लिटल फ्लावर स्कुल एलपीएल क्रिकेट च्याम्पियन

A+ A A-

लिटल फ्लावर स्कुल ‘निष्ट कलेज लिटल फ्लावर प्रिमियर लिग’ (एलपीएल)को च्याम्पियन भएको छ । संस्कार क्रिकेट एकेडेमीद्वारा आयोजित प्रतियोगिताको मंगलबार भएको फाइनलमा हिमालयन ह्वाइटहाउस वर्ल्ड स्कुल, काठमाडौंलाई ९ विकेटले हराउँदै लिटिल फ्लावर एलपीएलको चौथो संस्करणको च्याम्पियन बनेको हो ।

कप्तान विपिन रावल र सुवास ऐरले उत्कृृष्ट प्रदर्शन गरेपछि डिफेन्डीङ च्याम्पियन लिटल फ्लावर उपाधी रक्षा गर्न सफल भएको हो । अघिल्लो संस्करणमा लिटिल वुद्ध एकेडेमीलाई पराजित गर्दै लिटल फ्लावर च्याम्पियन बनेकोे थियो । च्याम्पियन भएको लिटल फ्लावरले ट्रफिसहित नगद २ लाख पायो भने उपविजेतामा सिमित भएको हिमालयन ह्वाइटहाउसले ट्रफीका साथै नगद १ लाख पाएको छ ।

संघीय प्रहरी कार्यालयको खेल मैदानमा भएको फाइनलमा टस जितेर पहिले ब्याटिङ रोजेको हिमालयन ह्वाइटहाउसले १ सय ३७ रनको मध्यम योगफल बनाएको थियो । तर, ओपनरद्वय सुवास ऐर र कप्तान विपिन रावलले उत्कृष्ट प्रदर्शन गरेपछि ह्वाइटहाउसले दिएको लक्ष्य लिटल फ्लावरले ११ बल बाँकी छँदै लक्ष्य पुरा गर्‍यो ।

सुवासले ५४ बलमा ३ छक्का र ९ चौकाको मद्दतमा नटआउट ६८ रनको अर्धशतकीय इनिङ खेलेभने ३८ बलमा ३ छक्का र ४ चौका प्रहार गर्दै ४७ रन बनाएका विपिनको अर्धशतक बनाउनबाट ३ रनले चुके । ओपनरद्वयले पहिलो विकेटका लागि गरेको १ सय ३ रनको शतकीय साझेदारी रोक्न विक्रम ठगुन्नाले कप्तान रावललाई पभेलियनको बाटो देखाएका थिए । यस्तै, लिटल फ्लावरका नरेन भट्टले अविजित १२ रन जोडे ।

पहिलो इनिङमा ब्याटिङ रोजेको ह्वाइटहाउसले उत्कृष्ट सुरुवात गरेपनि मध्यक्रम धराशायी भएपछि २० ओभरमा १ सय ३७ रनमै सिमित भएको थियो । ह्वाइटहाउसका लागि ओपनरद्वय दीपक बोहराले ३४ रन तथा सुदीप बस्नेतले १८ रन जोडे । पहिलो विकेटका लागि ६ ओभरमा ६१ रनको साझेदारी गरेको ह्वाइटहाउसले त्यसपछि निरन्तर विकेट गुमाएपछि मध्यम योगफलमा सिमित भएको थियो ।

मध्यक्रमका ब्याट्सम्यानमध्ये छैठौं नम्बरमा मैदान छिरेका सुमित श्रेष्ठले २५ रन बनाउनु बाहेक अन्य ब्याट्सम्यानले उल्लेखनिय योगदान दिन सकेनन् । लिटल फ्लावरका लागि दिपक रोकाया र अनुराग सिंहले २–२ विकेट लिए भने विपिन रावलले १ विकेट आफ्नो नाममा लेखाए ।

लिटल फ्लावरलाई च्याम्पियन बनाउने क्रममा अविजित ६८ रन बनाएका सुवास ऐर ‘म्यान अफ द म्याच’ घोषित भए । उनी ट्रफीसहित नगद १ हजार ५ सय पाउन सफल भए । यस्तै, १६ कात्तिकदेखि सुरु भएको प्रतियोगितामा उत्कृष्ट प्रदर्शन गरेका हिमालयन ह्वाइटहाउसका आरियो पौडेल ‘प्लेयर अफ द टुर्नामेन्ट’ भएका छन् । उनले नगद १५ हजार पाएका छन् ।

यसैगरी, शारदा विद्या निकेतनका विरेन्द्र नाथ उत्कृष्ट ब्याट्सम्यान, लिटल फ्लावरका दीपक रोकाया उत्कृष्ट बलर तथा लिटल फ्लावरकै अनुराग सिंह उदीयमान खेलाडी बनेका छन् । उनीहरु जनही नगद ५ हजार पाउन सफल भए ।

विजेता तथा उपविजेता टिमलाई मंगलबार नै एक कार्यक्रमका बीच पुरस्कार वितरण गरिएको छ । आयोजक संस्कार क्रिकेट एकेडेमीका अध्यक्ष रामचन्द्र शाहीको अध्यक्षता तथा निष्ट कलेजका संस्थापक प्रिन्सिपल एवं निष्ट फाउण्डेसनका अध्यक्ष डाक्टर माधव बरालको प्रमुख आतिथ्यतामा भएको कार्यक्रममा ट्रफी तथा नगद पुरस्कार दिइएको थियो ।

कार्यक्रममा डाक्टर बरालले आगामी दिनमा पनि क्रिकेटमा लगानी गर्ने दृढता व्यक्त गर्दै क्रिकेटको जग बलियो भएमा मात्र क्रिकेटको समग्र विकास सम्भव रहेको बताए । प्रतियोगिताका प्रबन्ध निर्देशक कलेन्द्र शाहीद्वारा सञ्चालित एवं संयोजक भुपी सिंह धामीले स्वागत मन्तव्य राखेको समापन कार्यक्रममा विभिन्न व्यक्ती तथा संस्थालाई सम्मान पनि गरिएको थियो ।

लैनचौरस्थित निष्ट कलेजले मुख्य प्रायोजन रहेको प्रतियोगितामा देशभरका १२ विद्यालयले सहभागीता जनाएका थिए । लिग कम नकआउट फम्र्याटमा खेलाइएको प्रतियोगितामा सहभागी टिमले सोही विद्यालयको १० कक्षासम्म अध्ययनरत १० जना खेलाडी तथा ४ जना १९ वर्षमुनिका नेपाली क्रिकेट खेलाडी समावेश गर्न पाउने व्यवस्था गरिएको थियो ।

विद्यालय स्तरबाटै क्रिकेट खेलाडी उत्पादन गर्ने उद्देश्यले विगत चार वर्षदेखि संस्कार क्रिकेट एकेडेमीले विद्यालय स्तरीय क्रिकेट प्रतियोगिता आयोजना गर्दै आएको छ । प्रतियोगिताको पाँचौ संस्करणमा पुरस्कार राशीमा वृद्धि गर्नुका साथै नयाँ प्रयोगका साथ आयोजना गरिने पनि अध्यक्ष शाहीले जानकारी दिए ।

प्रकाशित मिति: मंगलबार, कात्तिक २६, २०७६ २१:१५