ओली सचिवालय : पोखरेलद्वयले जोगाए रिमाललाई, प्रेस सल्लाहकारमा सूर्य थापा !

A+ A A-

प्रधानमन्त्री केपी शर्मा ओलीले आफ्ना १२ मध्ये ६ जना सल्लाहकारलाई हटाएपछि अब त्यो ठाउँमा को–को आऊलान् भन्ने चासो सर्वत्र छ । यस्तै चासोकै बीच प्रधानमन्त्री ओलीले बंगलादेशका राष्ट्रपति मोहम्मद अब्दुल हमिदलाई बिदाइ गरेलगत्तै आज साँझ मन्त्रिपरिषद् बैठक बोलाएका छन् ।

आकस्मिक रूपमा बैठक बोलाएका ओलीले सल्लाहकार नियुक्तिमा पनि परामर्श गर्दैछन् ।

प्रेसको जिम्मा सूर्य थापालाई

प्रधानमन्त्रीका प्रेस सल्लाहकार कुन्दन अर्यालको राजीनामा स्वीकृत भएपछि अब ओलीले सो ठाउँमा नेकपाका केन्द्रीय सदस्य तथा प्रचार विभाग उपप्रमुख सूर्य थापालाई नियुक्तिको तयारी गरेका छन् ।

झलनाथ खनाल प्रधानमन्त्री हुँदा प्रेस सल्लाहकार बनेका नेता थापाको पृष्ठभूमि पत्रकारिता हो । उनलाई ईश्वर पोखरेलको सल्लाहअनुसार प्रेस सल्लाहकारमा नियुक्त गर्ने तयारी भइरहेको प्रधानमन्त्री सचिवालयका एक सहयोगीले शिलापत्रलाई बताए ।

थापालाई आज बस्ने मन्त्रिपरिषद् बैठकबाटै नियुक्तिको तयारी भइरहेको स्राेतको दाबी छ ।

पोखरेलद्वयको आशीर्वादले रिमाल पुरानै जिम्मेवारीमा

प्रधानमन्त्री ओलीको राजनीतिक सल्लाहकारबाट राजीनामा दिएका विष्णु रिमाल पुनः सोही पदमा फर्कने भएका छन् । ओली निकट मानिने महेश बस्नेत, निरुदेवी पाललगायतका नेताहरूको तीव्र असन्तुष्टिका बीच रिमाललाई पुरानै जिम्मेवारीमा फर्काउन लागिएको हो ।

रिमालकै कारण निरुदेवी पाललगायतका ओली निकटस्थ नेताहरू लामो समयदेखि बालुवाटार जान छाडेका छन् । निकट सहयोगीहरूको असन्तुष्टिका बीच ओलीले रिमाललाई निरन्तरता दिनुको पछाडि दुई पोखरेलको हात रहेको स्राेतको दाबी छ ।

उपप्रधानमन्त्री तथा रक्षामन्त्री ईश्वर पोखरेल र प्रदेश ५ का मुख्यमन्त्री शंकर पोखरेलको तीव्र दबाबपछि ओली रिमाललाई जिम्मेवारीमा फर्काउन तयार भएका हुन् ।

मुख्यमन्त्री पोखरेलले त सामाजिक सञ्जालमार्फत रिमालको पक्षमा वकालत नै गर्दै आएका छन् । रिमालसँग लामो समयदेखि सम्बन्ध राम्रो नभएका प्रधानमन्त्रीका आईटीविज्ञ अस्गर अली पनि पुरानै भूमिकामा बालुवाटार फर्किंदैछन् ।

प्रकाशित मिति: शुक्रबार, कात्तिक २९, २०७६ १३:५५