन्द्र कारखाना तथा वर्कसप सञ्चालनबारे यातायात व्यवस्था कार्यालयले कार्बाही गर्ने गर्छ । यस्तो नियम उल्लंघन गरेमा ७ हजारदेखि १५ हजारसम्म जरिमानाको व्यवस्था छ ।

निजी सवारीसाधनले सडकमा ठूलै गल्ती गरे पनि ट्राफिकले लिन पाउने जरिमाना भनेको १५ सय रुपैयाँसम्म मात्र हो ।

ट्राफिक नियमको उल्लंघन गर्ने सवारीसाधन ट्राफिक प्रहरी हुँदै यातायात व्यवस्था कार्यालय पठाइने भएकाले होर्डिङ बोर्डमा १० हजारसम्म जरिमाना भनेर लेखिएको ट्राफिक महाशाखाका प्रमुख वरिष्ठ प्रहरी उपरीक्षक (एसएसपी) भीमप्रसाद ढकाल बताउँछन् ।

‘कसैले आफूखुुसी सवारीसाधनको स्वरुप परिवर्तन गरेर चलाए, त्यो ट्राफिक प्रहरीले नै समातेर यातायात कार्यालय पठाउने हो, त्यो पनि ट्राफिक उल्लंघन नै हो,’ ढकाल भन्छन् ।

प्रकाशित मिति: मंगलबार, माघ १४, २०७६ १७:०६