हामीले हाम्रो संस्कृति भुल्दै गयौं : उपराष्ट्रपति पुन

A+ A A-

उपराष्ट्रपति नन्दबहादुर पुनले खस भाषाको उद्गम क्षेत्र जुम्लाको सिञ्जा भएकाले यसको संरक्षण हुनुपर्ने बताएका छन् । जुम्लाको सिञ्जामा आयोजना गरिएको प्रथम सिञ्जा बृहत सांस्कृतिक महोत्सवको उद्घाटन गर्दै उपराष्ट्रपति पुनले नेपाली भाषाको उद्गम थलो भएका कारण यसको संरक्षण गरिनुपर्ने बताएका हुन् ।

उपराष्ट्रपति पुनले खस सभ्यतालाई देशमा चिनाउन शताब्दी पुरुष सत्यमोहन जोशीले गरेको योगदानको पनि चर्चा गरे ।

‘नेपाली भाषा र संस्कृतिलाई पहिलोपटक सत्यमोहन जोशीले देशभर चिनाएका थिए,’ उनले भने, ‘आफ्नो भाषा तथा संस्कृतिको संरक्षण गर्न छाडेर अरु देशको सिको गर्दा हाम्रो आफ्नोपन नै खतरामा पर्ने डर भइसकेको छ ।’

कर्णाली भाषा संस्कृतिको संरक्षणका विषयमा आफुले पहल थाल्नेमा उपराष्ट्रपति पुनले विश्वास दिलाए ।

‘मैले मेरो ठाउँबाट यहाँको संस्कृति जर्गेनाका विषयमा कदम चाल्नेछु,’ उनले भने, ‘हामीले हाम्रो संस्कृति भुल्नु हुँदैन ।’

कार्यक्रममा कर्णाली प्रदेशका मुख्यमन्त्री महेन्द्रबहादुर शाहीले नेपालीहरुको सांस्कृतिक, ऐतिहासिक भाषिक सभ्यताको उद्गम थलो भएकाले सिञ्जाको संरक्षण तथा विकास गर्न प्रदेश सरकारले पहल थाल्ने बताए ।

‘सिञ्जा भाषा तथा सभ्यता विकास भएको एक ऐतिहासिक ठाउँ हो,’ उनले भने, ‘यहाँको विषयमा अध्ययन तथा अनुसन्धान गर्न आवश्यक छ ।’

सिञ्जालाई पर्यटकीय क्षेत्रका रुपमा विकास गर्नका लागि प्रदेश सरकारले होमस्टेको सुरुवात, खस संग्राहलयको स्थापना गर्नुका साथै सिञ्जाका सडक कालापत्रे गरिने प्रतिबद्धता व्यक्त गरे ।

‘खस संग्राहलयको स्थापना यसै आर्थिक वर्षमा हुनेछ,’ उनले भने, ‘पूर्वाधार विकाससहित यहाँको वृहत्तर विकासमा जोड दिएका छौं ।’

स्थानीयहरुले उपराष्ट्रपतिलगायत सबै सहभागीलाई पराम्परागत एवं मौलीक शैलीमा स्वागत गरेका थिए ।

प्रकाशित मिति: शुक्रबार, कात्तिक ८, २०७६ १८:१०